Showing posts with label नेपाल खबर. Show all posts
Showing posts with label नेपाल खबर. Show all posts

Wednesday, July 10, 2019

आँप ल्याएको भारतीय ट्रकमा तोडफोड

२६ असार, चितवन । चितवनको नारायणगढ क्षेत्रपुरस्थित महानगर ताजा तरकारी तथा फलफूल थोक बजारमा आँप ल्याएको भारतीय ट्रकमा तोडफोड भएको छ ।

विहान तीन बजे आँप लिएर बजार क्षेत्रमा प्रवेश गरेको यूपी ४१ ए टी २६९१ नम्वरको भारतीय मालबाहक ट्रकमा तीन जना युवाले तोडफोड गरेका हुन् । स्कुटरमा आएका ती युवाले गाडीको अगाडिको सिसा फुटाइदिएका छन् ।

उनीहरुले पेट्रोल छर्किएर आगो लगाउने प्रयाससमेत गरेको फलफूल तथा तरकारी व्यवसायी संघका अध्यक्ष थिरप्रसाद धितालले जानकारी दिए । ‘ती युवाहरुले तोडफोडपछि पेट्रोल छर्किएर आगो लगाउने प्रयास गरेका रहेछन्, तर चिसोका कारणले सलाई ओसिएपछि आगो नबल्दा ट्रक जोगियो,’ अध्यक्ष धितालले भने, ‘यसले ब्यापारीहरुमा भय बढाएको छ ।’

सो ट्रकमा पाँच टन आँप थियो । ट्रकमा तोडफोड गर्दै आगजनीको प्रयास गरेपछि केही ब्यापारीहले प्रतिकार गरेका थिए । त्यसपछि ती युवाहरु स्कुटरमै फरार भएको चितवन प्रहरीले जनाएको छ ।
चितवन प्रहरीका प्रवक्ता एकनारायण कोइरालाले दोषीहरुको पहिचान नभएको बताए । प्रहरीले तोडफोड गर्नेहरुको खोजी कार्य तीव्र पारिएको जनाएको छ ।

चितवनकै सबैभन्दा ठूलो यो तरकारी बजारमा सीसीटीभीसमेत छैन । तर बजारको सुरक्षाका लागि सीसीटीभी जडानको प्रकृया भने अघि बढाइएको अध्यक्ष धितालले बताए ।

Continue Reading…

यसरी बनाउनुहोस् भान्सालाई पोषिलो

जनै पूणिर्मा र रक्षा बन्धन जस्ता दुई ठूला पर्व नजिकिदैछन्  । यी दुबै पर्व एकै दिन मनाइन्छ । यी दुबै पर्वको एउटा सामुहिक विशेषता छ, उक्त दिन हामी क्वाँटीलाई खान्छौं । त्यसै पनि यो बर्खाको बेला झोलयुक्त खानेकुरा खाइन्छ, क्वाँटी भन्ने बित्तिकै हामी गेडागेडीको झोल नै सम्झन्छौं । यद्यपि, क्वाटी अर्थात गेडागुडीको झोल खानलाई कुनै चाडपर्व नै पर्खनु पर्छ भन्ने छैन ।

रेशादार खाद्य पदार्थको रुपमा समेत चिनिने गेडागुडी हामी हरेक मौसम र अवसरमा खान सक्छौं । यहाँ हामी गेडागुडी अर्थात रेशादार खानेकुरा वयष्कहरुलाई मात्र नभइ, बालबालिकाहरुलाई पनि कत्तिको महत्वपूर्ण छ भन्ने कुरामा चर्चा गर्दैछौं ।

चिकित्सकहरूका अनुसार स-साना बालबालिकाहरुलाई पनि ठूला मान्छेहरु झैं रेशायुक्त खाना उत्तिकै आवश्यक पर्छ । त्यस्ता खानेकुराले उनीहरुलाई फाइदा पुर्‍याउँछ । बाल रोग विशेषज्ञहरुका अनुसार कुनै पनि शिशु एक वर्षको हुने बित्तिकैदेखि रेशादार खानेकुरा खान दिन सकिन्छ । जसरी बालबालिकाहरुको तौल, उचाइ र उमेर बढेसँगै उनीहरुलाई धेरै क्यालोरीको आवश्यकता पर्दछ, त्यसैगरी उनीहरुलाई उचितमात्रामा रेशादार खानेकुरा प्रदान गर्नु आवश्यक हुन्छ ।

अझ बढ्दो उमेरका बालबालिकाहरुका लागि त यो खानेकुरा अनिवार्य नै छ भन्दा फरक पर्दैन । बालबालिकाहरुलाई सानै उमेरदेखि रेशादार खानेकुरा ख्वाउन थालियो भने उनीहरु कब्जियतको शिकार हुनबाट जोगिन्छन् ।

किन आवश्यक छ रेशादार खाना

धेरैजसो बालबालिकाहरु रेशादार खानेकुरा मन पराउँदैनन् । गेडागुडीको तरकारी पकाएको दिन उनीहरु भान्सामा पस्नै नपरे पनि हुन्थ्यो भन्ने सोच्दछन् । यसको ठिक विपरित, उनीहरुलाई यदि तपाईंले जंक फूड अथवा फास्टफुड अफर गर्नु भयो भने त्यसका लागि उनीहरु तुरुन्तै तयार हुन्छन् । दुःख लाग्दो कुरा के छ भने बालबालिकाको मोटोपन तथा कब्जियतको कारण नै जंक फूड हो भन्ने कुरा हामीले उनीहरुलाई बुझाउन सकिरहेका हुँदैन, जुन कुरा बुझाउन अति नै अनिवार्य छ ।

फाइदै फाइदा

रेशादार खानेकुराका फाइदाहरु प्रसस्त छन् । रेशादार खाना खाँदा हाम्रो पेट प्राकृतिक रुपले नै सफा हुन्छ । ठूला मान्छेलाई नै यसले कब्जियतबाट जोगाउँछ भने बालबालिकालाई त यो राम्रो डाइट नै हुन्छ । त्यसो त कब्जियतबाट बालबालिकाहरु पनि पीडित हुन्छन्, उनीहरुले रेशादार खानेकुरा खाए भने त्यो समस्याबाट छुटकारा पाउँछन् । त्यसैले बालबालिकाहरुको खानामा रेशादार खानेकुरालाई समावेश गर्नैपर्छ । यस्ता खानेकुराले उनीहरुको मोटोपनालाई नियन्त्रण गर्न समेत सहज हुन्छ ।

हामीले प्रत्येक दिन खाने खानामा रेशायुक्त खानेकुरा समावेश छैन भने त्यसले बढ्दो उमेरका बालबालिकाको शारीरिक विकासमा समेत नकारात्मक प्रभाव पार्न सक्छ । रेशादार खानेकुरामा क्यालोरी, भिटामिन, खनिज जस्ता तत्व नभए पनि यो बालबालिकादेखि वयष्कसम्मलाई उत्तिकै उपयोगी छ ।

रेशादार खानेकुराले हाम्रो पाचन प्रकृयालाई पनि स्वस्थ राख्न सहयोग पुर्‍याउँछ । हाम्रो पेटमा हुने आन्द्रालाई प्राकृतिक रुपले नै काम गर्नलाई यो खानेकुराले सहयोग गरिरहेको हुन्छ । त्यसैले यो खानेुकुराको नियमित सेवनले आन्द्रासँग सम्बन्धित समस्या नै उत्पन्न हुँदैन ।

त्यति मात्र होइन, रेशादार खानाले हाम्रो शरीरको ब्लड सुगरको लेभललाई पनि स्थिर बनाइराख्छ । रगतमा हुने ग्लूकोजको मात्रालाई यसले नियन्त्रण गर्ने खुबी राख्दछ ।

रेशादार खानेकुराबाट शरीरले आवश्यक पोषण प्राप्त गर्दछ, जसबाट शरीरलाई इनर्जी पनि प्रँप्त हुन्छ । यो खानेकुराले कोलेस्ट्रोललाई समेत नियन्त्रण गर्दछ । जसका कारण हाम्रो मुटु सुरक्षित हुन्छ । मुटु सम्बन्धि रोग लाग्ने सम्भावना न्यून हुन्छ ।

चिकित्सकहरुका अनुसार रेशादार खाना एक प्रकारको कार्बोहाइड्रेट हो, जुन रुख-बिरुवामा पाइन्छ । स्वास्थ सम्बन्धि अध्ययनहरुका अनुसार रेशादार खानाले मधुमेयलाई समेत कम गर्न सहयोग पुर्‍याउँछ । रेशादार खानाको नियमित सेवनले क्यान्सरबाट समेत जोगिन सकिने चिकित्सकहरुको भनाइ छ ।

कुन उमेरदेखि खाने ? कति खाने ?

रेशादार खानेकुराले शरीरलाई राम्रो गर्छ भन्दैमा एकै पटकमा धेरै मात्रामा खानु पनि हुँदैन । एकैपटक धेरै खाएमा अपच हुने निश्चित छ । अझ बालबालिकाहरुलाई त आवश्यकता भन्दा बढि रेशादार खानेकुरा दिनै हुँदैन ।

रेशादार खानामात्र खाइरहँदा शरीरलाई आवश्यक खनिज तत्वको अभाव हुनसक्छ । रेशायुक्त खानाको मात्र बढाइयो भने यसले नकारात्मक प्रभाव पार्न सक्छ । जस्तै पेटमा ग्यास बढ्ने, पेट फुल्ने, कब्जियत हुने जस्ता समस्या देखा पर्न सक्छ । त्यसैले रेशादार खाना खाँदा थोरै, बिस्तारै तथा मात्रा मिलाएर खानु उचित हुन्छ ।

बालबालिकाहरुलाई त धेरै मात्रामा रेशादार खाना दिन थालियो भने उनीहरुको भेट भरिएको अनुभव गर्छन् । जसबाट उनीहरुको शरीरमा अन्य पोषक तत्वहरु जानै पाउँदैन । बालबालिकाहरुलाई रेशायुक्त खानेकुराको साथमा पानी पनि प्रसस्त पिलाउनु पर्छ । यद्यपि, धेरै पानी पिइयो भने डाइरिया हुन सक्छ भने थोरै पानी पिइयो भने कब्जियत समेत हुनसक्छ । त्यसैले पानी पनि ठिक्क मात्रामा पिउनु पर्छ ।

के भन्छन् चिकित्सक ?

