Showing posts with label नेपाल खबर. Show all posts
Showing posts with label नेपाल खबर. Show all posts

Thursday, April 18, 2019

२४ औं वन्यजन्तु सप्ताह : सौराहामा फोटो प्रदर्शनी

५ वैशाख, चितवन । वन्यजन्तु सप्ताहको अबसरमा पर्यटकीय नगरी सौराहामा बिहीबारबाट फोटो प्रदर्शनी सुरु भएको छ ।

मृगकुञ्ज मध्यवर्ती उपभोक्ता समिति अन्तर्गतको सामुदायिक सीप केन्द्रले आयोजना गरेको फोटो प्रदर्शनी तीन दिनसम्म चल्ने केन्द्रका अध्यक्ष दुर्गाप्रसाद घिमिरेले जानकारी दिए ।

फोटोमार्फत वन र वन्यजन्तुको महत्वको बारेमा समुदायलाई जानकारी गराउन फोटो प्रदर्शनी गरिएको अध्यक्ष घिमिरेले बताए ।

सौराहाका १० जना नेचरगाइडले निकुञ्जमा खिचेका ९७ वटा फोटो प्रदर्शनीमा राखिएको छ ।

हात्ती, गैंडा, बाघ, भालु, चितुवा, गोही, मयुर, पुतली, जरायो, चित्तल, विभिन्न प्रजातीका चरालगायतका वन्यजन्तुका आर्कषक फोटोहरु प्रर्दशनीमा राखिएको छ ।

नेचरगाइडहरु विमिता भण्डारी, लोजिक कृष्ण सागर, नारायण रिजाल, राधाकृष्ण श्रेष्ठ, विष्णु रिजाल, युवानारायण पौडेल, रमोद सुनार, सोम लामा, टेकबहादुर गुरुङ र कुमार महतोले क्यामरामा कैद गरेको फोटो प्रदर्शनीमा राखिएको हो ।

मृगकुञ्ज मध्यवर्ती उपभोक्ता समितिका अध्यक्ष बासु ढुंगाना प्रमुख अतिथि रहेको उद्घाटन कार्यक्रममा निकुञ्जको सौराहा सेक्टर प्रमुख ऋषि रानाभाट, रेवान सौराहाका अध्यक्ष गोकर्ण गिरी, बाघ संरक्षण समितिका अध्यक्ष जीतु तामाङ, फोटो ग्राफर लोजिक कृष्ण सागर लगायतले मन्तव्य राखेका थिए ।

Continue Reading…

प्रेम सञ्जेलको चुनौती : भ्रष्टाचार गरेको भेटिए टुँडिखेलमा झुण्ड्याइदिनू

५ वैशाख, विराटनगर । श्रम कार्यालयका प्रमुख प्रेम सञ्जेलले आफूले भ्रष्टाचार गरेको प्रमाणित भए टुँडिखेलमा झुण्डिन तयार रहेको बताएका छन् ।

निर्वाचन कार्यालय मोरङमा रहँदा हाजिर नगरी एक महिना सात दिनको तलब, भत्ता र खाजा खर्च बुझेको उजुरी परेपछि अख्तियार दुरुपयोग अनुसन्धान आयोगले सञ्जेललाई तीन दिनभित्र उपस्थित हुन पत्र काटेको छ । शुक्रबार अख्तियारमा बयान दिने तयारीमा रहेका सञ्जेलले भने,‘ प्रेम सञ्जेल भष्ट्राचारविरोधी हो, यदि मैले भ्रष्टाचार गरेको कसैले प्रमाणित गर्छ भने टुँडिखेलमा झुण्ड्याइदिए हुन्छ ।’

निर्वाचन कार्यालय विराटनगरको प्रमुख हुँदा पनि सञ्जेलको समय नपुगी सरुवा भएको थियो । निर्वाचन कार्यालयको नयाँ भवन चुहिएपछि भवन निर्माण गर्ने ठेकदारको भुक्तानी रोकिदिएका कारण आफ्नो सरुवा भएको सञ्जेलको दाबी छ ।

त्यसबेला पनि सर्वोच्चबाट पुनर्बहाली भएका उनले निर्वाचन कार्यालयमा दुई वर्ष बिताए । अदालती प्रक्रियामा रहँदा उनले २०७३ साल फागुन १७ गतेदेखि चैत २३ गतेसम्म कार्यालयमा हाजिर गरेका थिएनन् । अदालतको आदेशपछि पुनर्बहाली भएका उनले हाजिर नगरेको अवधिको तलब र भत्ता बुझेका थिए ।
पुनर्वहालीका लागि सर्वोच्च अदालतले आदेश दिएपछि नियमअनुसार नै भत्ता बुझेको सञ्जेलको दाबी छ । उनले भने ‘मैले अदालतको आदेश अनुसार नै भत्ता खाएको हो ।’

सञ्जेलका अनुसार निर्वाचन कार्यालयमा हुुँदा तलब भत्ता बुझेर भ्रष्टाचार ग¥यो भन्ने उजुरी परेपछि अख्तियारको क्षेत्रीय कार्यालय इटहरीको टोलीले कागजात हेरेर फर्किएको थियो ।

अख्तियारको टोलीलाई अदालतको आदेश देखाएको भन्दै उनले भने, ‘ आन्तरिक लेखा परीक्षण कोष तथा लेखा नियन्त्रण कार्यालयले गरेको हो । महालेखा परीक्षकबाट पनि रुजू भयो ।’

श्रम कार्यालय विराटनगरमा सरुवा भएको दुई महिना बित्न नपाउँदै पुस ९ गते सरुवामा परेका सञ्जेल त्यस निर्णयविरुद्ध सर्वाेच्च गएका थिए । सर्वोच्चको आदेशले २३ फागुनमा हाजिर भए । दुई महिनाको तलब भत्ता सुविधा उपभोग गर्न सर्वाेच्चले नै आदेश दिएको उनले बताए ।

Continue Reading…

भारत पढ्न जाने विद्यार्थीबाट नेपाललाई वर्षमा ६ करोड घाटा

५ वैशाख, काठमाडौँ । विदेशमा अध्ययन गर्न जाने विद्यार्थीबाट शिक्षण शुल्क वापत् विदेशी मुद्रा सटही गर्दा लाग्ने सेवा शुल्क नलिँदा एक वर्षको अवधिमा मुलुकलाई  साढे ६ करोड राजश्व घाटा भएको छ ।

छिमेकी भारतमा उच्चशिक्षाका लागि अध्ययन गर्न जाने नेपाली विद्यार्थीबाट त्यस्तो शिक्षण शुल्कको एक प्रतिशतका लाग्ने सेवा शुल्क अशुल नगरिएको पाइएको हो ।

महालेखापरीक्षकको छपन्नौँ वार्षिक प्रतिवेदन २०७५ ले सोवापत् ६ करोड २७ लाख ५२ हजार राजश्व घाटा भएको जनाएको छ । विदेशिक अध्ययनमा शिक्षा सेवा शुल्कका लागि आर्थिक ऐन, २०७४ को दफा ८ को उपदफा १८ मा लगाई असुल गर्ने व्यवस्था रहेकोमा आर्थिक ऐन, २०७५ ले दुई प्रतिशत सेवा शुल्क पुर्‍याएको छ ।

त्रिभुवन विश्वविद्यालयको अभिलेखअनुसार विभिन्न सङ्कायमा पाँच हजार ९३१ विद्यार्थीले भारतमा गई स्नातक तहको अध्ययन गरेपछि यो वर्ष समकक्षता प्रमाणपत्र लिएका थिए । पाठ्यक्रम विकास केन्द्रबाट प्राप्त विवरणमा भारतमा अध्ययन गरी यो वर्ष १० कक्षा र १२ कक्षा उत्तीर्ण गर्ने आठ हजार ४९३ विद्यार्थीले यो वर्ष समकक्षता प्रमाणपत्र लिएको प्रतिवेदनले देखाएको छ ।

उक्त विवरणअनुसार एक वर्षको अवधिमा ती विद्यार्थीले भारतका विद्यालय र विश्वविद्यालयमा तिरेको औसत शिक्षण शुल्कको आधारमा न्यूनतम रु छ अर्ब २७ करोड ५२ लाख शिक्षण शुल्क खर्च हुने र उक्त रकमको एक प्रतिशतले गणना गर्दा रु छ करोड २७ लाख ५२ हजार राजश्व असुल नभएको अवस्था देखिएको हो ।

प्रतिवेदनले शिक्षा र स्वास्थ्यमा स्थानीय तहलाई उपलब्ध गराएको अनुदानको एकीकृत अभिलेख राख्ने व्यवस्था नमिलाएकाले यो क्षेत्रमा भएको खर्चको अद्यावधिक स्थिति यकिन हुन नसकेको जनाएको छ ।

