Monday, October 22, 2018

रियल मड्रिडका प्रशिक्षक भन्छन् : अवस्था जे होस् म लडिरहन्छु

५ कात्तिक, काठमाडौं । स्पेनिस क्लब रियल मड्रिडका प्रशिक्षक जुलेन लोपेटेगीलाई एल क्लासिको अघि नै बर्खास्त गर्ने हल्ला चलिरहेका बेला उनले अवस्था जे भए पनि आफू लडिरहने बताएका छन् ।

च्याम्पियन्स लिगमा बुधबार राति पौने १ बजे प्लेजेनसँगको खेलअघि गरिएको पत्रकार सम्मेलनमा लोपेटेगीले यस्तो बताएका हुन् ।

२००१/०२ को सिजन पछि ला लिगामा सबैभन्दा खराब सुरुवात गरेको रियल मड्रिडले च्याम्पियन्स लिगमा पनि सीएसकेए मस्कोसँग १-० ले हारेर कमजोर अवस्था देखाएको छ ।

ला लिगामा ९ खेलमा ४ मा जित, ३ बराबरी र २ मा हार ब्यहोरेको रियल मड्रिड सातौं स्थानमा छ । यसैले सिजनकै पहिलो एल क्लासिको अघि नै लोपेटेगीलाई बर्खास्त गर्ने दाबीसहितका खबरहरु बाहिरिरहेका छन् ।

‘मैले रियल मड्रिडमा सिकेको कुरा भिडिरहन हो । अवस्था जे सुकै होस् म लड्न छाड्ने छैन’ लोपेटेगीले भनेका छन्, ‘हामी सबैलाई थाहा छ नतिजा हाम्रो पक्षमा देखिएको छैन तर हामी लड्न छाड्ने छैनौं ।’

सोमबार पत्रकार सम्मेलनमा बार्सिलोनासँगको खेलमा नरहने भन्ने प्रश्नमा लोपेटेगीले अहिले आफू रियल मड्रिडमा नै रहेको र त्यसभन्दा बाहेक केही भन्न नसक्ने जवाफ दिएका छन् ।

‘तपाईं अर्को महिना के हुन्छ ? अर्को वर्ष के हुन्छ भनेर सोध्नुहुन्छ भने त्यसको जवाफ मसँग हुँदैन । हामी वर्तमानमा केन्द्रित  भएर मेहनत गरिरहेका छौं’ उनले भने ।

लोपेटेगीले थकित र हारेको प्रशिक्षकलाई हेर्ने चाहना छ भने आफूलाई नहेर्न पनि बताएका छन् ।

‘हामी भोलिको खेलका बारेमा सोचिरहेका छौं । त्यसैको तयारीमा छौं । तपाईं हारेको प्रशिक्षक देख्न चाहिरहनु भएको छ भने यता नहेर्नुहोस्’ उनले भने ।

Continue Reading…

माधव नेपालको माग पूरा भएन, नारायणकाजीको राजीनामा अस्वीकृत

५ कात्तिक, काठमाडौं । सत्तारुढ नेपाल कम्युनिस्ट पार्टी (नेकपा) का प्रवक्ता नारायणकाजी श्रेष्ठले पदबाट दिएको राजीनामा अस्वीकृत भएको छ ।

नेकपा केन्द्रीय सचिवालयको सोमबार बसेको बैठकले प्रवक्ताबाट श्रेष्ठले दिएको राजीनामा अश्वीकृत गरेको हो ।

डा.गोविन्द केसीको अनसन प्रकरण र त्यसपछि अध्यक्षद्वय केपी शर्मा ओली र प्रचण्डले गरेका कतिपय निर्णयमा नीतिगत असहमति जनाउँदै श्रेष्ठले यसअघि सचिवालय समक्ष राजीनामा दिएका थिए । उनको राजीनामा लामो समयदेखि अनिणिर्त अवस्थामा थियो ।

सोमबारको बैठकमा बरिष्ठ नेता माधवकुमार नेपालको असन्तुष्टिदेखि प्रवक्ता श्रेष्ठले उठाएका नीतिगत विषयमा समेत लामो छलफल भएको स्रोतले जनाएको छ ।

आइतबारको बैठकमा बामदेव गौतमले आफ्नो असन्तुष्टि पोखेका थिए । सो बैठकले सांसद रामवीर मानन्धरको राजीनामा अस्वीकृत गरेको थियो ।

सोमबारको बैठकमा नेताहरुका असन्तुष्टि र नीतिगत रुपमा उठाएका प्रश्नहरुलाई गम्भीरतापूर्वक लिने र आगामी दिनमा सच्याउँदै अघि बढ्ने प्रतिवद्धता अध्यक्षद्धयले व्यक्त गरेका थिए । बैठकमा विशेषतः अध्यक्ष तथा प्रधानमन्त्री केपी शर्मा ओलीको कार्यशैलीप्रति नेताहरुको असन्तुष्टि थियो ।