चिकित्सकहरूका अनुसार एकदेखि तीन वर्षसम्मका बालबालिकाहरुलाई खानामा १५ ग्राम तथा ४ देखि ८ वर्षसम्मका बालबालिकाहरुलाई २५ ग्राम रेशादार खाना दिनु आवश्यक हुन्छ । यसका साथै बालबालिकाहरुलाई सन्तुलित डाइट प्रदान गर्नुपर्छ । त्यस्तो डाइटमा चिल्लो पदार्थ, डेरी प्रोडक्ट, फलफूल, साग-सब्जी, मासु, दाल आदि पर्याप्त मात्रामा समावेश गर्नु पर्छ । यस्ता खाद्य पदार्थबाट शरीरले ग्यालोरी प्राप्त गर्छ ।

Continue Reading…

अस्ट्रेलियन शिक्षकले खोले नेपाली स्कूलमा भव्य पुस्तकालय

सिड्नी । सुरु गर्छु उनीबारे अघिल्लो रिपोर्टको अन्त तिरबाट । यो पंक्तिकार र सिड्नीमा क्रियाशील सामाजिक अभियन्ता डा. मोम विश्वकर्मासँग पुरातात्विक महत्वको देखिने भित्री पश्चिमी पुरानो बस्ती ग्लेबस्थित एक पुस्तक पसलभित्रको रंगीन क्याफेमा उनको नेपाल प्रेम सुनिरहँदा करिब दुई टन पुस्तकको कार्गो नेपाल तर्फ उड्नै लागेको थियो ।

कुन ठाउँमा हो पुस्तकालय बन्ने ? मेरो प्रश्नमा अस्ट्रेलियन शिक्षक ग्याबिन मकोर्म्याकले उत्तर दिए- म नाम भन्न जान्दैनँ, हामी पर्यटकले नेपाली एक हजार तिरेर हेर्न जाने पुरातात्विक शहर उतापट्टीको सुन्दर डाँडामा ।

मैले थप सोधेँ- ए ए नगरकोटमा ? उनको उत्तर थियो- एस न्यगोर्कोटमा । तर नगरकोट होइन रहेछ । यो पंक्तिकारले बढी जान्ने भएर नगरकोट भनाएको रहेछ । पुस्तकालय बन्ने ठाउँ त नुवाकोट पो रहेछ । हो नुवाकोटको विदुर नगरपालिकाभित्र पर्ने बच्छ्लादेवी माध्यमिकको हाताभित्र ।

यो पनि पढ्नुहोस नेपाली मनमा रंग भर्ने एक अस्ट्रेलियन शिक्षक

अस्ट्रेलियामा आफूले पढाउने पूर्वप्राथमिक विद्यालयका शिशुहरूको सहयोगबाट सुरु भएको ग्याबिनको नेपालमा शैक्षिक क्षेत्रमा सहयोग गर्ने अभियानमा उनका सामाजिक सन्जाल लिंक्देन र फेसबुकका साथीहरु लस्कर लागेपछि यो पुस्तकालय बन्न सम्भव भएको हो ।

अहिले गाउँमा रोपाइँ चलिरहेकाले वडाका जनप्रतिनिधिहरु विद्यालय व्यवस्थापन समितिका सदस्यहरु, थोरै अविभावक, शिक्षक र विद्यार्थीबीच कुनै भव्य समारोह विना दश हजार पुस्तकले भरिएको भव्य पुस्तकालय आज बिहीबार विहान विद्यालयलाई हस्तान्तरण गरिएको छ ।

करिब २० लाख नेपाली रुपैयाँ लागतमा ग्याबिन आफैं, उनका नेपाली साथी आनन्द देवकोटा र स्थानीयहरुको स्वयंसेवामा निर्माण भएको पुस्तकालय आज विद्यालयलाई हस्तान्तरण गरिएपछि उनको अर्को मिशन सुरु हुन्छ- नवलपरासी जिल्लामा अर्को पुस्तकालय बनाउने ।

उनले दुखेसो त गरेनन्, तर संसारभरिका उनका मित्रहरुले नेपालमा पुस्तकालय बनाउन दिएको सहयोगबाट किनिएका पुस्तकहरुमाथि नेपालको भन्सारले चर्को कर लगायो । हालै सरकारले पुस्तकमा १० प्रतिशत कर लगाउने निर्णय गरेको छ ।

सोझा शिक्षक उनले हजारौं रकम करमा पनि तिरे र काठमाडौंबाट ढुवानीमा पनि त्यस्तै खर्च गर्नु पर्‍यो । तर आफ्नो उद्देश्यमा अडिक, आफैंप्रति कडा स्वभावका, तर विद्यार्थीका प्रिय शिक्षक ग्याबिन नेपाली पहाडको एक विद्यालयमा भव्य पुस्तकालय बनाएरै छाडे ।

नयाँ पुस्तक करले केही क्षण आतिएका ग्याबिनले भने- हामी पहाडी गाउँमा सबैभन्दा ठूलो पुस्तकालय बनाउँदै छौं भन्ने सबैलाई थाहै थियो । केही हप्ताअघि नेपालतर्फ पुस्तक कार्गो गर्दा कार्गो रकम निश्चित गरिएको थियो, तर नेपाल पुग्दा म नयाँ पुस्तक करको मारमा परेँ । दराज, कार्पेट, फर्निचरका लागि बचाएको रकम करमा तिर्नु पर्दा निकै निरास भएँ । तर मेरो भाग्य मंगोलियन मरुभूमितिर घुमिरहेका मेरा मित्रले इमेलमा भने- साथी चिन्ता नगर म हृयामर र काँटी बोकेर काठमाडौंमा खडा छु, फर्निचर, कार्पेटलगाएत सबै-सबै खर्च म बेहोर्छु । उनले थपे- धन्य यी सहृदयी साथीको सम्मानमा यो पुस्तकालयको नाम हुनेछ- जेम्स हृयारिसन लाईब्रेरी अफ एक्सेलेन्स ।

गत मंगलबार उनले लेखेका छन्- आज काठमाडौंमा पुस्तकका भारि कस्ने दिन र पहाडी टाकुरातर्फ अघि बढ्ने दिन गगनमा पुस्तकालय बनाउनु जो छ । प्रिय एलिजाबेथ म आनन्द अनुभव गर्दै छु । यी हेर तिमीले पठाएका पुस्तक ।

उनकी अस्ट्रेलियाकी साथि एलिजाबेथ मेरीले आफूले पठाएका पुस्तक नेपाल पुगेको खबर पाउँदा निकै खुशी भएको भन्दै गत मंगलबार नै लेखिन्- हामीले पठाएका पुस्तक आफ्नो नयाँ घरमा पुग्दै गरेको खबर पाउँदा म झन् खुशी छु ।


उनले पुस्तकालय निर्माणमा पुस्तक र फर्निचरका भारी बोक्दै आफ्ना संसारभरका सहयोगीहरुलाई भने- हिमालयको काखमा पुस्तकालय बनाउन तपाईंहरुले मलाई पुस्तकहरु दिनुभयो । पहाड हरुमाथि ड्राइभिङ्ग गर्दै नदी र खोल्साहरुमा ओर्लिंदै हामी फेरि पहाडमाथि छौं । बच्चाहरु आएर पुस्तकका भारी सार्न सहयोग गरे । यी पुस्तकले धेरै पुस्तालाई पढाउने छन् । म यो खुशी तपाईंहरुलाई साट्न पाउँदा कम्ति खुशी छैन ।

अहिले अस्ट्रेलियामा स्कूल होलिडे चलेको छ । उनी यताको स्कूल होलिडे सुरु हुने गत शुक्रबारको अन्तिम घन्टी बजेपछि सोझै विमानस्थल हानिएका थिए र शनिबार साँझ नेपाल झरेलगत्तै पुस्तकालय निर्माणको बाँकी काममा अहोरात्र खटेका थिए ।

नेपाल उड्नुअघि अनलाइनखबरसँग कुरा गर्दै आफू नेपाल पुगेको एक हप्ताभित्रै पुस्तकालय समुदायलाई हस्तान्तरण गर्ने प्रतिज्ञा सुनाएका ग्याबिनले बुधबार राति काम सम्पन्न भएको पुस्तकालयका फोटाहरु पठाएर भने- हेल्लो ‘ओके’ (अनलाइनखबर) हामीले पुस्तकालय बनायौं । तिमीलाई यो फोटो चाहिन्छ होला, तर हामीलाई काम गर्नु छ हल्ला होइन ।

Continue Reading…

रितिकको अभिनय देखेर सुजैन दंग

बलिउडका सवैभन्दा महंगो सम्बन्ध विच्छेद थियो, अभिनेता रितक रोशन र सुजैन खानको । उनीहरुको सम्बन्ध विच्छेदले बलिउडमा ठुलै पराकम्पन ल्याएको थियो । जबकी रोशन-सुजैनको दुई सन्तान समेत छन् ।

सम्बन्ध विच्छेदपछि पनि उनीहरुले भेटघाटको सिलसिला भने जारी राखे । संभवत बच्चाका लागि उनीहरुले धेरै दुरी बढाएनन् । हालै मात्र बलिउडको नयाँ फिल्म ‘सुपर ३०’ हेरेपछि अभिनेता रितिक रोशनकी पूर्व श्रीमती सुजैन खानले उक्त फिल्मको समिक्षा गर्दै रितिकको अभिनयको प्रशंसा गरेकी छिन् ।

रितिक रोशन र सुजैन खानको डिभोर्स भएको ४-६ भएपनि आजका मितिसम्म दुबैबीचको सम्बन्ध मधुर छ भने दुबैले आफ्ना दुबै छोराहरुलाई उत्तिकै समय दिइरहेका छन् ।

उनीहरु संग-संगै घुम्न पनि निस्कन्छन् । यतिमात्र होइन, हरेक परिस्थितिहरुमा रितक र सुजैन एकअर्कालाई सहयोग गर्न अघि बढिरहन्छन् ।

हालै मात्र रितिककी बहिनी सुनैनाले उनका परिवारले उनलाई कुटपीट गरेको तथा प्रताडित गरेको आरोप लगाउँदा पनि सुजैनले रितिककै साथ दिएकी थिइन् । पछिल्ला दिनहरुमा सुजैन रितिकका लागि केही बढि नै खुशी भैरहेकी छिन् । त्यसको कारण रितिकको नयाँ फिल्म ‘सुपर ३०’ लाई मानिएको छ ।

रितिकको उक्त फिल्म वास्तविक जीवनका शिक्षक आनन्द कुमारको जीवनीमा आधारित छ, जो बिहारमा आईआईटी-जेईईका लागि विद्यार्थीहरुलाई प्रशिक्षण दिन्छन् ।