भारतबाहेक अन्य मुलुकमा अध्ययन गर्न जाने नेपाली विद्यार्थीले शिक्षा, विज्ञान तथा प्रविधि मन्त्रालय मातहतको छात्रवृत्ति शाखाबाट ‘नो अब्जेक्सन लेटर’ दिने व्यवस्था छ । भारतसँग खुल्ला सिमाना र नेपाली रुपैयाँलाई कारण नखुलाई भारतीय मुद्रामा सटही गरेर पनि विद्यार्थी पढ्न जान सक्ने भएकाले कानूनमा व्यवस्था भएको त्यस्तो सेवा शुल्क बेवारिस भएको हो ।

नेपाल राष्ट्र बैंकका प्रवक्ता नारायणप्रसाद पौडेलले को मान्छे भारतमा पढ्न वा काम गर्न गएको छ भन्ने आफूहरुले बुझ्न नसकिने बताउँदै स्वीकृति लिएर गएकाको हकमा त्यस्तो शुल्क लिन सकिने जनाए । उनले भने, ‘भारतमा आफै तरिकाले पढ्न जाने वा बैंकको प्रक्रियामा नआइ पैसा खर्च गर्नेसँग चाहेर पनि सेवा शुल्क लिन सकिने अवस्था छैन । यसमा सम्बन्धित शिक्षा मन्त्रालय र स्थानीय निकायबाट यसको संयोजन गर्नुपर्छ । हुण्डीको कारोवार भई काम भएका राष्ट्र बैंकले कारवाही गर्न सक्छ ।’

शैक्षिक परामर्श सङ्घ (इक्यान) का पूर्वअध्यक्ष प्रकाश पाण्डेले आफ्नै तरिकाले भारतमा उच्च शिक्षाका लागि पढ्न जाने विद्यार्थी पनि भएकाले सेवा शुल्क नउठेको हुन सक्ने भन्दै स्वदेश वा विदेशमा जहाँ पढे पनि विद्यार्थीसँग सेवा शुल्क लिन नहुने आफूहरुको भनाइ रहेको बताउँछन् ।

पढ्ने विद्यार्थीलाई कुनै प्रक्रियागत झन्झट वा थप आर्थिक भार पार्न नहुने भए पनि सरकारको सम्बन्धित निकायले त्यस्ता कानून कायम राखेको उनको गुनासो छ ।

Continue Reading…

म्यानपावरको धरौटी कहाँ राख्ने भन्नेमा सरकार र व्यवसायीबीच विवाद

५ वेशाख, काठमाडौं । वैदेशिक रोजगार व्यवसाय सञ्चालनका लागि सरकारले लिने धरौटी रकम कहाँ राख्ने भन्ने विषयमा सरकार र वैदेशिक रोजगार व्यवसायीबीच विवाद भएको छ ।

श्रम, रोजगार तथा सामाजिक सुरक्षा मन्त्रालयको मन्त्रीस्तरबाट गठन गरिएको वैदेशिक रोजगार ऐन संशोधन कार्यान्वयन कार्यदलको बैठकमा धरौटी कहाँ राख्ने भन्ने विषयमा विवाद भएको हो ।

कानूनमा भएको व्यवस्था विपरीत वैदेशिक रोजगार व्यवसायी संघका अध्यक्ष रोहन गुरुङले धरौटी रकम निजी बैंकमा राख्नु पर्ने प्रस्ताव गरेको कार्यदलका एक सदस्यले बताए । ती सदस्यका अनुसार कानुनतः निजी बैंकमा राख्ने व्यवस्था नभएको र नेपाल राष्ट्र बैंकमै धरौटी राख्नु पर्ने भए पछि अध्यक्ष गुरुङले बैठक नै बहिष्कार गरेर हिँडेका थिए ।

‘बैठकमा धरौटी रकम कहाँ राख्ने भन्ने विषय उठ्यो, गुरुङजीले एक्कासी निजी बैंकमा राख्नुपर्छ भन्नु भयो’ कार्यदलका एक सदस्यले भने, ‘ऐनले नै निजी बैंकमा राख्न नमिल्ने जानकारी पाएपछि उहाँ (गुरुङ) केटाकेटी जस्तो हुँदै हुँदैन भन्दै उठेर हिँड्नुभयो ।’

अध्यक्ष गुरुङले कार्यदल बैठकमा यस विषयमा छलफल भएको स्वीकार गरे । कार्यदलको पहिलो बैठकमा सामान्य चिनजान भएको र दोस्रो बैठकमा छलफल भए पनि निश्कर्षमा नपुगेको उनले बताए । अन्य विषयमा भने अध्यक्ष गुरुङले नबोल्ने बताए ।

ऐनमा वार्षिक ३ हजारभन्दा कम कामदार पठाउने म्यानपावर कम्पनीले ५० लाख नगद र डेढ करोड रुपैयाँ बैंक ग्यारेन्टी, ३ हजारदेखि ५ हजारसम्म कामदार वार्षिक पठाउने म्यानपावर कम्पनीले एक करोड नगद र तीन करोड  रुपैयाँ बैंक ग्यारेन्टी र ५ हजारभन्दा बढी कामदार पठाउने म्यानपावर कम्पनीले दुई करोड नगद र चार करोड रुपैयाँ बैंक ग्यारेन्टी राख्नु पर्ने व्यवस्था गरिएको छ ।

मन्त्रालयका प्रवक्ता डा. नारायण रेग्मीले म्यानपावर कम्पनी दर्ता गर्दा धरौटी कहाँ राख्ने भन्ने तोकिने व्यवस्था रहेको जानकारी दिए । धरौटी राख्ने विषयमा भएको छलफलबारे आफूलाई जानकारी भने नभएको भन्दै प्रवक्ता रेग्मीले ऐन भन्दा बाहिर गएर निर्णय गर्न नसकिने बताए ।

Continue Reading…

दक्षिण अफ्रिकाको विश्वकप टिममा अम्ला पनि

५ वैशाख, काठमाडौं । दक्षिण अफ्रिकाले विश्वकप टिम घोषणा गर्दा भेट्रान ब्याट्सम्यान हासिम अम्ला पनि परेका छन् ।

भेट्रान ब्याट्सम्यान अम्लाले ८ हजार बढी रन बनाइसकेका छन् तर, औसत रन रेट ५० मुनी छ । पछिल्लो समय उनी फर्ममामा आउन संघर्षरत थिए ।

अम्ला टिममा परेपछि रिजा हेन्ड्रिक्स अटाएनन् । २९ वर्षीय हेन्ड्रिक्सले डेब्यू म्याचमै शतक हान्दै एकदिवसीय क्रिकेटमा शानदार सुरुवात गरेका थिए । तर पछिल्लो समय फर्ममा नरहेका उनले १८ खेल खेल्दा औषत रन २६ मा झरेको छ ।

Continue Reading…

९ सचिवको सरुवा, काठमाडौं महानगरमा न्यौपाने

५ वैशाख, काठमाडौं । सरकारले विभिन्न मन्त्रालय सचिव र प्रदेश मन्त्रालयका सचिवहरुको सरुवा गरेको छ । वैशाख २ गते बसेको मन्त्रिपरिषद बैठकले उनीहरुको सरुवा तथा पदस्थापन गरेको हो ।

राजपत्राङ्कित प्रथम श्रेणीका सहसचिव हरिप्रसाद बस्याललाई विशिष्ट श्रेणीमा बढुवा गरी प्रदेश नं ४ को मुख्यमन्त्री तथा मन्त्रिपरिषद् कार्यालयको प्रमुख सचिवमा पदस्थापना गरिएको सञ्चार तथा सूचना प्रविधिमन्त्री गोकुल बास्कोटाले जानकारी दिए ।

त्यस्तै केवल भण्डारीलाई कर्णाली प्रदेशको मुख्यमन्त्री तथा मन्त्रिपरिषद् कार्यालयका प्रमुख सचिवमा र स्वास्थ्य मन्त्रालयका सचिव चन्द्र घिमिरेलाई महिला बालबालिका तथा जेष्ठ नागरिक मन्त्रालयका सचिवमा पदस्थापन गरिएको छ ।

कर्णाली प्रदेशका मुख्यमन्त्री तथा मन्त्रिपरिषद् कार्यालयका प्रमुख सचिव रामप्रसाद थपलियालाई स्वास्थ्य मन्त्रालयमा, प्रदेश नं १ को मुख्यमन्त्री तथा मन्त्रिपरिषद् कार्यालयका प्रमुख सचिव केदार न्यौपानेलाई काठमाडौं महानगरका प्रमुख प्रशासकीय अधिकृतमा पदस्थापन गरिएको मन्त्री बास्कोटाले जानकारी दिए ।