प्रदेश इञ्चार्ज तोक्ने निर्णय सदर

अघिल्लो सचिवालय बैठकले सात प्रदेशका इञ्चार्ज, सहइन्चार्ज, अध्यक्ष र सचिव चयन गरेको निर्णयमा माधव नेपालले लिखित असहमति जनाएका थिए । उनले सो निर्णय फिर्ता लिनुपर्ने र मापदण्ड बनाएर सच्याउनुपर्ने प्रस्ताव राखेका थिए ।

तर, आइतबार र सोमबार बसेको बैठकले प्रदेश कमिटी गठनसम्बन्धी निर्णयलाई भने उल्ट्याएन ।

माधव नेपालले राखेको लिखित प्रस्तावमा गम्भीर छलफल भएको र आगामी दिनहरुमा कमजोरी सच्याउने प्रतिबद्धता आएको बैठकपछि प्रवक्ता नारायणकाजी श्रेष्ठले बताए ।

पार्टीका विभिन्न कमिटीहरुको एकीकरण र जनवर्गीय संगठनहरुको एकताबारे छलफल गर्न बुधबार सचिवालयको बैठक पुनः बस्ने भएको छ । सो बैठकले एकताको प्रस्ताव तयार पारेर कात्तिक १२ र १३ गते बस्ने बस्ने स्थायी कमिटी बैठकमा पेश गर्ने तयारी छ ।

Continue Reading…

पीपीएलको टुर्नामेन्ट डाइरेक्टरमा उमेश पट्वाल नियुक्त

५ कात्तिक, काठमाडौं । पोखरा प्रिमियर लिग (पीपीएल) क्रिकेट प्रतियोगिताको टुर्नामेन्ट डाइरेक्टरमा उमेश पट्वाल नियुक्त भएका छन् ।

क्विन्स इभेनट्स प्रालीले प्रेस विज्ञप्ति जारी गर्दै उमेश पट्वाललाई टुर्नामेन्ट डाइरेक्टरमा नियुक्त गरेको जानकारी दिएको छ । उमेशले नेपालको ब्याटिङ कन्सल्ट्यान्टको रुपमा समेत काम गरिसकेका छन् ।

त्यस्तै, अफगानिस्तानको समेत प्रशिक्षक रहेका उमेश अनुभवी भारतीय क्रिकेटर मानिन्छन् । पीपीएललाई चर्चामा ल्याउन नभई प्रभावकारी तरिकाले आईसीसीकै स्तरको प्रतियोगिता बनाउन उमेशलाई टुर्नानामेन्ट डाइरेक्टर बनाएको प्रबन्ध निर्देशक छुम्बी लामाले जानकारी दिए ।

पोखरामा आगामी कात्तिक ९ देखि २० गतेसम्म पोखरा प्रिमियर लिग (पीपीएल) टी-२० क्रिकेट प्रतियोगिता सुरु हुदैछ । पीपीएल पोखरा रंगशालास्थित क्रिकेट मैदानमा हुदैछ । प्रतियोगितामा विराटनगर टाईटन्स, चितवन राईनोज, पोखरा पल्टन, बुटवल ब्लास्टर, काठमाडौं रोयल्स र एक्स्पर्ट धनगढी ब्लुज गरी ६ टिम रहेका छन् ।

Continue Reading…

फेसबुक र टि्वटरमा बहस : शीतलनिवासमा को-को निहुरिए ? (तस्वीरसहित)

५ कात्तिक, काठमाडौं । दशैंको टीका सकिनासाथ सामाजिक सञ्जालमा एउटा तस्वीर भाइरल भएको छ ।

तस्वीरमा पूर्वप्रधानन्यायाधीश गोपाल पराजुली राष्ट्रपति विद्यादेवी भण्डारीका सामु दशैंको टीका थाप्न दुबै घुँडा टेकेर खडा भएका छन् । र, यो तस्वीरलाई लिएर गणतन्त्रमा पनि राजतन्त्रकालीन अवशेष देखा परेको भन्दै सामाजिक सञ्जालमा चर्को आलोचना भइरहेको छ ।

गोपाल पराजुलीले राष्ट्रपतिसामु घुँडा टेकेको तस्वीर सामाजिक सञ्जालमा देखेपछि यसप्रति आलोचनामात्रै भएको छैन, कसैले यो दृश्यको बचाउसमेत गर्न खोजेका छन् ।