उक्त फिल्ममा रितिकले आनन्द कुमारको भूमिका निर्वाह गरेका छन् । यो फिल्म यही शुक्रवार अर्थात जुला १२ का दिन प्रदर्शन हुँदैछ । जहाँ स्वयं आनन्द कुमारले उक्त फिल्मको प्रसंशा गरेका छन्, त्यहीं अहिले रितिककी पूर्व श्रीमती सुजैन पनि रितिकको अभिनयबाट प्रभावित भइन् ।

सुजैनले हालै मात्र रितिकको उक्त फिल्म हेरेपछि इन्स्टाग्रँममा लेखिन्-‘रितिक, यो तपाईंको अहिलेसम्मको सबैभन्दा उत्कृष्ट प्रस्तुतीमध्येको एक हो । मलाई तपाईंप्रति धेरै नै गर्व छ ।’ ‘सुपर ३०’ लाई विकास बहलले निर्देशन गरेका हुन् । फिल्ममा मृणाल ठाकुर, वीरेन्द्र सक्सेना, जोनी लिवर, अमित साध तथा पंकज त्रिपाठी जस्ता कलाकारले पनि अभिनय गरेका छन् ।

Continue Reading…

सम्बन्ध विच्छेद ? सोच्दै नसोच्नुहोस्

विवाह एउटा त्यस्तो अटुट बन्धन हो, जसमा दुई व्यक्तिसहित दुई भिन्न परिवारको पनि नाता-सम्बन्ध जोडिन्छ । विवाहको सम्बन्धमा बाँधिएपछि दुई व्यक्तिको संसारमा पहिलेको भन्दा निकै परिवर्तन आउँछ । थुप्रै कुराहरु पछाडि नै छुट्न सक्नछन्, अनि थुप्रै नयाँ कुराहरु गाँसिन्छन् ।

एक-अर्काप्रति जिम्मेवारी र इमान्दारिता वैवाहिक सम्बन्धको सबैभन्दा महत्वपूर्ण शर्त हुन् । यो पवित्र सम्बन्धमा बाँधिनका लागि उमेरसँगै आपसी समझदारी पनि अत्यावश्यक छ । साथै, एक-अर्काको कुरा सुन्ने र बुझ्ने पनि गर्नुपर्छ । तर वैवाहिक सम्बन्धमा माया, प्रेम, विश्वास र खुशीको ठाउँ घृणा,अविश्वास र दुःखले लिन थाल्यो भने त्यो वैवाहिक जीवन टुंगिने अवस्थामा पुग्छ ।

हिजो-आज सम्बन्ध विच्छेदका खबरहरु धेरै नै सुनिन थालिएको छ । श्रीमान्- श्रीमतीबीच सानो मनमुटावले पनि सम्बन्ध विच्छेद भएको हुन्छ । तर के सम्बन्ध विच्छेद नै सबै समस्याको हल हो त ?
आफ्नो वैवाहिक जीवनबाट असन्तुष्ट भएर सम्बन्ध विच्छेद गर्दा त्यो समयमा आफु वैवाहिक बन्धनबाट मुक्त भएको आभास होला ।

तर, के सम्बन्ध विच्छेदपछि जीवन सहज हुन्छ ? के जीवनमा पहिलेको जस्तो खुशी फर्कीएर आउँछ ? यदि तपाईं यी कुराहरु सोच्नु हुन्छ भने तपाईं शत प्रतिशत गलत हुनुहुन्छ । त्यसैले सम्बन्ध विच्छेदको निर्णय लिनु अगाडि त्यसपछि आउने परिस्थितिहरुको बारेमा पनि विचार गर्नु अत्यन्त आवश्यक छ ।

श्रीमान्-श्रीमतीबीच केही गलत भएर नै सम्बन्ध विच्छेद हुन्छ । एक-अर्का प्रतिको मनमुटावले स-साना कुरामा झगडा भैरहनु सामान्य कुरा हो । यसबाहेक आर्थिक समस्या, आफ्ना सन्तानको लालन-पालनको समस्या जस्ता कारणहरुले पनि दम्पत्तिहरुबीच झगडा हुने गर्दछ । मनमुटाव हुने कुराहरुले गर्दा नै तपाईलाई अब अगाडिको जीवन एक-अर्कासंग बिताउन सकिंदैन कि जस्तो लाग्छ । यसबाटै तपाईं आफ्नो वैवाहिक जीवन टुंगाउन बाध्य हुनुहुन्छ ।

दुवैले सम्झौता गर्न नसक्नु अथवा मानसिक रुपमा डिस्टर्बको अनुभव गरेर अलग हुनु नै समस्याको हल हो भन्ने सोच्नु हुन्छ भने सम्बन्ध विच्छेदको क्रममा हुने कानूनी, सामाजिक र भावनात्मक समस्याहरुको सामना गर्न पनि तयार हुनु पर्छ, जुन त्यति सहज हुँदैन । यदि विवाहित जोडिले विवाहलाई यातनाको रुपमा लिन्छन् भने त्यसबाट छुट्कारा पाउन पनि धेरै नै यातनाको सामना गर्नु पर्छ भन्ने कुरा बिर्सनु हुँदैन ।

आफैंलाई मूल्यांकन गर्नुहोस्

तपाईलाई कुन कुराले पिरोलिरहेको छ भन्ने कुरा सम्बन्ध विच्छेद गर्नु अगाडि नै सोच्नु पर्छ । त्यो कुरालाई सुर्धान सकिन्छ कि ? तपाईं आफुले आफुलाई पनि मूल्यांकन गर्नुहोस् । जुन कुराले तपाईं सम्बन्ध विच्छेद गर्न लाग्नु भएको छ, त्यो कुरा केहि समयको लागि मात्र हो कि ? समयसँगै समस्या आफैं टाढा हुन्छ कि भन्ने कुरा सम्बन्ध विच्छेद गर्नु अगाडि सोच्नुपर्छ । सम्बन्ध विच्छेदपछि तपाईं पुनः एक पटक नयाँ सम्बन्ध गाँस्न तयार हुनुहुन्छ ? तपाईका बालबालिकालाई यसको कस्तो प्रभाव पर्छ ? के तपाईंको यो निर्णयमा तपाईंका बालबालिकाको समर्थन छ ? यी कुरामा पनि विचार पुर्‍याउनु पर्छ ।

केही व्यक्तिहरु हतारमा केही पनि नसोचि विवाह बन्धनमा बाँधिन्छन् र केही समयपछि आफुहरु एक-अर्काको लागि बनेको होइन भन्ने अनुभव गर्दै सम्बन्ध विच्छेद गर्छन् ।

त्यस्तै कोही व्यक्ति विवाह गरेको केही दशकसम्म संगै बसेर आफना सन्तानहरुलाई सेटल गराउँछन् र अब संगै बस्नु पर्ने कुनै बाध्येता छैन भन्ने सोच्छन् र अलग हुन्छन् ।

किन हुन्छ विच्छेद ?

आफ्नो साथीलाई धोका दिनु सम्बन्ध विच्छेदको महत्वपुर्ण कारण हो । केही दम्पतीलाई आफुहरुबीच पहिले जस्तो मायाप्रेम नभएको जस्तो लाग्छ । पैसा र विचारहरुमा मतभेदका कारण पनि दम्पतीहरुका बीचमा झगडा भैरहन्छ । कतिपय दम्पतीलाई जीवनमा अन्य केही कुराको आवश्यकता भएको अनुभव हुन्छ, जसका कारण उनीहरु आफ्नो सम्बन्धमा कुनै पनि किसिमको सम्झौता गर्न चाहाँदैनन् र अलग हुन खोज्छन् ।

आजभोलि प्रोफेशनल स्तरमा महिला र पुरुषको बढ्दो महत्वाकांक्षाहरुका कारण पनि धेरै सम्बन्ध विच्छेद भैरहेको देखिन्छ । धेरै प्रोफेशनल दम्पतीको प्राथमिकता परिवार र सम्बन्धभन्दा पनि आफ्नो करियरप्रति बढि हुनु पनि सम्बन्ध विच्छेदको अर्को कारण हो ।

उनीहरुलाई आपसमा कुरा गर्ने फुर्सद पनि हुँदैन । उनीहरु काम र परिवारबीच सन्तुलन मिलाउन सक्दैनन् । दुबैमा आर्थिक स्वतन्त्रताका कारण एक-अर्कामा कम निर्भर हुनु पनि कारण हो । सहनशिलताको अभाव हुनु सम्बन्ध विच्छेदको अर्को महत्वपुर्ण कारण हो ।

यदि तपाईले सम्बन्ध विच्छेद गर्न लाग्नु भएको छ भने एउटा कुरा सधैं याद राख्नु होला । वैवाहिक जीवनले नै तपाईहरु दुबैलाई बाँधेर राखेको हुन्छ र यो सम्बन्ध विच्छेद भयो भने सबै भताभुङ्ग हुन्छ भन्ने कुरालाई पनि ध्यान दिनु पर्छ । सम्बन्ध विच्छेद पछि तपाईलाई समाजले हेर्ने दृष्टिकोण पनि फरक हुन्छ भन्ने कुरा बिर्सनु हुँदैन ।

के तपाई परिवर्तनको लागि तयार हुनुहुन्छ ?