त्यस्तै काठमाडौं महानगरपालिकाका प्रमुख प्रशासकीय अधिकृत यादव कोइरालालाई संघीय मामिला तथा सामान्य प्रशासन मन्त्रालय र मन्त्रालयका सहसचिव सुरेश अधिकारीलाई प्रदेश नं १ मुख्यमन्त्री तथा मन्त्रिपरिषद् कार्यालयका कायम मुकायम प्रमुख सचिवमा पदस्थापन गरिएको छ ।

अतिरिक्त समूहमा रहेका सचिव डा. हरि पौडेल र राष्ट्रिय महिला आयोगका सचिव अनिलकुमार ठाकुरलाई प्रधानमन्त्री तथा मन्त्रिपरिषद्को कार्यालय सचिवमा पदस्थापन गरिएको छ ।

Continue Reading…

‘देश बन्दैछ र केही नयाँ हुँदैछ’

५ वैशाख, काठमाडौं । सरकारी निकाय र निर्माण व्यवसायीले इमान्दार भएर काम गरे ठूला विकास निर्माणका कामले गति लिन सक्छ भन्ने उदाहरण नयाँ वर्ष लागेपछि निरन्तर रुपमा सार्वजनिक भएका छन् ।

यस मुलुकमा केही भएकै छैन, मात्र भ्रष्टाचार भएको छ, सरकार पूरै असफल भएको छ, प्रधानमन्त्री र मन्त्रीहरु गफ मात्रै दिन्छन् भन्नेका लागि विकासका पछिल्ला उदाहरण स्वतः जवाफका रुपमा उपस्थित हुन्छन् । यिनले आम जनतामा लोकतन्त्रप्रतिको आस्थालाई मजबुत बनाउन सहयोग मात्रै गर्दैनन्, आशा र विश्वासको सञ्चार पनि गर्छन् ।

आर्थिक विकासका लागि रणनीतिक महत्वका ठूला भौतिक पूर्वाधारका आयोजनाको पछिल्लो प्रगतिले देशमा केही नयाँ हुँदैछ भन्ने सन्देशसमेत दिएको छ । नयाँ वर्ष लागेलगत्तै राष्ट्रिय महत्वकोे आयोजनाको रुपमा रहेको भेरी बबई डाइभर्सन आयोजनाको सुरुङ निर्माण सम्पन्न भएको छ । प्रधानमन्त्री केपी शर्मा ओलीले यही वैशाख ३ गते सो आयोजनाको सुरुङ निर्माण सम्पन्न भएको घोषणा गरे ।

यस्तै बुधबार पोखरा क्षेत्रीय अन्तर्राष्ट्रिय विमानस्थलको धावनमार्ग निर्माण सम्पन्न भएको जानकारी आएको छ । लामो समयसम्म विवादमा फसेको गौतमबुद्ध अन्तर्राष्ट्रिय विमानस्थलको काम अन्तिम चरणमा पुग्न लागेको छ । यस्तै नेपाल विद्युत् प्राधिकरणका दुई रुग्ण आयोजना निर्माण सम्पन्न भई विद्युत् उत्पादन हुने चरणमा पुगेका छन् । यी केही उदाहरण हुन् ।

पछिल्लो पटक सरकारले भौतिक पूर्वाधारको क्षेत्रमा विशेष ध्यान दिएका कारण आयोजान एकपछि अर्को गर्दै सम्पन्न हुने चरणमा पुगेका हुन् । यस्तै हालसम्मकै ठूलो जलविद्युत् आयोजना माथिल्लो तामाकोशीको पनि निर्माण प्रक्रियाले गति लिएको छ । सो आयोजनाको कूल भौतिक प्रगति ९८ प्रतिशत भएको छ ।

यस्तै पहाडी क्षेत्रमा सुगम यातायाताका लागि निर्माण शुरु भएको मध्य पहाडी राजमार्ग निर्माणले समेत गति लिएको छ । राजनीतिक प्रतिबद्धता, सरकारी निकायको प्रभावकारी परिचालन तथा निर्माण व्यवसायीले इमान्दार भएर काम गरेको खण्डमा एकाध वर्षमा नै भौतिक निर्माणको क्षेत्रमा ठूलो प्रगति हासिल हुन सक्छ भन्ने सन्देश केही ठूला आयोजनाले दिएका छन् । नेपालको विकासप्रतिको तीव्र चाहनालाई केही आयोजनाले सम्बोधन नगरे पनि देश बन्दैछ र केही नयाँ हुँदैछ भन्ने आत्मविश्वास बढ्दै गएको छ ।

बाँके र बर्दियाका ५१ हजार हेक्टर क्षेत्रफलमा सिँचाइ सुविधा उपलब्ध गराउने लक्ष्यका साथ आर्थिक वर्ष २०६८/६९ देखि शुरु भएको भेरी बबई डाइभर्सन आयोजनाको प्रमुख कार्य मानिएको सुरुङ निर्माण सम्पन्न भएको छ । कूल १२ दशमलव २१० किलोमिटर लामो सुरुङ एक वर्षअगावै सम्पन्न भएको छ । आयोजनाको निकट भविष्यमा नै बाँध तथा विद्युत्गृह निर्माण शुरु गर्ने तयारी गरिएको छ ।

आयोजनाबाट कूल ४८ मेगावाट विद्युत्समेत उत्पादन हुनेछ । सो आयोजनाको प्रगतिले प्रधानमन्त्रीलाई समेत हर्षित बनाएको छ । प्रधानमन्त्रीकै भनाइमा ‘अत्याधुनिक प्रविधि प्रयोग गरिएको आयोजना सफलतापूर्व सम्पन्न भएको छ । भौगोलिक बनावटको निकै चुनौती रहेको आयोजनाको काम समयसीमा भन्दा अगावै सकिनु खुशीको विषय हो ।’

नियमित रुपमा ‘ब्लास्ट एण्ड ड्रिलिङ’ प्रविधिभन्दा टनेल बोरिङ मेशिनको प्रयोग गरेर डेढ वर्षमा नै सुरुङ निर्माण गरिएको आयोजना नै भेरी बबई आयोजना भएको छ ।

यस्तै देशको पर्यटन प्रवर्द्धनमा महत्वपूर्ण योगदान पुर्‍याउने लक्ष्यका साथ निर्माण भइरहेको पोखरा क्षेत्रीय अन्तर्राष्ट्रिय विमानस्थलको धावनमार्गको प्रमुख काम सकिएको छ । नेपाल नागरिक उड्डयन प्राधिकरण (क्यान) का आयोजना निर्देशक प्रदीप अधिकारीका अनुसार विमानस्थलको असाध्यै महत्वपूर्ण मानिएको काम सम्पन्न भएको छ ।

विमानस्थलको पार्किङ, एप्रोनको काम धमाधम भइरहेको र आगामी १५ दिनमा सकिने अधिकारीको भनाइ छ । लक्ष्यभन्दा अगावै निर्माण सम्पन्न हुने पहिलो आयोजनाको रुपमा पोखरा विमानस्थल देखिएको छ । आगामी डेढ वर्षभित्र सबै काम सकिने र व्यावसायिक उडानका लागि तयार हुने सो आयोजनाको प्रगतिले पनि प्राधिकरणलाई हौँस्याएको छ ।

आयोजना निर्देशक अधिकारी भन्छन्, ‘पूर्ण क्षमताका काम भएको छ । निर्माणको हिसाबले ५० प्रतिशत काम सम्पन्न भएको छ । हामी असाध्यै उत्साहित छौँ ।’ कूल रु २२ अर्ब लागतको सो विमानस्थल सन् २०२० भित्रै सञ्चालनमा आउन सके त्यो नेपालको भौतिक पूर्वाधार निर्माणको क्षेत्रमा महत्वपूर्ण हिस्सा हुनेछ । चिनियाँ ठेकदार कम्पनी सिएमसीले ‘इञ्जिनीयरिङ, परक्रयुरमेन्ट र कन्स्ट्रक्सन (इपिसिएफ)’ ढाँचामा निर्माण गरिरहेको आयोजना समयअगावै सम्पन्न हुने सङ्केत गरेको छ ।

यस्तै भगवान् गौतमबुद्धको जन्मस्थलमा नै निर्माण भइरहेको गौतमबुद्ध अन्तर्राष्ट्रिय विमानस्थलको काम पनि युद्धस्तरमा भइरहेको छ । आगामी १५ दिनभित्र तीन हजार मिटर लामो धावनमार्गको चोथो चरणको कालोपत्र निर्माण सम्पन्न हुनेछ । आयोजना प्रमुख प्रवेश अधिकारीका अनुसार हाल विमानस्थलको धावनमार्ग कालोपत्रे, टर्मिनल भवन, पानी ट्याङ्की, कन्ट्रोल टावरलगायत काम धमाधाम भइरहेको छ ।