नेकपाका केन्द्रीय सदस्य सूर्य थापाले लामो फेसबुक स्टाटस लेख्दै यो तस्वीरको बचाउ गरेका छन् । थापाले भनेका छन्-‘राष्ट्रपतिज्यूलाई यसरी विवादमा तान्ने परम्पराको अभ्यास गराउने को हो ? नागरिक हैसियतको यसरी हुर्मत लिने गरी राष्ट्र प्रमुखलाई विवादित बनाउने रवैया मान्य हुन सक्दैन ।’

सामाजिक सञ्जालमा दुईथरि बहस

दशैंमा शीतलनिवासमा आयोजना गरिएको टीका ग्रहण कार्यक्रमलाई लिएर सामाजिक सञ्जालमा दुईथरि विचारहरु आएका छन् । अधिकांश मानिसहरुले गणतन्त्रमा पनि राजतन्त्रमा जस्तै संस्कार देखिएको तर्क गरेका छन् । देशमा परिस्थिति बदलिए पनि मनस्थिति नबदलिएको बहुसंख्यक मानिसहरुको तर्क छ ।

तर, केहीले चाहिँ हाम्रो परम्परा र संस्कारलाई गलत अर्थ लगाउन नहुने र टीका लगाउँदा झुकेको आधारमा राष्ट्राध्यक्षको ‘मानमर्दन’ गर्न नहुने जिकिर गरेको देखिन्छ ।

आखिर शीतलनिवासमा टीका ग्रहण गर्दा देखिएका यस्ता दृश्यले के संकेत गर्छन् ? यो हामीले अवलम्वन गर्नुपर्ने संस्कृति भित्रैको कुरो हो या विकृति हो ? के यो दृश्य राजतन्त्रकालीन समयलाई सम्झाउनेखालकै हो त ? यसबारे अहिले सामाजिक सञ्जालमा जुन बहस भइरहेको छ, यसले पक्कै पनि चाडपर्वप्रति राज्यले अवलम्वन गर्ने नीतिबारे समीक्षा गर्नुपर्ने ठाउँमा हामी सबैलाई पुर्‍याएको देखिन्छ । यो समीक्षाले निश्चय नै एउटा उचित निश्कर्ष निकाल्ने छ ।

गोपाल पराजुलीले घुँडा टेकेको तस्वीरमा नेकपा नेता सूर्य थापाको स्टाटसमाथि बरिष्ठ पत्रकार तीर्थ कोइरालाको प्रतिक्रिया यस्तो छ- ‘आदर गरेका मानिससँग टीका लगाउनु स्वाभाविक हो । कतिपय पदीय मर्यादा र बाध्यता पनि हुन्छन् । तर, यसमा राष्ट्रपति निवासको व्यवस्थापन र सल्लाहकारको ध्यान नपुगेको प्रष्ट देखियो ।’

पत्रकार कोइरालाले भनेजस्तै शीतलनिवासमा टीका लगाउने क्रममा दुईखाले व्यवस्थापन देखिएको थियो । केही आगन्तुकलाई कुर्सीमा राखेर टीका लगाइएको थियो भने केहीलाई कुर्सीको व्यवस्था नभएकाले उनीहरु झुक्न बाध्य बनेका थिए । प्रधानमन्त्री केपी शर्मा ओली र केही मन्त्रीहरुलाई कुर्सीमा राखिएको थियो, तर वामदेव गौतम, प्रहरी प्रमुखलगायतका व्यक्तिहरुलाई कुर्सीको प्रवन्ध नहुँदा उनीहरु पूरै झुक्नुपरेको तस्वीरमा देख्न सकिन्छ ।

को-को निहुरिए ?

राष्ट्रपतिका हातबाट टीका ग्रहण गर्ने क्रममा घुँडा टेकेर निहुरिने व्यक्ति पूर्वप्रधानन्यायाधीश गोपाल पराजुली एक्ला व्यक्ति होइनन् ।

टीकाको दिन अनलाइनखबरले खिचेका केही तस्वीरहरु हेर्दाखेरि त्यहाँ प्रहरी महानिरीक्षक सर्वेन्द्र खनालले पनि घुँडा टेकेर टीका ग्रहण गरेको देखिन्छ । पूर्वप्रधान सेनापति राजेन्द्र क्षेत्री पनि त्यसैगरी प्रस्तुत भएको देखिन्छ ।

त्यसैगरी निकै अग्लो कदका नेकपा नेता वामदेव गौतम पनि धनुष्टंकार आकारमा निहुरिन बाध्य बनेको देखिन्छ । तर, प्रधानमन्त्री, मन्त्री र मन्त्रीका परिवारजन चाहिँ आरामले कुर्सीमा बसेर टीका थापेको दृश्य तस्वीरमा देख्न सकिन्छ ।

हेर्नुहोस् केही तस्वीर

 