सम्बन्ध विच्छेदपछि हुने हरेक परिर्वतनको सामना गर्न तपाईं तयार हुनुहुन्छ ? सम्बन्ध विच्छेद जीवनको महत्वपुर्ण मोड हो, जुन सुखदायी पनि हुनसक्छ अनि दुखदायी पनि । त्यसैले हतारमा निर्णय लिनु भन्दा सोचेर मात्र निर्णय गर्नु बुद्धिमानी हुन्छ ।

सम्बन्ध विच्छेदको अर्थ परिर्वतन पनि हो । कुनै पनि किसिमको परिवर्तनको सामना गर्न त्यति सहज छैन । सम्बन्ध विच्छेदपछि पहिलाको जीवन सम्झेर रुनु परेमा अथवा बितेका जीवन सम्झेर अपराधबोध हुने जस्ता धेरै कुराहरु हुन्छन् । जसले तपाईलाई आफ्नो निर्णय गलत लाग्न थाल्छ । यदि तपाईं सम्बन्ध विच्छेद गर्ने स्थितीमा पुग्नु नै भएको छ भने आफ्नो जीवनमा आउने परिवर्तनको बारेमा राम्रोसंग सोचेर मात्र निर्णय लिनु होला ।

लिस्ट बनाउनुहोस्

सम्बन्ध विच्छेद गर्नु पर्ने कारणहरु के-के हुन्, ती सबै कारणहरुको लिस्ट बनाउनु होस् । आफ्नो सम्बन्धका राम्रा-नराम्रो सबै कुराहरु त्यसमा लेख्नुहोस् । अर्को पक्षको कमिलाई मात्र ध्यान नदिनुहोस् । केही कमि त तपाईं आफुमा पनि हुन सक्छ । सम्बन्ध विच्छेदपछि व्यक्ति एक्लो हुन्छ । त्यो समयमा आफ्ना साथी अथवा आफन्तको साथ र सहयोग हुनु पनि आवश्यक छ, जहाँ उसले आफ्ना सबै कुरा खुलेर भन्न गर्न सकोस् । आवश्यक परेमा थेरापिस्ट कहाँ पनि जान सकिन्छ, तर तनावग्रस्त भएर बाँच्नु हुँदैन ।

व्यवहारिक सोचको खाँचो

सम्बन्ध विच्छेदपछि आर्थिक समस्या पर्न थाल्छ । एउटा अध्ययनले सम्बन्ध विच्छेदपछि सिर्जना हुने आर्थिक समस्याले महिलाको जीवनस्तरमा ३० प्रतिशत र पुरुषको १० प्रतिशत गिरावट आएको पत्ता लगाएको छ । महिला सम्बन्ध विच्छेद पछिको जीवनका लागि जति तयार भएता पनि आर्थिकस्तरमा आफुलाई अक्षम नै अनुभव गर्छिन् । त्यसैले सकेसम्म सम्बन्ध विच्छेदको बाटो रोज्नु भन्दा भावनालाई बसमा राखेर ब्यावहारिक सोच राख्नुहोस् ।

सम्बन्ध विच्छेदपछि हुने लाभभन्दा त्यसबाट हुने हानीलाई ध्यान दिनुहोस् । यदि तपाई आत्मनिर्भर हुनु हुन्न भने अलग भएर पनि तपाई पुन अरुमा निर्भर हुनु पर्छ, जसले तपाईको आत्मसम्मानमा ठेस लाग्न सक्छ ।

सम्बन्ध विच्छेदले तपाईका सन्तानहरुलाई गहिरो असर पर्न सक्छ । उनीहरुका लागि आमा- बुबा दुबै उत्तिकै महत्वपुण्र्ँ हुन्छन् । आमा-बुवा अलग हुँदा उनीहरुको विश्वासमा चोट पुग्छ, जसका कारण उनीहरु नकारात्मक सोच्न थाल्छन् ।

केही प्रश्न आफ्नो लागि

-के आफ्नो साथीको लागि अहिले पनि तपाईको मनमा भावना छ ? यदि छ भने आफ्नो सम्बन्ध बचाउने कोशिश गर्नुहोस् ।

-के तपाई समाजको डरले मात्र सँगै बसिरहनु भएको हो ?

-के तपाई साँच्चै नै सम्बन्ध विच्छेद गर्न चाहानु हुन्छ ? कि यो झगडा पर्दा धम्क्याउने तरिका मात्र हो । यदि यस्तो भने यसले झन् भयानक रुप लिन सक्छ ।

-के तपँई शारीरिक, मानसिक, आर्थिक र भावनात्मक रुपले सम्बन्ध विच्छेद गर्न तयार हुनु हुन्छ ?

-के तपाईले यसको नकारात्मक परिणामको बारेमा सोचिसक्नु भएको छ ?

सम्बन्ध विच्छेदले तपाईको धेरै कुरामा कमि ल्याउन सक्छ साथै तपाईको कति सपना टुट्न पनि सक्छ ।

-के तपाईलाई साथ दिने कोहि छ ? के आफ्ना सन्तानलाई सम्झाउन र उनीहरुको दुःख कम गर्न सक्षम हुनुहुन्छ ?

-के तपाई आफ्नो करियर र निजी जिन्दगीमा तालमेल मिलाउन सक्नुहुन्छ ?

सम्बन्ध विच्छेदपछि तपाईले आफुलाई नयाँ अनुभव, नयाँ सम्बन्ध र नयाँ चिजहरुलाई नयाँ रुपले लिनका लागि तयार पार्नु पर्छ । अर्को विवाह गरेर खुशी र सुखी हुन्छु भन्ने भ्रममा नपर्नुहोस् । तपाईको दोस्रो विवाह सफल हुन्छ नै भन्ने के ग्यारेन्टी छ ? तपाईको नयाँ साथी पहिलाको तुलनामा राम्रो नै पर्छ भन्ने कुराको पनि कुनै ग्यारेन्टी हुँदैन ।

Continue Reading…

विषादी परीक्षण रोक्ने भारतको पत्रबारे प्रधानमन्त्री– म भ्रममा रहेछु

२६ असार, काठमाडौं । प्रधानमन्त्री केपी शर्मा ओलीले आयातित फलफूल र तरकारीको विषादी परीक्षण रोक्न भारतीय पक्षले पठाएको पत्रबारे आफूले पछिमात्र थाहा पाएको दाबी गरेका छन् । भारतीय पक्षले पठाएको पत्रबारे आफूलाई सुरुमा थाहै नदिएर गुमराहमा राखिएको उनको भनाइ थियो ।

नेपाल टेलिभिजनबाट प्रसारित ‘जनतासँग प्रधानमन्त्री’ कार्यक्रममा प्रधानमन्त्री ओलीले भने, ‘मलाई पछि मात्र थाहा भयो र त्यससम्बन्धमा भारतले कूटनीतिक प्रयासहरू र विभिन्न ठाउँमा संवादहरू अघि बढाएको रहेछ । त्यो कुराबाट पनि मलाई अनभिज्ञ नै राखियो ।’

प्रधानमन्त्रीको हैसियतमा आफूले त्यसबारे जानकारी पाउनुपर्नेमा कर्मचारी पंक्तिले भ्रममा राखेको हुनसक्ने ओलीको आशंका छ ।  ‘जानेर या नजानेर दुवै कारणले कर्मचारी पंक्तिबाट यस्तो भएको हुनसक्छ । र, मलाई जसले जानेर भ्रममा राख्यो वा अन्जानमा बताउन भुल्यो, जेसुकै होस् मसँग त्यो कुरा आएन र मैले प्रधानमन्त्रीको हैसियतमा त्यो जानकारी पाउनुपथ्र्यो ।’

राजपत्रमा सूचना प्रकाशित गरी सरकारले खासगरी भारतबाट आयातीत तरकारी र फलफूलको विषादी परीक्षण गरेर मात्र नेपाल भित्राउन सुरु गरेको थियो । सोही निर्णयअनुसार कृषि मन्त्रालयले नाकामा कडाइ ग‍रेपछि । भारतले पत्र पठाएरै र कर्मचारीहरुलाई भेटेर विषादी परीक्षण नगर्न दबाव दिएको थियो । त्यससम्बन्धी समाचार प्रकाशित भएपछि प्रधानमन्त्री ओलीले भारतबाट कुनै प्रकारको दबाव नआएको बरु विषादी परीक्षण गर्ने प्रयोगशाला नभएको सार्वजनिक अभिव्यक्ति दिएका थिए । कृषि मन्त्रालयले नाकामा कडाइ गरिरहेको बेला प्रयोगशाला नभएको भन्दै मन्त्रिपरिषदले नै विषादी परीक्षण नगर्ने निर्णय गरेको थियो ।

त्यसको सर्वत्र आलोचना भइरहेको बेला कृषि मन्त्री चक्रपाणि खनालले विषादी परीक्षणको क्षमता सरकारसँग भएको भनेर खण्डन मात्र गरेनन्, परीक्षण रोक्न भारतीय दूतावासले पठाएको पत्र नै अनलाइनखबरमार्फत सार्वजनिक भयो ।

पत्र सार्वजनिकपछि सरकार आलोचित बनिरहेका ओलीले भारतबाट आएको पत्रबारे समयमै जानकारी नपाउँदा आफूले ‘भारतीय पक्षबाट कुनै दबाव नआएको’ भनेर बोलेको प्रष्टीकरण टेलिभिजन कार्यक्रममार्फत् दिएका हुन् ।

पार्टी संसदीय दलको असार २१ को बैठकमा यो विषय उठेपछि भारतीय पक्षबाट कुनै दबाव नआएको दाबी गरेका ओलीले २३ गते मात्रै त्यससम्बन्धी पत्र पाएको जिकिर गरेका छन् ।

‘मेरो जानकारीमा नभएको हुनाले मैले पत्र आएको छैन भनेँ । तर, २३ गते बेलुका मात्र मैले पत्र आएकोबारे जानकारी पाएँ’, प्रधानमन्त्री ओलीले जनतासँग प्रधानमन्त्री कार्यक्रममा विषादी परीक्षण रोकिएकोबारे सोधिएको जिज्ञासाको जवाफ दिँदै भनेका छन्, ‘म त्यसबाट दुखित छु । यथार्थ मबाट लुकेको रहेछ ।’

नेपाल उत्पादितभन्दा भारतमा उत्पादित तकारीहरुमा बढी विषादी प्रयोग हुने गरेका समाचारहरु पनि सार्वजनिक भइरहेका छन् ।

तरकारीको विषादी परीक्षण भारतीय दबावमा रोकेपछि नागरिकको स्वास्थ्यमाथि खेलबाड गरेको भन्दै सरकारको चर्को आलोचना भइरहेको छ । सर्वोच्चले भने सीमामा विषादी परीक्षण रोक्ने निर्णय कार्यान्वयन नगर्न सरकारलाई अन्तरिम आदेश दिइसकेको छ ।

Continue Reading…

‘दबंग ब्वाई’ प्रभू देवाको गीतमा नाचेपछि….