यस्तै टर्मिनल भवनको छाना हाल्न बाँकी छ । टर्मिनल भवनको आगमन र प्रस्थान एवं प्रशासनिक भवन निर्माण कार्य अन्तिम चरणमा छ । विद्युत् जडान र अन्य काम पनि सँगसँगै भइरहेको छ । सो विमानस्थल सबैभन्दा पहिला निर्माण सम्पन्न हुने राष्ट्रिय गौरवको आयोजनाको रुपमा चित्रित हुन लागेको छ ।

यस्तै राष्ट्रिय गौरवको आयोजनाको रुपमा रहेको माथिल्लो तामाकोशी आयोजनाको निर्माणसमेत ९८ प्रतिशत सम्पन्न भएको छ । बाँकी रहेको काम सम्पन्न गराउन ऊर्जा, जलस्रोत तथा सिँचाइ मन्त्रालय, नेपाल विद्युत् प्राधिकरण र आयोजनाले कार्यतालिका नै बनाएर काम गरिरहेका छन् । ऊर्जा, जलस्रोत तथा सिँचाइमन्त्री वर्षमान पुनका अनुसार आयोजनालाई सकेसम्म आगामी चैतभित्र सम्पन्न गर्ने गरी आवश्यक व्यवस्था मिलाइएको छ ।

त्यस्तै प्राधिकरणको रुग्ण आयोजनाको रुपमा रहेको ६० मेगावाट क्षमताको माथिल्लो त्रिशूली थ्री ए र १४ मेगावाट क्षमताको कुलेखानी तेस्रो आयोजना निर्माण सम्पन्न भई विद्युत् उत्पादन गर्ने चरणमा पुगेका छन् । यी र यस्ता उदाहरणले देशमा केही भइरहेको छ र केही हुँदैछ भन्ने सन्देशसमेत दिएको छ ।

Continue Reading…

पूर्वसांसद वीपी यादव पक्राउ, कीर्ते गरेर उपभोक्ता समिति बनाएको आरोप

५ वैशाख, सप्तरी । सांसद छँदा रातो पासपोर्ट काण्डमा मुछिएका विपी भनिने विश्वनाथप्रसाद यादव अर्काे नक्कली काण्डमा मुछिएका छन् । नक्कली उपभोक्ता समिति बनाएको आरोपमा उनी बिहीबार पक्राउ परेका छन् ।

नक्कली उपभोक्ता समिति बनाएको प्रकरणमा सोधपुछका लागि नियन्त्रणमा लिएको सप्तरी प्रहरीका प्रमुख एसपी राजेन्द्र विष्टले बताए । प्रदेश २ सरकारद्वारा सञ्चालित योजनाको रकम एकलौटी रुपमा लिने उद्देश्यले उनले नक्कली उपभोक्ता समिति बनाएको आरोप लागेको छ ।

२०६४ सालको पहिलो संविधानसभाको निर्वाचनपछि मधेशी तत्कालिन मधेशी जनअधिकार फोरम नेपालका समानुपातिक सांसद रहेको बेला सांसद साह रातो पासपोर्ट काण्डमा मुछिएका थिए । हाल उनी राष्ट्रिय जनता पार्टी (राजपा) नेपालको केन्द्रीय सदस्य छन् ।

२५ लाखको योजना ल्याउन कीर्ते गरेर समिति गठन !

प्रदेश २ को भौतिक पूर्वाधार विकास मन्त्रालयबाट योजना लिन नक्कली उपभोक्ता समिति बनाएको आरोप यादवमाथि छ । राजपाकै नेता जितेन्द्र सोनलले नेतृत्व गरेको उक्त मन्त्रालयबाट सप्तरीको अग्निसाइर कृष्णासवरण गाउँपालिका २ र ३ मा पर्ने सडकमा माटो तथा ग्राभेल गर्न उनले योजना ल्याएका थिए ।

तर उपभोक्ता समिति गठन गरी योजना कार्यान्वयन गर्नुपर्ने नियम भएपछि गाउँपालिकाको नक्कली लेटर प्याडमा समिति बनाएको देखिएको प्रहरीको भनाइ छ ।

त्यही उपभोक्ता समितिलाई आधार बनाएर राजविराजस्थित पूर्वाधार विकास कार्यालयमा उक्त योजनाको सम्झौता भएको छ । २५ लाख रुपैयाँको योजनामा नक्कली समितिमार्फत बैंक खातासमेत खोलेर काम शुरु गर्दा स्थानीय बासिन्दाले कुन निकायबाट काम भइरहेको हो भनेर सोधपुछ गर्दा यादवले नक्कली उपभोक्ता समिति बनाएको खुलेको हो ।

Continue Reading…

चार वटा आयोजनालाई बन क्षेत्र प्रयोग गर्न दिने सरकारको निर्णय

५ बैशाख, काठमाडौं । सरकारले विद्युत र उद्योगसम्बन्धी पाँच वटा आयोजनालाई राष्ट्रिय बन क्षेत्र प्रयोग गर्न दिने निर्णय गरेको छ ।  बैशाख २ गतेको मन्त्रिपरिषद् बैठकले तीन वटा विद्युत र दुई वटा सिमेन्ट उद्योग सम्बन्धी आयोजनालाई बन क्षेत्र उपभोग गर्न दिने निर्णय गरेको हो ।

बिहीबार सञ्चार तथा सूचना प्रविधिमन्त्री गोकुल प्रसाद बास्कोटाले बझाङको बुंगल नगरपालिकामा निर्माणाधीन १५ दशमलब ३३ मेगावाट क्षमताको कालंगागाड जलविद्युत् आयोजना र ३८ दशमलव ४६० मेगावाट क्षमताको माथिल्लो कालंगाड जलविद्युत आयोजनालाई राष्ट्रिय बन क्षेत्र प्रयोग गर्न दिने निर्णय भएको जानकारी दिए ।

यस्तै सरकारले गोरखाको चुमनुब्री गाउँपालिकामा निर्माणाधीन ४ दशमलब ९८ मेगावाट क्षमताको रिचेत खोला साना जलविद्युत आयोजनालाई पनि बन क्षेत्र उपभोग गर्न दिने निर्णय गरेको छ ।

सरकारले सिन्धुलीको चुनढुंगा खानी उत्खनन् गर्न मारुती सिमेन्ट लिमिटेड र सत्य साई कोल उद्योग प्रालिलाई बन क्षेत्र प्रयोग गर्न दिने निर्णय गरिएको मन्त्री बास्कोटाले जानकारी दिए ।

Continue Reading…

सर्वोच्चको न्यायाधीशमा सिफारिस पाँचै जनाको नाम सुनुवाइ समितिबाट अनुमोदन

५ वैशाख, काठमाडौं । संसदीय सुनुवाई समितिले सर्वोच्च अदालतको न्यायाधीशमा सिफारिस ५ जनाकै नाम अनुमोदन गरेको छ । बिहीबार सबै ५ जनाको सुनुवाईपछि समितिले सर्वसम्मत रुपमा नाम अनुमोदन गरेको हो ।

न्यायपरिषदले केही दिनअघि सर्वोच्चको न्यायाधीशमा कुमार रेग्मी, हरि फुयाँल, मनोजराज शर्मा, प्रकाश ढुंगाना र सुष्मलता माथेमालाई सिफारिस गरेको थियो ।

संसदीय सुनुवाइ समितिमा न्यायाधीश सिफारिसबारे ५ वटा उजुरी परेको थियो । सुनुवाइ समितिबाट नाम अनुमोदन भएपछि अब उनीहरुको नियुक्ति राष्ट्रपतिबाट हुनेछ ।

Continue Reading…

प्रदेश ३ का सांसद भन्छन् : शून्य समयमा बोलेको कुरालाई शून्यमै नराखियोस्

५ वैशाख, हेटौंडा । सरकारले सांसदको बेवास्ता गर्दै अघि बढेको भन्दै प्रदेश ३ का सांसदले प्रदेश सभाको शून्य समयमा बोलिएका कुरालाई कार्यान्वयनमा ल्याउन सरकारको ध्यानाकर्षण गराएका छन् ।

बिहीबारको बैठकमा सांसद राजेन्द्र पाण्डेले सरकारले काम गर्न नसके जस्तै सांसदहरुले शून्य समयमा बोलेका कुराहरुलाई शुन्यान्तरमै नराख्न सुझाब दिए ।