बलिउड अभिनेता सलमान खान यतिबेला आफ्नो नयाँ फिल्म ‘दबंग-३’ को काममा व्यस्त छन्, जसलाई प्रभु देवाले निर्माण गरिरहेका छन् । उक्त फिल्मलाई यो वर्षकै बहुप्रतिक्षित फिल्मको सूचीमा राखिएको छ ।

दबंग-३ मा साउथ इन्डियन स्टार सुदीप खलनायकको भूमिकामा देखिंदैछन् । फिल्ममा सोनाक्षी सिन्हा तथा अरबाज खान आफ्ना पुराना चरित्र रज्जो तथा मख्खनचन्द पाण्डेको रुपमा देखिने छन् ।

यसैबीच सलमान खानले दबंग ३ का निर्देशक प्रभु देवाको अघिल्लोतिर उनको पुरानो फिल्मको एउटा लोकप्रिय गीतमा आकर्षक नृत्य गरेको भिडियो इन्टाग्राममा भाइरल भएको छ ।

सलमानले प्रभु देवालाई आफ्नो डान्स गुरु मान्दै ‘उर्वसी…’ गीतमा आकर्षक नृत्य गरेका हुन् । सलमानले नृत्य गरिरहेको भिडियो इन्स्टाग्रँममा अपलोड गरेका थिए, जसलाई सलमानका लाखौं फ्यानहरुले मन पराएका छन् ।

दबंग-३ को छायांकनको व्यस्तताका बीच सलमानले यो रमाइलो नृत्यसहितको भिडियो अपलोड गर्न भ्याएका हुन् ।

Continue Reading…

देशभर भारी वर्षाको सम्भावना, हवाई र सडक यातायातमा अवरोध आउन सक्ने

२६ असार, काठमाडौं । बिहीबार र शुक्रबार देशभरका साना तथा ठूला नदीहरुमा बाढीको उच्च सम्भावना रहेकाले पूर्वतयारी र प्रतिकार्यमा जुट्न सरकारले आह्वान गरेको छ ।

विशेषगरी तराई, सिवालिक र मध्य पहाडी क्षेत्रमा आगामी २०–३६ घण्टासम्म भारी वर्षा हुने अनुमान छ । जसका कारण नदी तथा खोलाहरुमा ठूलो बाढी आउने छ । तराईका कन्काई र कमला नदीमा पनि पानीको सतह खतराको लेभलभन्दा माथि पुग्ने चेतावनीसमेत दिइएको छ ।

नेपाल बाढी सूचनाले सचेत पार्दै भनेको छ, ‘प्रदेश १, २, ३, गण्डकी प्रदेश, प्रदेश ५ तथा सुदूरपश्चिम प्रदेशका तराईको भूभागबाट बहने साना तथा मझौला नदीहरूमा बाढीको उच्च सम्भावना, पूर्वतयारी र प्रतिकार्यमा जुटौं ।’

जल तथा मौसम विज्ञान विभागका अनुसार बिहीबार र शुक्रबार देशभर वर्षाको सम्भावना छ । विहीबार राति केही स्थानमा ‘अति भारी’ वर्षा हुने पूर्वानुमान छ ।

आगामी २४ घण्टाका लागि चेतावनी जारी गर्दै मौसमविदले हवाई र सडक यातायातमा अवरोध आउने बताएका छन् ।

मौसमी बुलेटिनमा लेखिएको छ, ‘नदीहरुमा जलको बहाव, स्तर बढ्न सक्ने र पहाडी क्षेत्रहरुमा पहिरोहरुको जोखिम बढ्न सक्ने भएकोले उच्च सतर्कता अपनाउनुपर्ने देखिन्छ । साथै, हवाई तथा सडक यातायातमा समेत अवरोध आउन सक्नेछ ।’

हाल मनसुन न्यूनचापीय रेखा नेपालको नजिक रहेकाले हाल देशभर पूर्ण बदली रही मध्य र पूर्वका केही स्थानहरु तथा पश्चिम क्षेत्रको धेरैजसो स्थानहरुमा मनसुनी वर्षा जारी छ । आगामी २४ घण्टासम्म पनि मनसुन न्यूनचापीय रेखा नेपालको पूर्वदेखि पश्चिम तराई भूभागमा रहीरहने मौसमविदले बताएका छन् ।

Continue Reading…

संजय लीला भन्साली र अक्षय एकसाथ, बन्ने भो राउडी राठौर-२

बलिउडमा अहिले रिमेक र सिक्वेलको सिलसिला चलेको छ । हलमा यतिबेला ‘कबीर सिंह’ चलिरहेको छ, जुन दक्षिण भारतिय चलचित्र ‘अर्जुन रेड्डी’को रिमेक हो ।

सन् २०१२ मा यस्तै रिमेक बनेको थियो, राउडी राठौर । अक्षयकुमार स्टारर यो चलचित्र दक्षिण भारितय चलचित्रको रिमेक थियो । राउडी राठौरलाई प्रभु देवाले निर्देशन गरेका थिए । अहिले यही चलचित्रको सिक्वेल बन्ने खबर आएको छ ।

अतः यसको सिक्वेलले निर्देशक सञ्जय लीला भन्साली र ‘खिलाडी ब्वाई’ अक्षयकुमारलाई एकै ठाउँ उभ्याउनेछ । भनिहालौं, राउडी राठौरका निर्मातामध्येका एक थिए सञ्जय लीला भन्साली । अहिले आएर पुनः एक पटक अक्षय र भन्सालीको जोडीले राउडी राठौर झैं कमाल गर्ने भएका हुन् । भन्साली र अक्षयले उक्त फिल्मको सिक्वेल बनाउने योजना बनाएका हुन् ।

सिक्वेलको योजना विगत लामो समयदेखि बनिरहेको बताइन्छ । तर, अक्षयको व्यस्त सेड्यूलका बीच त्यो यसअघि निमर्ँण हुन सम्भव भएको थियो । भन्साली स्वयं पनि अक्षयको फुर्सदको क्ष्ँणको प्रतिक्ष्ँा गरिरहेका थिए । अहिले आएर यो फिल्म बन्ने निश्चित प्रायः भएको हो । अक्षयले आफ्नो फिलम प्याडम्यानको एउटा इभेन्टका क्रममै राउडी राठौर-२ मा अभिनय गर्ने चाहना व्यक्त गरेका थिए । अहिले आएर अक्षयको चाहना पुरा हुने देखिएको हो ।

एउटा समाचारमा जनाइए अनुसार उक्त फिल्मको छायांकन २०२० मा प्रारम्भ हुने छ । यद्यपि, यो फिल्मको निर्देश्ँन कसले गर्ने भन्ने बारेमा अहिलेसम्म निश्चित भएको छैन ।

यसैबीच, अभिनेता अक्षय कुमार यही वर्षको अगष्ट १५ का दिन नयाँ फिल्म ‘मिशन मंगल’ मार्फत दर्शकमाझ आउँदैछन् । हालै मात्र उक्त फिल्मको टिजर सार्वजनिक भएको थियो । यसबाहेक उनी रोहित शेट्टीको सूर्यवंशीको छायांकनमा व्यस्त छन् । सूर्यवंशीबाहेक अक्षय कुमार लक्ष्मी बम, हाउसफूल ४ तथा गुड न्यूजमा पनि देखिने छन् ।

Continue Reading…

आजका पत्रपत्रिका : सँगै चियापान, अनि गोली हानाहान

२६ असार, काठमाडौं । भोजपुर भिडन्त र विषादी परीक्षणबारे सर्वोच्चले दिएको अन्तरिम आदेश आजका मुख्य दैनिक पत्रिकाहरूको पहिलो प्राथमिकतामा परेको छ । यसबाहेक ‘असारे विकास’, बाढीपहिरोको जोखिम, सरकारी अस्पतालको बेथितिलगायत विषयमाथि पनि पत्रिकाहरूले नजर लगाएका छन् ।

कान्तिपुरले ‘सँगै चियापान, अनि गोली हानाहान’ शीर्षक दिएर भोजपुर घटनाबारे मुख्य समाचार बनाएको छ । सँगै चियापान गरेका प्रहरी र विप्लव कार्यकर्ताबीच पछि गोली हानाहान भएको समाचारको सार छ ।

कान्तिपुर लेख्छ–सँगै चियापान गरिरहेका नीरकुमार राई पिसाब गर्न जाने भन्दै पसलबाट निस्किन खोजे । सञ्जीव राईले नीरकुमारको पाखुरा समाते । गफ गरौं । अरु साथी आउँदै छन् । दुवैबीच तानातान भयो । चन्द समूहका हतियार बोकेका कार्यकर्ता दगुर्दै होटल अघिल्तिर आए । त्यतिबेला तानातानकै क्रममा नीरकुमार र सञ्जीव होटल बाहिर पुगिसकेका थिए । चन्द्र समूहका कार्यकर्ताले गोली प्रहार गरे । त्यति नै बेला घटनास्थल आइपुगेको हतियारधारी प्रहरीले पनि गोली प्रहार गरे ।’

विषादी परीक्षण रोक्न सर्वोच्चले गरेको आदेश र भारतीय दबावबारे प्रधानमन्त्रीले व्यक्त गरेको भनाइलाई पनि कान्तिपुरले पहिलो पृष्ठमा प्राथमिकतापूर्वक समेटेको छ । कान्तिपुरका अनुसार, प्रधानमन्त्री केपी शर्मा ओलीले विषादी परीक्षण रोक्नका लागि भारतीय दूतावासले पठाएको पत्रबारे आफूलाई सरकारी निकायले अनभिज्ञ राखेको बताएका छन् ।

यसअघि उद्योग मन्त्री मात्रिका यादवले पनि यस्तै प्रतिक्रिया दिएका थिए ।

समाचार अनुसार भारतीय दूतावासले विभिन्न संवाद गर्दै हिँडेको र पत्र पठाएकोबारे २३ गते मात्र जानकारी प्राप्त गरेको प्रधानमन्त्री ओलीले जिकिर गरेका छन् ।

‘मलाई पछि मात्र थाहा भयो र त्यससम्बन्धमा भारतले कूटनीतिक प्रयासहरू र विभिन्न ठाउँमा संवादहरू अघि बढाएको रहेछ । त्यो कुराबाट पनि मलाई अनभिज्ञ नै राखियो । तसर्थ मेरो जानकारीमा नभएको हुनाले मैले पत्र आएको छैन भनेँ । तर, २३ गते बेलुका मात्र मैले पत्र आएकोबारे जानकारी पाएँ । म त्यसबाट दुखित छु’, प्रधानमन्त्री ओलीले जनतासँग प्रधानमन्त्री कार्यक्रममा विषादी परीक्षणबारे दिएको प्रष्टीकरण कोट गर्दै कान्तिपुरले लेखेको छ, ‘र, मलाई जसले जानेर भ्रममा राख्यो वा अन्जानमा बताउन भुल्यो, जेसुकै होस् मसँग त्यो कुरा आएन र मैले प्रधानमन्त्रीको हैसियतमा त्यो जानकारी पाउनुपथ्र्यो । यथार्थ मबाट लुकेको रहेछ ।

अन्नपूर्णले असारेविकासमाथि केन्द्रित भएर सामग्री छापेको छ । अन्नपूर्णका अनुसार आर्थिक वर्ष सकिनै लाग्दा सरकारको दैनिक विकास खर्च अत्यधिक बढ्दै गएको छ । महालेखा नियन्त्रण्क कार्यालयले असार १५ पछि दैनिक एक अर्ब रुपैयाँ हाराहारीमा खर्च हुँदै आएकोमा मंगलबार र बुधबार दैनिक पाँच अर्ब रुपैयाँभन्दा बढी खर्च भएको जनाएको छ ।