प्रदेशमा सरकारको गतिबिधि नदेखिएको आरोप लगाएका उनले सरकार सांसदहरुप्रति उत्तरदायी नभएको आरोप लगाए । उनले भने, ‘सबै आफू मात्र होइन सांसदलाई पनि जिम्मेवारी दिऔं ।’

सांसदहरुले बोलेका कुरा र सरकारको बारेमा सोधिएका प्रश्नहरुको सरकारले जवाफ दिने बानी बसाल्न सभामुखमार्फत सरकारको ध्यानाकर्षण गराए ।

बैठकमा प्रदेशसभा सदस्यहरु रत्नप्रसाद ढकाल, लक्ष्मण लम्साल र रिना गुरुङले लामो समयदखि स्थायी राजधानी र नामाकरणको बिषयलाई सरकारले आलटाल गरेको आरोप लगाए । प्रदेशसभा भित्रको बिषयलाई आलटाल गरेर अस्थायी मानसिकतामा नपार्न उनीहरुले जोड दिए ।

यस्तै प्रदेशसभा सदस्य राधा घलेले प्रदेशसभा भित्र सदस्यहरुले बोलेका कुराहरु केन्द्र सरकारसम्म पुर्‍याउने व्यवस्था मिलाउन प्रदेश सचिवालयलाई आग्रह गरिन् ।
यसैगरी सदस्य राजेन्द्रप्रसाद पौडेलले प्रदेशको बजेट निर्माणको क्रममा सांसदहरुलाई सक्रिय सहभागी गराउन माग गरे ।

सांसद शोभा शाक्यले सरकारले प्रदेश भित्रको सडक मर्मतमा ढिलाइ गरिरहेको भन्दै असार लागेपछि बाटो बनाउने र मर्मत नगर्न सरकारको ध्यानाकर्षण गराइन् ।
उनले काठमाडौंबाट हेटौंडा आउने वातावण्रण सहज बनाउन कान्तीलोकपथ सडकखण्डलाई छिटो सुरु गराउन जोड दिइन् ।

सांसद मीना ज्ञवालीले सरकारले घोषणा गरे अनुसार पूर्वाधार निर्माणको काम गर्न नसकेको र बजेट कार्यान्वयनमा ल्याउन नसकेको गुनासो गरिन् ।

बिहीबार बसेको बैठकमा २९ जना प्रदेशसभा सदस्यहरुले शून्य समयमा आफ्ना धारणा राखेका थिए । शून्यसमयमा बोल्ने सांसदहरुले भक्तपुरमा खानेपानीको समस्या रहेको, हेटौंडा-काठमाडौं जाने छोटो मार्ग छिटो मर्मत गर्नुपर्ने, पुनर्निर्माण कार्यमा ऐलानी जग्गाले समस्या, ढुङ्गा गिटी बालुवाको अबैध उत्खनन् नियन्त्रण र सांसदहरलाई इ-लाईब्रेरीको व्यवस्था लगायतको बिषयमा आफ्नो धारणा राखेका थिए ।

संशोधनसहित दुई विधेयक पारित

बिहीबार बसेको प्रदेश ३ को प्रदेशसभा बैठकले संशोधनसहितको २ वटा विधेयक पारित गरेको छ । बिहीबार बसेको प्रदेशसभा बैठकबाट समितिमा दफाबार छलफलपछि संशोधन गरी सभामा पेश भएको प्रतिवेदन सहितको एउटा विधेयक सर्वसम्मत अर्को विधेयक बहुमतले पारित भएको हो ।

बैठकमा आन्तरिक मामिला तथा कानूनमन्त्री शालिकराम जम्कट्टेलले प्रस्तुत गरेको प्रदेशका पदाधिकारी तथा सदस्यहरुको सेवा सुविधा सम्बन्धी ऐनको पहिलो संशोधन विधेयक सर्वसम्मत पारित भएको छ ।

त्यसैगरी, भूमि, व्यवस्था कृषि तथा सहकारीमन्त्री दावादोर्जे लामाले प्रस्तुत गरेको प्रदेश सरकारी सम्बन्धी विधेयक भने बहुमतले पारित भएको छ ।

विधेयक पारित गरियोस् भन्ने प्रस्ताव सभामुख सानुकुमार श्रेष्ठले निर्णयार्थ प्रस्तुत गर्दा विवेकशीलका सांसद विराजभक्त श्रेष्ठले हुन्न भन्ने आवाज उठाएपछि विधेयक बहुमतले पारित भएको हो ।

यसअघि विधेयकमाथि विवेकशीलकै सांसद रमेश पौड्यालले धारणा राखेका थिए । बैठक अर्को सूचना नभएसम्मका लागि स्थगित भएको छ ।

Continue Reading…

ट्राफिक प्रहरी जवान र हवल्दारलाई ४० प्रतिशत प्रोत्साहन भत्ता

५ वैशाख, काठमाडौं । सरकारले ट्राफिक प्रहरी अधिकारीलाई प्रोत्साहन भत्ता दिने निर्णय गरेको छ ।

सरकारका प्रवक्ता एवं सञ्चार तथा सूचना प्रविधिमन्त्री गोकुल बास्कोटाले ट्राफिक प्रहरीलाई प्रोत्साहन भत्ताको व्यवस्था गरिएको जानकारी दिए ।

भत्ताको व्यवस्थासहित ट्राफिक प्रहरीको प्रोत्साहन भत्ता व्यवस्थापन निर्देशिका, २०७५ स्वीकृत भएको हो । निर्देशिका अनुसार ट्राफिक प्रहरीमा कार्यरत सिपाही र हवल्दारले ४० प्रतिशत भत्ता पाउनेछन् ।

प्रहरी नायब निरीक्षक (सई) र प्रहरी सहायक निरीक्षक (असई) ले २० प्रतिशत भत्ता पाउने छन् भने प्रहरी निरीक्षक (इन्स्पेक्टर) र प्रहरी नायब उपरीक्षक (डीएसपी) ले १० प्रतिशत भत्ता पाउनेछन् ।

उनीहरुले आफ्नो न्यूनतम तलब अनुसार भत्ता पाउने गृह मन्त्रालयका एक अधिकारीले बताए । धुँलो, धुँवा र अन्य कार्यालयमा भन्दा  बढी समय सेवामा खटिनु पर्ने भएकाले भत्ताको ट्राफिक प्रहरीलाई भत्ता व्यवस्था गरिएको ती अधिकारीले बताए ।

Continue Reading…

सैनिक अधिकारीलाई आचारसंहिताः संगठनलाई आक्षेप लाग्ने विषयमा लाइक, कमेन्ट गर्न निषेध

५ वैशाख, काठमाडौं । नेपाली सेनाले सैनिक आचारसंहिता, २०७६ जारी गरेको छ । कतिपय अवस्थामा गलत नियतले नभइ, अज्ञानताका कारण अनपेक्षित कार्य हुने गरेको भन्दै नेपाली सेनाको जंगी अड्डाले आचारसंहिता जारी गरेको हो ।

जंगी अड्डाका प्रवक्ता विज्ञानदेव पाण्डका अनुसार आचारसंहिताको संग्रह प्रकाशन गरेर हरेक युनिटमा वितरण गरिसकिएको छ ।

‘संगठनको हरेक तहमा कार्यरत् सदस्यलाई आफूले गर्न हुने, गर्न नहुने र गर्नै पर्ने कार्यको बारेमा सूसूचित गराउनु हाम्रो दायित्व हो’, सैनिक सूचना तथा जनसम्पर्क निर्देशनालयका प्रमुख समेत रहेका पाण्डेले अनलाइनखबरसँग भने, ‘त्यसैले वैशाख ६ गते शुक्रबारदेखि १३ गतेसम्म साताव्यापी अभियान पनि सुरु गरेको छौं ।’

अभियान अन्तरगत विभिन्न युनिटबाट प्रतिनिधिमूलक हिसाबमा सकल दर्जाका कर्मचारी सहभागी गराएर प्रशिक्षण दिइनेछ । सेनाको कानूनी राय परामर्श र न्याय प्रणालीको क्षेत्रमा काम गर्ने प्राड विवाकले तालिमको संयोजन गरेको छ ।

प्रशिक्षण भने विषयसँग सम्बन्धित विभिन्न विभागका अधिकारीले दिनेछन् ।

के छ आचारसंहितामा ?