भवन भासिँदा भारतको कर्नाटक राज्यको राजधानी बैंगलोरमा एकै परिवारका तीन नेपालीको मृत्यु भएको दुःखद् खबरलाई पनि अन्नपूर्णले पहिलो पृष्ठमा स्थान दिएको छ । मृत्यु हुनेमा बझाङको थलारा गाउँपालिका–२ बगाडाका २८ वर्षीय नारायण खड्का, उनकी पत्नी २६ वर्षीया निरु र चार वर्षीया छोरी अनुष्का छन् ।

Continue Reading…

Tuesday, July 9, 2019

बनेपा ‘सिरिन्ज’ प्रकरणमा दुवै पक्षको विज्ञप्ति– परिस्थितिजन्य घटनाप्रति दुःखी छौं

२५ असार, काठमाडौं । बनेपाको कथित सिरिन्ज प्रकरणमा जोडिएका दुवै पक्षले मेलमिलाप गरेका छन् । उनीहरुले घटनाप्रति दुःख व्यक्त गर्दै सबैमा संयम हुनसमेत आग्रह गरेका छन् ।

बनेपास्थित चारदोबाटोमा गत सोमबार युवतीमाथि सिरिन्ज आक्रमण भएको हल्लाकै भरमा वालिङ न.पा १३, स्याङ्जाका खगेन्द्रपसाद पाठकमाथि भीडले कुटपिट गरेको थियो । कुटपिटपछि प्रहरीले युवकलाई नियन्त्रणमा लिएर आरोपबारे छानबिन गरेको थियो ।

तर, अनुसन्धानका क्रममा युवकमाथि लगाइएको आरोप निराधार भएको पुष्टि भएको छ । उनी निर्दोष सावित भएपछि मंगलबार नै प्रहरीबाट थुनामुक्त भइसकेका छन् ।

कथित सिरिन्ज प्रकरणलाई लिएर बनेपालगायतका क्षेत्रमा त्रास फैलिरहेका बेला दुवै पक्षले घटना निराधार भएको भन्दै दुःख व्यक्त गरेका छन् ।

यो प्रकरणमा जोडिएका पाठक, वेथानचोक गाउँपालिका–६ काभ्रेपलाञ्चोककी मनीषा तामाङ र चौरीदेउराली गाउँपालिका–५ कि सपना वागदासले मंगलबार संयुक्त विज्ञप्ति जारी गर्दै घटनाप्रति दःख व्यक्त गरेका हुन् ।

‘सिरिन्ज आक्रमण गरिएको भनी लाञ्छनासमेत लाग्न गई उत्पन्न भीडबाट सिर्जित परिस्थितिजन्य घटनाप्रति दुवै पक्ष खेद प्रकट गर्दछौं,’ पाठक, तामाङ र वागदास तीनै जनाले निकालेको संयुक्त विज्ञप्तिमा भनिएको छ, ‘शंकाको भरमा आगामी दिनमा समेत कुनै सामाजिक दुर्घटना नहोदोरिउन भन्दै सबैमा संयमताका साथ शान्ति सुरक्षालाई मजबुत बनाइ राख्न अपिल गर्दछौं ।

Continue Reading…

प्रशासकीय अदालत गठन नगर्ने प्रस्ताव कानुन समितिबाट अस्वीकार

२५ असार, काठमाडौं । राष्ट्रियसभाको विधायन समितिबाट पारित भइसकेको प्रशासकीय अदालत गठनसम्बन्धी विधेयक प्रतिनिधिसभाको कानुन समितिले संशोधनसहित पारित गरेको छ ।

कानुन न्याय तथा मानवअधिकार समितिको बुधबार बिहान बसेको बैठकले केन्द्रमा एउटा प्रशासकीय अदालत रहने गरी विधेयक संशोधन गरेको हो ।

यसअघि राष्ट्रियसभाको विधायन समितिले केन्द्रमा र प्रदेशमा बेन्चमात्र रहने व्यवस्थासहित विधेयक पारित गरेको थियो । राष्ट्रियसभामा प्रस्तुत गरिएको विधेयकको मस्यौदामा भने केन्द्रमा बेन्च एउटा प्रशासकीय अदालत रहने र प्रदेशमा उच्च अदालतमा बेन्च रहने प्रस्ताव थियो ।

प्रतिनिधिसभा अन्तर्गतको कानुन न्याय तथा मानवअधिकार समितिका सभापति कृष्णभक्त पोखरेलले केन्द्रमा प्रशासकीय अदालत रहने व्यवस्था राख्दै प्रदेशमा बेन्च रहने व्यवस्था हटाएर विधेयक पारित गरेको जानकारी दिए ।

तर २ सयभन्दा बढी मुद्दा भएको अवस्थामा प्रदेश प्रशासकीय अदालत नै गठन गर्ने र कम भएको अवस्थामा अदालत आवश्यक छैन भनेर प्रश्न उठाउन नपाइने गरी संशोधन गरिएको’ पोखरेलले जानकारी दिए ।

समिति सभापति पोखरेलले राष्ट्रियसभाबाट संशोधन गरेर पठाइएको विधेयक जस्ताको तस्तै पारित गरेको भए कार्यालय, जनशक्तिलगायतको व्यवस्थापनको झन्झटलाई आफूहरुले रोकेको दाबी गरे ।

बुधबार पारित विधेयकमा प्रशासकीय अदालतको मुकाम काठमाडौं उपत्यकामा रहने र सो अदालतको प्रादेशिक क्षेत्राधिकार नेपालभर रहने उल्लेख छ । अदालतको प्रादेशिक क्षेत्राधिकार न्याय परिषदको परामर्शमा नेपाल सरकारले राजपत्रमा सूचना प्रकाशन गरी तोके बमोजिम हुने छ ।
यो पनि पढ्नुहोस प्रशासकीय अदालत कि इजलास ? राष्ट्रियसभाको संशोधनले प्रतिनिधिसभामा असन्तुष्टि

निजामती कर्मचारीसँग सम्बन्धित मुद्दाहरु हेर्ने गरी प्रशासकीय अदालत गठनको व्यवस्था गरिएको छ ।

अदालतको अध्यक्ष र सदस्यको पदावधि पाँच वर्षको हुने छ । अध्यक्ष र सदस्यलाई दुई पटकभन्दा बढी अवधिको लागि अध्यक्ष तथा सदस्य पदमा नियुक्त गरिने छैन ।

अध्यक्षको सामान्य निर्देशन र नियन्त्रणमा रही अदालतको प्रशासकीय प्रमुखको रुपमा काम गर्न न्याय सेवाको राजपत्रांकित प्रथम श्रेणीको एक जना रजिष्ट्रारको व्यवस्था पनि गरिने छ ।

Continue Reading…

विप्लव समूहको गोलीबाट प्रहरीको मृत्यु, विप्लवका कार्यकर्ताको पनि मृत्यु

२५ असार, काठमाडौं । भोजपुर सदरमुकाममा एक प्रहरी र विप्लव समूहका कार्यकर्ताको भिडन्तमा मृत्यु भएको छ ।

यो घटनाको भोजपुर सदरमुकामको हटिया लाइनमा भएको हो । घटनाको विस्तृत विवरण आउन बाँकी छ ।

Continue Reading…

पाहुना आएका ठूलोबुवा र ससुराको चिर्पटले हानेर हत्या

२५ असार, अछाम । अछामको मंगलसेन नगरपालिका–१ मा एक व्यक्तिले आफ्नो घरमा पाहुना आएका ठूलो बुवा र ससुराको हत्या गरेका छन् । कुन्तीबण्डालीको ढुंगानी निवासी लफे भनिने पिरमकुमार साउँदले सोही ठाउँमा बस्ने ठूलोबुवा देउसिंह थापा र ससुरा विरभान थापाको मंगलबार मध्यरातमा हत्या गरेका हुन् ।

साउदलाई प्रहरीले पक्राउ गरेको छ । हत्यापछि फरार रहेका साउदलाई मंगलसेन नगरपालिका–२ को खम्बबाट पक्राउ गरेको अछाम प्रहरी प्रमुख डिएसपी जनकबहादुर शाहीले जानकारी दिए ।

घटना राति करिब एक बजेतिर भए पनि प्रहरीले बुधबार बिहानपख पौने चार बजे खबर पाएको अछाम प्रहरीको भनाइ छ । घटनाको अनुसन्धान भइरहेको डिएसपी शाहीले बताए ।

Continue Reading…

ओखलढुंगामा बस दुर्घटना, ३ को मृत्यु

२५ असार, ओखलढुंगा । ओखलढुंगामा यात्रु बस दुर्घटना हुँदा तीन जनाको मृत्यु भएको छ भने १५ जना घाइते भएका छन् ।

काँकडभिट्टाबाट सोलुखुम्बुतर्फ जाँदै गरेको मे १ ख १८९१ नम्बरको बस बुधबार बिहान ३ बजेतिर सिद्धिचरण राजमार्गअन्तर्गत मानेभञ्ज्याङ गाउँपालिका–६ डढुवामा दुर्घटना भएको हो ।

मृतक दुई जना पुरुष र एक जना महिला रहेको बताइए पनि सनाखत नभएको जिल्ला प्रहरी कार्यालय ओखलढुंगाले जनाएको छ ।

घाइते ११ जनालाई उपचारका लागि उदयपुरको घुर्मी अस्पतालमा लगिएको छ । गम्भीर घाइते ४ जनालाई भने हेलिकोप्टरबाट काठमाडौं पठाइएको प्रहरीले जनाएको छ ।

पानी परिरहेकाले बाटो चिप्लो भएका कारण बस दुर्घटना भएको प्रहरीले प्रारम्भिक अनुमान गरेको छ ।

Continue Reading…

सलमान- कट्रिनाको विवाहको दृष्य भाइरल भएपछि

सलमान खान र कट्रिना कैफको विवाह भए के होला ? कुनैबेला यस्तो अनुमान सामान्य मानिन्थ्यो । पछि उनीहरुको ब्रेकअप भयो । अहिले कट्रिना सिंगल छिन् । साथै उनी पूर्वप्रेमी सलमानकै आसपासमा छिन् ।

हालैमात्र कट्रिना सलमानको फिल्म ‘भारत’मा देखिइन् । त्यही फिल्मको एउटा भिडियो अहिले चर्चामा छ, जसमा सलमान खान तथा कट्रीना कैफ विवाह गरिरहेका छन् । उक्त भिडियो प्रशंसकहरुमाझ चर्चाको विषय बनेको छ ।

हुन पनि सलमान खानका फ्यानहरुलाई केवल दुई वटा कुराको मात्र प्रतिक्षा भैरहेको हुन्छ । एउटा हो सलमानको नयाँ फिल्म तथा अर्को हो उनको विवाह कहिले हुन्छ ?

अहिलेसम्म फिल्महरुमार्फत सलमानले आफ्ना फ्यानहरुलाई ट्रीट दिइ नै रहन्छन् । तर विवाहको लागि भने उनले लामो प्रतिक्षा गराइरहेका छन् ।

यसबीचमा सलमानको नाम थुप्रै अभिनेत्रीहरुसँग जोडिइसकेको छ । थुप्रै अभिनेत्रीहरुसँग उनको रिलेशनशीप पनि भैरहेको छ, यद्यपि विवाहको प्रसंगमा भने उनी टाढा-टाढा भागिनै रहन्छन् । वास्तविक जीव्नमा सलमान विवाहबाट भाग्ने क्रम जारी नै रहे पनि रील लाइफमा भने उनले धेरै पटक विवाह गरिसकेका छन् ।

हालैमात्र सलमानको विवाहको एउटा भिडियो सार्वजनिक भएको छ, जसले निकै चर्चा समेत पाइरहेको छ ।

सलमानका डिजाइनर एश्ले रिलेबोद्वारा शेयर गरिएको उक्त भिडियोमा सलमानले कट्रीनासंग विवाह गरिरहेको देखिन्छ भने बाँकी मानिसहरुले उनीहरुमाथि फूल वषर्ाइरहेको देखिन्छ । उक्त भिडियो सलमानको पछिल्लो फिल्म ‘भारत’ को छायांकनको बेला खिचिएको हो, जुन अहिले आएर सार्वजनिक भएको हो । प्रशंसकहरुका लागि उक्त भिडियो कुनै टि्रट भन्दा कम छैन । यद्यपि, अब हेर्नुछ सलमानले वास्तविक जीवनमा भने कहिले विवाह गर्नेछन् ?

त्यसो त स्वयं सलमानका बुवा सलीम खानले पनि यो प्रसंगमा आफ्ना छोरासंग हार मानिसकेका छन् । उनलाई पनि आफ्नो छोरा दुलाहा बनेको हेर्ने चाहाना छ ।

यतिबेला सलमान खान टेलिभिजन शो ‘नच बलिए-९’ मा व्यस्त छन् । उक्त शोको सेटबाट पनि एउटा भिडियोले चर्चा बटुलिरहेको छ, जसमा सलमानले आफ्नो विवाहदेखि लिएर पूर्व प्रेमिकाहरुसंगका फिल्महरुको बारेमा कुराकानी गरेका छन् ।

उक्त भिडियोमा सलमानले भनेका छन्-‘हरेक व्यक्ति मलाई मर्डर मिस्ट्री सम्झेर त्यसलाई समाधान गर्नका लागि अघि बढ्छन् । जीवनमा मैले अहिलेसम्म के-के सुनें होला । आफ्नो विवाहको जिज्ञासा गर्ने पत्रकारसँग सलमान पुनः भड्किए, के सलमानको आगामी फिल्ममा उनकै कुनै एक्स हुनेछिन् ?’

Continue Reading…

कागको पछि दौडने हामी !

उहिले पुर्खाहरुले ठिकै भने, ‘आफ्नो कान छाम्नु छैन, कागको पछाडि दौडने ।’ अहिलेको पुस्ताले यो उखानलाई अधकल्च बुझेका होलान् । खास कुरो यस्तो छ ।

‘कागले कान लग्यो, कान लग्यो ।’ मान्छेहरु कराउँछन् । काग आकासतिर बत्तिएर उडिरहेको छ । सबै कागलाई लखेट्न पछि-पछि दौडन्छन् । कागले कसको कान लग्यो ? कसैलाई थाहा छैन । सबैको कान त सही हालतमै छ ।

आफ्नो कान नछामी कागको पछाडि दौडने यो प्रवृत्ति अहिले अरु मौलाएर गएको छ ।

भर्खरै मात्र वनेपामा एक पुरुषलाई ‘सिरिन्ज आक्रमण गरेको’ भन्दै अन्धधुन्द कुटपिट गरियो । भलै, यो घटनाको सत्यतथ्य आउन बाँकी नै छ । उनी दोषी हुन् वा होइनन् ? अनुसन्धानले देखाउनेछ । अहिलेसम्मको अवस्थामा उनले सिरिन्ज आक्रमण गरेको पाइएको छैन । सार्वजनिक बसमा यात्रा गरिरहेकी एक महिलाले ‘मलाई सिरिन्ज आक्रमण भयो’ भन्दै चिच्याएपछि अरु यात्रुले उनै पुरुषमाथि हातपात गर्न थाले । लछारपछार गर्न थाले ।

त्यती मात्र होइन, उनलाई ‘सिरिन्ज आक्रमणकारी’ भन्दै मोवाइल, ट्याबबाट भिडियो खिच्नेहरु ताँती लागे । क्षणभरमै सामाजिक सञ्जालमा ति भिडियो ‘भाइरल’ भयो ।

यदि उनले अपराध गरेको हो भने त ठिकै होला ।

तर, निर्दोष सावित भए भने ? उनले सिरिन्ज आक्रमण गरेको रहेनछ भने ? उनीमाथि झुटो आरोप लागेको रहेछ भने ?

सोच्नुहोस् त, उनले बेकसुर भोगेको सजायको जवाफदेही को हुन्छ ? उनले झेलेको अपमान, पीडा, दूव्र्यवहारको जिम्मा कसले लिन्छ ? सामाजिक सञ्जालभरी उनको जुन बदनामी भयो त्यसको क्षतिपूर्ति कसले दिन्छ ? उनी स्वयम् र उनको परिवारले भोगेको मानसिक प्रातडनाको क्षतिपूर्ति कसले गर्छ ?

यी प्रश्नहरुको जवाफ हामीसँग छैन । किनभने हामी गैरजिम्मेवार छौं । हामीलाई अरुको जीवनको मूल्य थाहा छैन । त्यही कारण हामी अनावश्यक उक्साहटमा लागेर जे पनि गर्छौं, जे पनि भन्छौं । हामीमा किन यस्तो प्रवृत्ति मौलायो ? मानव हुनुको गुण किन हामीले गुमायौं ? किन हामीमा राक्षसी स्वभावले प्रवेश गर्‍यो ?

हाम्रो विवेक कता हरायो ?

कुनैपनि कुरा सही हो वा होइन ? गलत हो वा होइन ? छुट्याउनका लागि हामीले ल्याब टेस्ट गरिरहनु आवश्यक छैन । कुनै प्रयोगशालामा पुर्‍याउनु पनि आवश्यक छैन । किनभने प्रकृतिले हामीमा चेतना, विवेक दिएको छ । चेतना र विवेकले नै हामी के सही र के गलत भन्ने कुरा छुट्याउन समर्थ छौं ।

तर, आज हामी आफ्नो विवेक र चेतनाको बिर्को लगाएर हल्लाको पछाडि दौडिरहेका छौं । अरुले जे भन्छ, हामी पनि त्यही भनिरहेका छौं । अरुले जे गर्छ, हामी पनि त्यही गरिरहेका छौं ।

नेता गणेशमान सिंह उहिले यस्तै प्रवृत्तिलाई ‘भेडा’ भनेर सम्बोधन गरेका थिए । भेडाको लस्कर जब भिरमा पुग्छ, अनायसै लड्न थाल्छ । उक्त लस्करमा भएका सबै भेडा त्यसरी नै लड्छ, जसरी पहिलो भेडा लडेका थिए । अर्थात पहिलो भेडा लडेपछि दोस्रो, तेस्रो, चौथो भेडाले सोचेनन् कि यहाँ लडिन्छ भन्ने कुरा । उनीहरुको विवेक र चेतना हरायो ।

अहिले हामीले पनि आफ्नो विवेक र चेतना गुमाएका छौं । त्यसो नहुँदो हो त अरुको हल्लाको पछाडि दौडने थिएनौं । कसैले केही भन्छ, केही गर्छ भने सही के हो ? यर्थाथ के हो ? हामीले कम्तीमा विवेचना गर्नुपर्छ । मन्थन गर्नुपर्छ । भिडले गतल देखाएको कुरा गलत नै हो त ? हाम्रो विवेकले छुट्याउनुपर्छ ।

यदि हामीलाई विवेक नचाहिने भएको भए किन प्रकृतिले यसको रचना गर्ने थिए ?

सत्य के हो ? खोजौं

गौतम बुद्धको आदर्शलाई आज विश्वले अंगालेर हिँडेको छ । बुद्धिज्मलाई स्विकार्ने र अंगाल्नेको संख्या आज करोडौं छन् । यद्यपी गौतम बुद्धको भनाईको सार यस्तो थियो, ‘मैलें जे भने त्यसलाई तिमीले अकाट्य मान्नुपर्छ भन्ने छैन । आफैले पनि निरिक्षण गर्नु । जाँच गर्नु । तिमीलाई यो सही हो भने त्यसलाई अंगाल्दा हुन्छ ।’

यसको अर्थ के हो भने कसैले भनेको कुरा आँखा चिम्लेर पत्याउनुपर्छ, मान्नुपर्छ भन्ने छैन । तपाईंले आफ्नो विवेकको प्रयोग गरेर त्यसको सत्यता पहिल्याउन सक्नुहुन्छ । जब तपाईंको विवेकले सही ठहर्‍याउँछ, तबमात्र तपाईंले त्यसमाथि विश्वास गर्नुपर्छ ।

तर, आज हामी हल्लाको पछाडि दौडिरहेका छौं । त्यसको वास्तविकता के हो ? सत्यता के हो ? हामीले खुट्याउन सक्ने अवस्थामा छैनौं । अरुले जे भन्छ, त्यही कुरालाई स्विकारेर बसेका छौं ।

कवि भूपि शेरचनले त्यसैले लेखेका थिएनन्, ‘यो हल्लै हल्लाको देश हो ।’

अहिले सामाजिक सञ्जाल ‘बाँदरलाई भर्‍याङ’ भएको छ । हल्ला फैलाउने र त्यसलाई आँखा चिम्लेर अनुमोदन गर्नेहरु सामाजिक सञ्जालमा छ्यापछ्याप्ती छन् ।

हल्लाको पछाडि लागेर अन्धधुन्द गलत काम गर्नुअघि आफैलाई सोधौं, मेरो विवेक त हराएको छैन ?

Continue Reading…

के गर्दैछन् आलिया र रणबीर ?