प्रवक्ता पाण्डेका अनुसार लघु किताबका रुपमा प्रकाशित आचारसंहिता नयाँ भने होइन । यद्यपि, केही विषय परिमार्जन गरिएका छन् ।

‘पहिले भएकै आचारसंहितहरुलाई संग्रहित गरेर कार्यान्वयनका लागि पहल गरिएको हो’, सहायक रथी पाण्डेले भने । आचारसंहितमा सैनिक अधिकारीले गर्नु पर्ने व्यवहार, आचारणका बारेमा व्याख्या गरेको छ ।

विभिन्न खण्डमा रहेको पुस्तिकामा सैनिक आचरण, मूल्य–मान्यता, आर्थिक कारोबार तथा बजेट, मिडिया नीति, सामाजिक सञ्जाल प्रयोगको परिधि लगायत समेटिएका छन् ।

सामाजिक सञ्जाल प्रयोगको हकमा धार्मिक सहुष्णिुतामा खलल पुग्ने विषय पोष्ट गर्न वा लाइक, कमेन्ट वा शेयर गर्न नहुने भनिएको छ । सेनाको विषयमा आक्षेप लाग्ने विषयमा पनि लाइक, कमेन्ट वा शेयर गर्न पनि निषेध गरिएको छ ।

सैनिक अधिकारीलाई सामाजिक सञ्जालमा बर्दीको फोटो पोष्ट गर्न पनि निषेध गरिएको छ ।

आचारसंहिताको सामाजिक सञ्जालको परिधि खण्डमा भनिएको छ, ‘कुनै राजनीतिक पार्टी वा अन्य कुनै व्यक्तिसँग सम्बन्धित अनावश्यक टिप्पणी गर्न पाइने छैन ।’ गोप्य सैनिक सूचना चुहाउनु नहुने पनि भनिएको छ ।

संहितामा ठेकदारले प्रलोभन देखाउन सक्ने जनाउँदै कुनै पनि किसिमको उपहार लिने कार्यमा संलग्न नहुन पनि भनिएको छ ।

यसअघि संयुक्त राष्ट्र संघको शान्ति मिसनमा जाने अधिकारीले युुनिटका लागि विभिन्न किसिमका उपहार ल्याउने बाध्यात्मक प्रचलन रहे पनि अब कुनै किमिसको उपहार ल्याउनु नपर्ने भनिएको छ ।

कुनै पनि पोष्टिङका क्रममा सैनिक अधिकारीलाई मायाको चिनो दिने परम्परालाई भने यथावत् राखिएको छ । अन्य किसिमका उपहार भने मान्य नहुने आचारसंहितामा उल्लेख छ ।

‘उपहारको विषयलाई सिस्टमाइज गर्न खोजिएको हो’, पाण्डेले भने ।

Continue Reading…

राष्ट्रसंघलाई सरकारको जवाफ : हाम्रो क्षमतामा विश्वास गर्नुस्

५ वैशाख, काठमाडौं । सरकारले सशस्त्र द्वन्द्वका गम्भीर मानवअधिकार उल्लंघनमा माफी दिने योजना नरहेको बताएको छ ।

राष्ट्रसंघको मानव अधिकार उच्चायुक्तको कार्यालयको संयोजकत्वमा जबर्जस्ती बेपत्ता सम्बन्धी कार्य समूह तथा विविध विषयका चार विशेष दूतले जेनेभास्थित नेपालको राष्ट्रसङ्घीय स्थायी नियोगमार्फत् परराष्ट्रमन्त्री प्रदीपकुमार ज्ञवालीलाई १० पेज लामो पत्र लेख्दै द्वन्द्वकालीन मुद्दाहरू टुङ्ग्याउन गरेको ढिलाइप्रति चिन्ता व्यक्त गरेका थिए ।

मन्त्रिपरिषद्का निर्णयहरु सार्वजनिक गर्न बिहीबार आयोजित नियमित पत्रकार सम्मेलनमा सरकारका प्रवक्ता एवं सञ्चारमन्त्री गोलुक बास्कोटाले नेपालको शान्ति प्रक्रिया समकालीन समयको नमुना भएको बताए । यसलाई टुंगोमा पुर्‍याउन नेपाल सक्षम रहेको भन्दै उनले भने, ‘हाम्रो क्षमतामाथि विश्वास गर्नुस् ।’

उनले गम्भीर मानवअधिकार उल्लंघनका घटनामा माफी दिने तयारी नरहेको समेत बताए ।

Continue Reading…

विद्यार्थी भर्नासँगै अब टिकाउने र सिकाउने अभियान

सामान्यतः बालबालिकाले पाँच वर्षभित्र बालविकासको प्रक्रिया पुरा गर्नुपर्छ । पाँचवर्षमा एक कक्षामा भर्ना गर्नुपर्छ । तर, ५–९ वर्ष उमेर समूहका थुप्रै बालबालिका विद्यालय जाँदैनन् । उनीहरुलाई लक्षित गरेर २०६१ सालदेखि विद्यालय भर्ना अभियान सुरु भएको थियो । रपनि, तिनलाख १३ हजार बालबालिका स्कुल बाहिर रहेको शिक्षा मन्त्रालयको गत वर्षको फ्ल्यास रिपोर्ट ले देखाएको छ ।

स्वतन्त्र रुपमा गरिएको अर्को अध्ययनले पनि लगभग त्यही देखाएको रहेछ । त्यसैले पालिकाहरुले घरधुरी सर्वेक्षण नगर्दासम्म मन्त्रालयको फ्यास रिपोर्टलाई मान्ने भनेर भर्ना अभियान सुरु ग¥यौं । कति त मसँग रिसाउनु पनि भयो, तर मैले सार्वजनिक जीवनका व्यक्तिबाट यसको सुरुवात गर्न चाहेँ । किनभने, यो व्यूरोक्रेसीबाट मात्र सम्भव छैन ।

यो पनि प्रष्ट छ कि विद्यार्थी भर्ना अभियान स्थानीय सरकारले चलाउनु पर्ने हो । तर, सबैको उच्च प्राथमिकतामा नपर्ने देखेपछि संघीय सरकारले नै यसमा हात हाल्यो । प्रधानमन्त्री, मन्त्री, सांसद सबैले बालबालिकाको अभिभाकत्व ग्रहण गर्दै भर्ना अभियान चलायौं र पहिलो महिना दुईलाख ५४ हजार बालबालिकालाई स्कुलमा ल्यायौं ।

अझै ६० हजार जति विद्यालय बाहिर रहे । उनीहरुलाई पनि विद्यालय ल्याउन सकियोस् भनेर हामीले अर्को निर्णय ग¥यौं– स्थानीय तहले घरधुरी सर्वेक्षण गरेर स्कुल बाहिर बालबालिका छैनन् भनेर स्वघोषणा गरुन् । १२६ पालिकाले यस्तो घोषणा गरेका छन्, अहिलेसम्म । बीचमा केही थपिएका छन् । ६० हजारमध्ये कति बालबालिका विद्यालय आए भन्ने तथ्यांक आइसकेको छैन । मेरो अनुमानमा अझै ४० हजार बालबालिका बाहिरै छन् ।

जति भर्ना अभियान चलाएपनि १०–११ प्रतिशत ड्रप आउटको समस्या छ । यसका विविध कारण छन्, जसलाई पुरै रोक्न सकिँदैन । अर्को कुरा, हरेक वर्ष नयाँ बालबालीका आउँछन् । यी तीनै पक्षलाई समेट्ने गरी २ वैशाखलाई भर्ना दिवसको रुपमा मनाउने निर्णय गरेका छौं । यसले भर्ना अभियानलाई अझ व्यवस्थित बनाउनेछ ।

अब हरेक वर्ष वैशाखको पहिलो दुईसाता भर्ना अभियान चल्छ । त्यसमा छुटेकालाई फेरि १५ दिन समय दिएर विद्यालय ल्याउने प्रयास हुनेछ । यो वर्षको नारा ‘सबै बालबालिकालाई विद्यालय पठाऊ, नेपाललाई शिक्षितको देश बनाऔं’ भन्ने छ ।

यसमा प्रष्ट हुनुपर्ने कुरा के छ भने भर्ना अभियान कार्यान्वयनको अगुवा स्थानीय सरकारहरु नै हुन् । यसमा प्रदेश र केन्द्र सरकारले सहयोग गर्छ ।

टिकाउने र सिकाउने अभियान

बालबालिकालाई स्कुलसम्म ल्यायौं, अब उनीहरुलाई टिकाउनु छ । त्यसका लागि दिवा खाजाको व्यवस्था गरेका छौं । मानव विकास सूचकांकमा पछाडि रहेका क्षेत्रबाट यो कार्यक्रम सुरु गरेका छौं ।

योसँगै विद्यालयहरुमा सिकाउने वातावरण बनाउनु छ । त्यसैले सामुदायिक विद्यालयहरुको रुपान्तरण गर्ने काम थालेका छौं । ११ र १२ वैशाखमा सम्मेलन नै गर्दैछु । हाम्रो समस्या कहाँ रह्यो ? राम्रो गर्नेहरुले कसरी सके ? नसक्ने किन सकेनन् ? सम्मेलनमा उत्तर खोज्ने प्रयास हुनेछ ।

सिकाईलाई केन्द्रित गरेर विद्यालयको समग्र शैक्षिक पुनर्संरचनाको दिशामा जाने मन्त्रालयको सोच छ । राष्ट्रिय शिक्षा आयोगको प्रतिवेदन पनि यसमै केन्द्रित छ । यसका लागि हामीलाई सुयोग्य हेडमास्टर, विषयगत शिक्षक, भौतिक पूर्वाधार र अभिभावकको भूमिकासहित शैक्षिक परिवेश चाहिन्छ ।

विगतमा सामुदायिक विद्यालयहरुमा स्वामित्वको पनि समस्या थियो । विद्यालय शिक्षाको जिम्मेवारी स्थानीय सरकारको भएकाले स्वामित्वको समस्या एक ढंगले हल हुन्छ । अब नेतृत्व दिने गरी प्रअ र विषयगत शिक्षकहरु चाहियो । शिक्षकले बढीभन्दा बढी समय कक्षाकोठामा दिनुप¥यो, विद्यार्थीहरुको प्रतिभालाई पल्लवित पार्नुप¥यो ।

नयाँ शिक्षा नीतिका कुरा

नयाँ शिक्षा नीति मन्त्रिपरिषदमा पेश गरिसकेको छु, पास भएपछि कानुनी संरचनाहरु बन्दै जान्छन् । यसमा समय लाग्छ । यसरी जग बसाल्ने गरी काम गर्दैछौं ।

कतिपयले राष्ट्रिय शिक्षा आयोगको प्रतिवेदन सार्वजनिक नभएकोमा प्रश्न उठाउनुभएको छ । आलोचनालाई स्वागत नै गर्छौं, तर प्रतिवेदन आफैंमा नीति होईन । ५०० पेजको प्रतिवेदनलाई हामीले ५० पेजको राष्ट्रिय शिक्षा नीतिमा बदलेका छौं । मन्त्रालयले गरेका सहमति–सम्झौता र अन्तराष्ट्रिय रुपमा जनाएका प्रतिवद्धताहरु पनि हेरेर शिक्षा नीतिलाई क्याबिनेटमा पुर्‍याएको छु ।

आयोगको प्रतिवेदन सार्वजनिक गर्ने प्रस्ताव पनि राखेको छु । प्रतिवेदन बुझेकै मितिमा सार्बजनिक नगर्दा सरकारले स्वामित्व लिएन कि भन्ने ठाउँ भने रहेकै हो ।

राष्ट्रिय शिक्षा नीति पास भएपछि त्यसको आधारमा संघीय शिक्षा ऐन ल्याउँछु । वैशाखबाट शैक्षिक सत्र भएकाले विधेयक अगाडि बढाउने तयारी पुरा गरेको छु । प्रतिपक्षले साथ दिए अध्यादेशबाट पनि जान सकिन्छ । नत्र वर्षे अधिवेशनमा प्राथमिकताका साथ अगाडि बढाउँछु ।

(कुराकानीमा आधारित)

Continue Reading…

सशस्त्रद्वारा पर्सामा ५ लाखको सामान बरामद

५ वैशाख, वीरगञ्ज । सशस्त्र प्रहरी बल नेपाल १४ नम्बर गुल्म -राजश्व तथा भन्सार सुरक्षा)को टोलीले वीरगञ्ज भन्सार कार्यालयमा ५ लाख भन्दा बढीको सामान बुझाएको छ ।

अबैध रुपमा चोरी तस्करी गर्दै गरेको अवस्थामा नियन्त्रणमा लिएको पशुचौपाया, लत्ता कपडा, भाँडावर्तन वीरगञ्ज भन्सार कार्यालयमा बुझाएको हो ।

रक्सौलबाट भन्सार छली नेपाल ल्याउँदै गरेको एक लाख ३१ हजार मूल्य बराबरको एलईडी टिभी, लत्ता कपडा, भाडा वर्तनहरु, पर्साको सखुवाप्रसौनी गाउँपालिका-६ स्थित लखनपुर इलाकामा भारतबाट अवैध रुपमा नेपाल ल्याउँदै गरेको अन्दाजी १ लाख मूल्य बराबरको ५ वटा भैंसी र छिपहरमाई गाउँपालिका वडा नं ४ स्थित तुल्सीवर्वाबाट बरामद गरिएको अन्दाजी ३ लाख मूल्य बराबरको ६ वटा गोरु भन्सार पठाइएको सशस्त्र प्रहरी बल नेपाल १४ नम्बर गुल्मले जनाएको छ ।

गुल्मका गुल्मपति सशस्त्र प्रहरी नायब उपरीक्षक तिलकबहादुर खड्काले गाडी मोबाइल टोलीले भारत रक्सौलबाट अबैध रुपमा भन्सार छली नेपालतर्फ ल्याउँदै गरेको पशु चौपाया, लत्ता कपडालगायतका सामान बरामद गरेको जानकारी दिए ।

जिल्लाको विभिन्न स्थानबाट बरामद गरिएको ५ लाख ३१ हजार ८० रुपैयाँ मूल्य बराबरको पशु चौपाया, लत्ता कपडा, भाँडा वर्तनहरु आवश्यक कारबाहीका लागि वीरगञ्ज भन्सारमा बुझाइएको उनको भनाइ छ ।

अवैध रुपमा माल समान र पशुचौपया भित्र्याउने व्यक्तिहरु भने सशस्त्र प्रहरीलाई देख्ने वित्तिकै भागेको दावी सशस्त्र प्रहरीको छ ।

सशस्त्र प्रहरीको टोलीले नयाँ वर्षको पहिलो दिन पनि वीरगञ्ज १६ इनर्वाबाट अवैध रुपमा भित्र्याउँदै गरेको ३ लाख ९० हजार मूल्य बराबरको कपडा बरामद गरेको थियो ।

Continue Reading…

कुलमानको निर्देशनः चुनावमा ट्रेड युनियनलाई गाडी नदिनू, दिए कारवाही

५ वैशाख, काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङले आधिकारिक ट्रेड युनियको चुनावमा ट्रेड युनियनलाई कार्यालय/आयोजनाको गाडी प्रयोगमा रोक लगाएका छन् ।

कार्यकारी निर्देशक घिसिङले बिहीबार परिपत्र जारी गर्दै निर्वाचन प्रायोजनका लागि सामान्य सेवा विभागबाट उपलब्ध गराएको सवारी साधनबाहेक कुनै पनि ट्रेढ युनियनलाई गाडी उपलब्ध नगराउन निर्देशन दिएका हुन् ।

कसैले गाडी उपलब्ध गराएमा विभागीय कारवाही गर्ने चेतावनी पनि घिसिङले दिएका छन् ।  प्राधिकरणमा आधिकारिक ट्रेड युनियनको चुनाव १९ वैशाखमा हुँदैछ । चुनावमा नेकपा निकट राष्ट्रिय कर्मचारी युनियन र नेपाली काँग्रेस निकट कर्मचारी संघबिच मुख्य प्रतिश्पर्धा हुने छ ।

‘चुनावी प्रायोजनका लागि समान्वय सेवा विभागबाट उपलब्ध गराइएको सवारी साधनबाहेक त्यस निर्देशनालय र अन्तर्गतका कुनै पनि कार्यालय/आयोजनाहरुबाट कुनै पनि सवारी साधन कुनै पनि ट्रेड युनियनलाई उपलब्ध नगराउने, निर्देशा विपरित काम कारबाही भए गरेको पाइएमा सम्बन्धितलाई विभागीय कारबाही गरिने छ’, निर्देशनमा उल्लेख छ ।

घिसिङले संस्थाको हित विपरित सार्वजनिकरुपमा  अभिव्यक्ति दिएपछि कर्मचारी संघका अध्यक्ष जनार्दन भट्टराईलाई स्पष्टीकरण सोधेका छन् । स्पष्टीकरणको निर्णय फिर्ता नभएसम्म चुनावमा सहभागी नहुने अडान संघले राखेको थियो ।

तर, कार्यकारी निर्देशक घिसिङले निर्णयबाट कुनै पनि अवस्थामा पछि नहट्ने अडान राखेपछि संघ बाध्य भएर चुनावमा सहभागि भएको थियो । प्राधिकरणमा क्रियाशील ट्रेड युनियनहरुले विहीबार उमेदवारी दर्ता गराएका छन् ।

प्राधिकरणले चुनावलाई स्वतन्त्र, निश्पक्ष र मर्यादित रुपमा सम्पन्न हुने वातावरण बनाई सोही बमोजिक परस्पर सहयोग र समन्वय गरी निर्वाचनमा सहभागि हुन निर्देशन दिएको छ ।