रणबीर कपूर र आलिया भट्टको लभ-अफेयर उत्कर्षमा छ । दुबै डेडिङमा रमाइरहेका छन् । हालैमात्र उनीहरु न्यूर्योकमा थिए । न्यूर्योकमा रमाइला दिनहरु विताएपछि उनीहरु भारत फर्किएका छन् ।

मुम्बईमा पनि धेरै पटक संग-संगै देखिएका छन् । उनीहरु दुबैलाई कहिले साथीहरुसंग रेष्टुराँमा देखिएको छ भने कहिले कारमा यात्रा गरिरहेको अवस्थामा । केही दिनअघि मात्र उनीहरुलाई अर्जुन कपूरको घरमा देखिएको थियो ।

अहिले आएर यी दुबै कलाकारलाई निर्देशक लव रञ्जनको कार्यालयको बाहिर देखिएको छ । सोमबार राती उनीहरु निर्देशक रञ्जनको कार्यालयबाट बाहिरिएको देखिएको हो । उनीहरु त्यहाँ निर्देशक रञ्जनसँग नयाँ फल्मको लागि छलफल गर्न पुगेको बताइन्छ ।

रणबीरले निर्देश्ाक रञ्जनको आगामी फिल्ममा अभिनय गर्ने सम्भावना छ, जसमा अजय देवगण पनि प्रमुख भूमिकामा रहने छन् । उक्त फिल्म सन् २०२० को प्रारम्भदेखि फ्लोरमा जाने अनुमान गरिएको छ ।

उक्त फिल्ममा आलियाको भूमिका रहने अथवा नरहने बारेमा केही बताइएको छैन । यदि आलियाले पनि उक्त फिल्ममा अभिनय गरिन् भने रणबीर र आलियाका प्रशंसकहरुले रमाइलो मान्न सक्ने छन् ।
यद्यपि, समाचारहरुमा जनाइए अनुसार उक्त फिल्ममा रणबीर र अजयको अपोजिटमा दीपिका पादुकोण तथा तब्बूलाई लिइने सम्भावना अत्यधिक छ ।

त्यसो त यो फिल्मबाहेक रणबीर र आलिया निर्देशक अयान मुखर्जीको फिल्म ‘ब्रम्हास्त्र’ मा पहिलो पटक संगै देखिने निश्चित भैसकेको छ । आगामी वर्ष प्रदर्शन हुने उक्त फिल्ममा अमिताभ बच्चन पनि महत्वपूर्ण भूमिकाका प्रस्तुत हुनेछन् ।

Continue Reading…

जीवन जिउने कलाः पाँच हजार बर्ष पुरानो ग्रन्थमा यस्तो छ

काम कसरी गर्ने, भोजन कसरी गर्ने, निद्राबाट कसरी जाग्ने, कामवासनाबाट कसरी मुक्त रहने ? यही कुरा सिकाउन्छ विज्ञान भैरव तन्त्रले ।

विज्ञान भैरव तन्त्र पाँच हजार बर्ष पुरानो ग्रन्थ मानिन्छ । यस ग्रन्थमा भगवान शिवले माता पार्वतीको आत्म उपलब्धिको एक सय बाह्र सूत्र बताएका छन् । यो सूत्र वा विधी जीवन जिउने एक पद्धती हो, जीवन जिउने एक कला हो । एक तौर-तरिका हो । जीवन कसरी जिउने ?

यस सूत्रमा ‘कसरी’ एक महत्वपूर्ण शब्द हो, जुन कुरा हाम्रो जीवनबाट हराएको छ । हामीले भुल्यौं कि जीवन कसरी जिउने ? हामीले यस्तो कुरा भेटेका छैनौ कि जसले जीवन कसरी जिउने भन्ने सिकाउँछ । न हामीलाई शिक्षक-शिक्षिकाले बताए, न आमाबुवाले बताए, न जान्नेबुझ्ने अग्रजले बताए ।

तन्त्रमा भनिएको छ, हामी आफ्नो मूल स्वभावमा छैनौं । हामी आफ्नो मूल स्वभावबाट टाढा रह्यौं । हामीले आफ्नो ‘मन’लाई सुन्यौं, ‘शरीर’लाई सुनेनौं । मन त हाम्रो चौथो तला हो । शरीर नै हाम्रो पहिलो तला हो । पहिलो तला, जहाँ हामी उभिएका छौं, त्यसलाई सुनेनौं । तर, चौथो तलालाई सुनिरहेका छौं ।

हामीले आफ्नो शरीरको कुरा कहिल्यै ध्यान दिएनौं । उसले बारम्बार हामीलाई इशारा गरिरहेको छ, बारम्बार भित्रबाट भनिरहेको छ, ‘तिमीले जे खाइरहेका छौ, त्यो सही छैन । पछि दुःख पाउनेछौं ।’

हामी खानेकुरा सेवन गरिरहँदा मनमा भने अर्कै कुरामा मग्न भइरहेका हुन्छौं । अर्कै कुरा विचार गरिरहेका हुन्छौं । कसैसँग कुराकानी गरिरहेका हुन्छौं । खानेकुराको असली स्वाद कस्तो थियो ? हामी भुल्छौं । वा बेवास्ता गर्छौं । जब स्वाद थाहा पाउँछौं, त्यसबेलासम्म पेट भरिसकेको हुन्छ । तर, स्वादकै लागि हामी अरु भोजन ग्रहण गर्छौं, जुन शरीरलाई आवश्यक थिएन । शरीरले डकार्छ र संकेत गर्छ कि ‘खानेकुरा बढी भयो ।’ तर, हामी उक्त कुरामा ध्यान दिदैनौं । नतिजा के हुन्छ ? शरीरमा अनावश्यक तत्व जम्मा हुन्छ । यही कारण मोटोपन बढ्छ । मोटोपनले रोगलाई निमन्त्रणा गर्छ ।

तन्त्रले भन्छ, भोजन गर्ने हो भने कस्तो गर्ने ?

भोजन गर्दा पूर्ण स्वाद लिएर गरौं । कुनै विचार होइन, कुनै कुराकानी होइन, आफ्नो सम्पूर्ण ध्यान चपाउन र स्वाद लिनमा लगाउनुपर्छ ।

यदि ध्यान दिएर र पुरा चपाएर खानेकुरा खाने हो भने धेरै खाना खाइदैन । यसले गर्दा पाचन यन्त्रमा दबाव पर्दैन । पाचन यन्त्र चुस्त र बलियो भएपछि नै हामी धेरै किसिमका रोगबाट मुक्त हुने हो ।

तन्त्रले हाम्रो जीवन जसरी जिउनुपर्ने हो, त्यही किसिमले मार्गदर्शन गर्छ । तन्त्रले हामीलाई शरीरको भाषा सिकाउँछ । तन्त्रले भन्छ कि जो शरीरको अनुकुल हो, त्यो नैतिक हो । जो शरीरको प्रतिकुल हो, त्यो अनैतिक हो ।

तन्त्रले हामीलाई शरीरसँग जिउन सिकाउँछ । जब भोक लाग्छ, भोजन ग्रहण गरिन्छ । जब निद्रा आउँछ, सुतिन्छ, जब संगीत बज्छ नाचिन्छ । शरीरलाई यसरी स्वतन्त्रता दिनुपर्छ । स्वतन्त्रताको अर्थ उच्छृंखलता भने होइन ।

तन्त्रले हामीलाई सही ढंगले जिउन सकिन्छ । श्वास लिनुछ भने कसरी लिनुपर्छ, बस्ने हो भने कसरी बस्नुपर्छ, हिँड्ने हो भने कसरी हिँड्नुपर्छ । अर्थात दैनिक जीवनको कार्यलाई सुनियोजित गर्ने तरिका सिकाउँछ ।

जीवनको सबैभन्दा महत्वपूर्ण कार्य हो प्रजननका लागि वा आफ्नो आनन्दका लागि कामवासनाबाट मुक्त रहनु । तन्त्रले सिकाउँछ कि कसरी कामवासनाबाट मुक्त रहने ?

तन्त्र भन्छ कि कामवासनाबाट पूर्ण रुपमा मुक्त नपाउनुको कारण हाम्रो चित्त त्यसकै वरीपरी घुमेर हो । कामवासनालाई काम उर्जामा परिणत गर्न सकिन्छ । तन्त्रले कामवासनाबाट लामो समयसम्म मुक्त हुने सूत्र सिकाएको छ । तन्त्र भन्छ कि श्वास लिने हो भने कसरी लिने ? कामवासनमा श्वासको जुन लय थियो, यदि त्यो लयलाई समात्ने हो, श्वासलाई धीमा र गहिरो लिने हो भने कामवासनाबाट उत्रनै पर्दैन । अर्थात कामवासना कामउर्जामा र कामउर्जा केवल उर्जामा रुपान्तरण हुनेछ ।

Continue Reading…

पूर्वकर्मचारीको चाडपर्व खर्च कटौती नगर : कांग्रेस

२५ असार, काठमाडौं । प्रमुख सत्तारुढ दल नेपाली कांग्रेसले अवकाशप्राप्त कर्मचारीहरुलाई दिइँदै आएको चाडपर्व खर्च कटौती नगर्न माग गरेको छ ।

संघीय निजामती सेवाको प्रस्तावित विधेयकमाथि संसद्को राज्य व्यवस्था समितिमा गत आइतबार भएको छलफलमा अधिकांश सांसद्हरुले सेवा निवृत्त कर्मचारीहरुलाई चाडपर्व भत्ता दिनु उपयुक्त नभएकाले कटौती गर्न प्रस्ताव गरेका थिए ।

तर, कांग्रेस संसदीय दलको कार्यालयले सेवा निवृत्त कर्मचारीले पाउँदै आएको चाडपर्व खर्च कटौती नगर्न माग गरेको छ । पूर्व कर्मचारीहरुले लामो समयसम्म राष्ट्र सेवकका रुपमा योगदान पु¥याएकाले चाडपर्व खर्चमा मन खुम्च्याउन नहुने मत कांग्रेस संसदीय दलको छ ।

हाल सेवा निवृत्त कर्मचारीलाई चाडपर्व खर्चबापत दशैंमा १ महिना बराबरको तलब दिइँदै आएको छ ।

‘पेन्सन लिने राष्ट्रसेवक कर्मचारीलाई दिँदै आएको सुविधा कटौती गर्न नेपाली कांग्रेस सहमत छैन । तसर्थ उक्त खर्च कटौती नगर्न सरकार र सम्बन्धित निकायसँग नेपाली कांग्रेस संसदीय दल आग्रह गर्दछ’, कांग्रेस प्रमुख सचेतक बालकृष्ण खाणले मंगलबार एक विज्ञप्ति जारी गर्दै भनेका छन् ।

Continue Reading…
Loading...

Popular Bla Bla's

Loading...

Latest Bla Bla's on Fun2Sh

Powered by Blogger.
Copyright © Funtoosh Blog