चुनावमा ज्यालादारी, करार, अस्थायी र स्थायी गरी नौ तहसम्मका कर्मचारीले भोट हाल्न पाउने छन् ।

Continue Reading…

मल्लकालिन सम्पदा ‘बालाजु बाइस धारा’ : कसरी सुरु भयो मेला

काठमाडौं बालाजुबाट बाइपासतर्फ मोडिएपछि एउटा सितल पार्क भेटिन्छ, बाइस-धारा पार्क । अहिले शहरवासीको सुस्ताउने गन्तव्य हो यो । नागर्जुन जंगलको फेंदमा अवस्थित यो मनोहर पार्कको खास आकर्षण भनेको बाइस धारा हो । अर्थात नागार्जुनको फेंदको मुलबाट निस्किएको पानी र २२ वटा ढुंगे धारा ।

यो धारा अहिले बनाइएको होइन । करिब ३ सय बर्ष बनाइएको हो । मल्लकालमा । अन्तिम मल्ला राजा जयपप्रकाश मल्लले । अर्थात बाइस धारा एक ऐतिहासिक सम्पदा हो ।

त्यसो त बाइस धाराको पौराणिक एवं धार्मिक महत्व पनि छ । यो धार्मिक तथा हिन्दु धर्मावलम्बीहरुको आस्थाको केन्द्र मानिन्छ । पौराणिक कथन के छ भने, महायानी दार्शनिक आचार्य नागार्जुनले बुद्ध भगवानको स्मरण गरी यही जामाचो पहाडमा -हाल नागार्जुन) रहेको गुफामा ध्यान-साधना गरेर सिद्धि प्राप्त गरेका थिए । त्यही कारण यस क्षेत्रलाई नागार्जुन भनिएको मानिन्छ ।

बाइस धारा मेला

आउँदो सुक्रबार यहाँ भव्य मेला लाग्छ । यो मेलाको आफ्नै धार्मिक महत्व छ । चैत शुक्ल पूणिर्माका दिन यहाँ बर्षेनी मेला लाग्ने गरेको हो । यस दिनलाई नेवार समुदायले ल्हुतिपुन्हिको रुपमा मनाउने गरेको उल्लेख छ ।

के मान्यता छ भने, यस दिन मन्नादी देवीको जन्म भएकाले महिलाले बाइस धारामा नुहाईधुवाई गरेमा फलिफाप हुन्छ । किम्वदन्ती अनुसार विपस्वी बुद्धले कमलको फूल रोपेर मन्त्रोच्चारण गर्दा यहाँ स्वयम्भू ज्योतिरुप उत्पति भयो । यसैको सम्झनामा ल्हुतिपूणिर्मा मनाउने गरिएको हो ।

ल्हुति पूणिर्माको दिन बाइसधारामा स्नान गरी मृत्त आफन्तको नाममाब बत्ती बाल्ने परम्परा छ । साथै यसै दिन नुवाकोटको कडल्चोक भगवतीलाई पनि बालाजुमा ल्याएर त्यहाँको हालको सेतो पाटीमा राखी हवन तथा राँगाको बलि दिने परम्परा रहेको उल्लेख छ । मनमैजु देवीको जात्रासँग पनि बालाजु बाइसधाराको प्रसंग जोडिएको छ । ल्हुती पूणिर्माको मेलासँग मनमैजु जात्रा पनि सुरु हुन्छ । यस दिन बालाजुको बाइसधारामा नुहाएर मनमैजु देवीको दर्शन गरेमा आफ्नो मनोकामना पुरा हुने धार्मिक विश्वास छ ।

मल्लकालिन सम्पदा बाइस धारा

मल्लकालमा बनेको हो, बालाजु बाइस धारा । सबैभन्दा पहिले बालाजुमा कान्तिपुरका राजार जयप्रकाश मल्लले ढुंगे धारा बनाएका थिए । यो नेपाल संवत् ८७५ को कुरा हो । मल्लकालका अन्तिम राजा मानिन्छ, जयप्रकाशलाई । विश्वकै सबैभन्दा सानो मुद्रा प्रचलनमा ल्याउने उनले आफ्नो जीवनकालमा बालाजु ढुंगेधारा र गोकणेश्वरमा मन्दिर बनाए । त्यसबेला उनले बालाजुमा २१ वटा धारा बनाएका थिए । पछि वि.सं. १८५५ मा राजा रणबहादुर शाहले एउटा ढुंगेधारा स्थापना गरे ।

बाइसधारामा नुहाउँदा छाला रोग निको हुने

बालाजु बाइस धारामा नुहाउँदा छाला सम्बन्धी रोग निको हुने विश्वास छ । खासमा यहाँ बग्ने पानीको मुल नुवाकोट डाँडासँग जोडिएको छ । देवीघाटको पानी नै यहाँ आउने र सो पानीले नुहाएमा छाला सम्बन्धी सम्पूर्ण रोग निको हुने विश्वास छ ।

यो ठाउँ काठमाडौं उपत्यकाको पश्चिम उत्तरतिर नागार्जुन जंगलमुनी पर्छ । यस स्थानलाई नेवार समुदायले ल्हुति भन्ने गर्छन् । नागार्जुनको वनमा एक किसिमको ल्हुति भन्ने फल पाउने गरिएको र उक्त फलको रस मिसिएर त्यहाँको पानी बग्ने भएकाले उक्त पानी औषधिय महत्वको रहेको बताइन्छ ।

कस्तो छ बाइस धारा क्षेत्र ?

नागार्जुन जंगलको फेंदमा अवस्थित मनोरम पार्क हो यो । करिब १ सय ६२ रोपनी क्षेत्रफलमा फैलिएको छ यो । पछिल्लो समय यो पार्क राजधानीबासी सुस्ताउने गन्तव्य बनेको छ ।

यहाँ बाइसधारासँगै रमाइलो पार्क, मन्दिर, गुम्बा अवस्थित छ । भनिन्छ, भानुभक्त आचार्यले यहाँको सौन्दर्यमा मोहित भएर कविता नै रचना गरेका थिए, ‘यति दिनपछि मैले आज बालाुज देख्या, पृथ्वी तल भरीमा स्वर्ग हो जानी लेख्याँ ।’

Continue Reading…

बम भनिएको कुकरभित्र बासी भात र साबुनका टुक्रा !

५ चैत, विराटनगर । बिहीबार मोरङको सुन्दर हरैचा नगरपालिका- ३ मा भेटिएको शंकास्पद कुकरभित्र बासी भात र साबुनको टुक्रा भेटिएको छ ।

नेत्र विप्लप चन्द विप्लव समूहले बन्द आहृवान गरेको दिन बिहीबार विहान मर्निङ वाक गर्न निस्किएका सर्बसाधरणले शंकास्पद बस्तु भेटेपछि प्रहरीलाई खबर गरेका थिए ।

पूर्वपश्चिम राजमार्गको किनारमा कालो झोलासँगै राखिएको कुकरको बिर्काेमा टेपले बाँधेको तार केही परसम्म तन्काएर लगेको अवस्थामा थियो ।

शंकास्पद बस्तु भेटिएको खबर पाएपछि प्रहरीले नेपाली सेनाको पूर्वी पृतथा गण इटहरीको बम डिस्पोजल टोलीलाई खबर गर्‍यो ।

सुरक्षाको बन्दोबस्तीसहित पुगेको डिस्पोजल टोलीले हेर्दा पुरानो कुकरभित्र बासी भात र साबुनको टुक्रा भेटिएको प्रहरी स्रोतले जानकारी दिएको छ । बिहान करिब साढे ५ बजे भेटिएको बस्तुले आसपासका क्षेत्रका सर्बसाधरण त्रसित भएका थिए ।

तर, कुकरभित्र बासी भात र साबुनका टुक्रा भेटिएको विषयमा प्रहरीले आधिकारिक पुष्टि भने गरेको छैन् । प्रहरीले आतंक सिर्जना गर्न अज्ञात समूहले शंकास्पद बस्तु रोखको बताउँदै आएको छ ।

शंकास्पद बस्तु डिस्पोज गरेको बताउँदै मोरङ प्रहरी उपरीक्षक मनोज केसीले भात भएको विषयमा जानकारी नभएको बताए । ‘शंकास्पद बस्तुभित्र पड्किने सामग्री थिएन्,’ केसीले भने, ‘ बासी भात भएको जानकारीमा छैन् ।’ उनले आफूसँग भएको फोटोमा पनि भात नदेखिएको बताए ।

Continue Reading…
Loading...

Popular Bla Bla's

Loading...

Latest Bla Bla's on Fun2Sh

Powered by Blogger.
Copyright © Funtoosh Blog