तस्वीरहरु- विकास श्रेष्ठ/अनलाइनखबर

Continue Reading…

पिङ खेल्दा लडेर बालिकाको मृत्यु

५ कात्तिक, सिन्धुली । सिन्धुलीको कमलामाई नगरपालिका-६ राममाडीमा पिङबाट लडेर एक बालिकाको मृत्यु भएको छ ।

स्थानीय ५ वर्षकी रिषा नेपालीको सोमबार पिङ खेल्ने क्रममा लडेर मृत्यु भएको प्रहरीले जनाएको छ ।

चौताराको बरको रूखमा लगाएको पिङ खेल्ने क्रममा लडेर बेहोस भएकी उनको जिल्ला अस्पताल सिन्धुलीमा उपचारको क्रममा मृत्यु भएको प्रहरीको भनाइ छ ।

Continue Reading…

यसरी बनाउने माछाको अचारः कति स्वादिलो, कति सजिलो ?

चाडपर्वको बेला छ । दशैंको चहलपहल अझै बाँकी छ । केही सातापछि तिहार आउँदैछ । चाडपर्वको बेला आगन्तुकलाई नयाँ-नयाँ परिकार चखाउने रहर हुन्छ । सामान्य दिनमा पाक्ने भन्दा बेग्लै खान्की बनाएर चखाउनुको आनन्द कम हुन्छ ?

खाना बनाउनु आफैमा कला पनि हो । खानेकुरा उही हो, मरमसला उही हो । तर, पकाउने विधी थोरै बदल्नुपर्छ, त्यही खानामा अनेकथरी स्वाद निकाल्न सकिन्छ ।

यसरी खानेकुरा पकाउन धेरै सरसामाग्री चाहिने पनि होइन । न त बढी मेहनत नै गर्नुपर्छ । वस्, यसका लागि तपाईंमा रुची र लगाव हुनुपर्छ । यहाँ हामीले माछाको परिकार बनाएका छौं । खासगरी माछाको अचार । यो बनाउने विधी सजिलो छ । चाहिने सामाग्री पनि सजिलै उपलब्ध हुन्छ । बनाउन समय लाग्दैन । जबकी यसरी तयार गरिएको माछाको अचारले तपाईंको जिब्रो सजिलै लोभ्याउँछ । यो अचारले एक छाक टार्ने मात्र होइन, हप्ता दिनसम्म राखेर खान सकिन्छ ।

चाडपर्ववाहेक अन्य दिनमा पनि माछाको अचार बनाएर फ्रिजमा राख्न सकिन्छ । कहिले काहीँ हतारमा खाना बनाउने समय नहुँदा माछाको अचारसँग खाना खाए हुन्छ ।

कसरी बनाउने माछाको अचार ?

अचारका लागि फ्रेस अझ संभव भएसम्म जिउँदो माछा राम्रो हुन्छ । मझौला आकारको माछालाई एउटै आकारमा स्लाइस गर्ने । राम्ररी सफा गर्ने । माछा तयार भएपछि त्यसका लागि अन्य आवश्यक सामाग्री तयार गर्ने ।

आवश्यक सामाग्री

– बेसार, नुन, रातो खुर्सानीको धुलो र भेनिगर ।

– गोलभेंडा (पेस्ट बनाउने), लसुनको पेस्ट ।

– तोरीको दाना, कडी पत्ता

– माछा तार्नका लागि तेल र त्यसमा मिसाउने नरिवलको तेल चाहिन्छ ।

कसरी बनाउने ?

– माछालाई भाँडामा राखेर नुन, बेसार र रातो खुर्सानीको धुलो राख्ने । त्यसमा थोरै भेनिगर राख्ने र राम्ररी मोल्ने ।

– यसरी मेरिनेट गरिसकेको माछालाई आधा घण्टा राख्ने ।

– अब एउटा प्यानमा तेल तताउने । त्यसमा थोरै नरिवलको तेल मिसाउने ।

– तेल तातिएपछि माछा फ्राइ गर्ने । तर, डिप फ्राइ गर्नु हुँदैन । ठिक्क फ्राइ गरिसकेपछि निकाल्ने ।

– अब त्यही प्यानमा बाँकी रहेको तेल निकाल्ने । थोरै तेल बाँकी राख्ने । उक्त तेलमा तोरीको दाना र कडिपत्ता राखेर झान्ने ।

– अब त्यसमाथि लसुन र गोलभेंडाको पेस्ट राखेर पकाउने । सानो आगोमा यसरी पकाउने ताकि, मसला र तेल अलग हुनुपर्छ ।

– यसरी तयार भएको मसलामा माछा राख्ने । त्यसमाथि दुई चम्चा भेनिगर राख्ने । माछाको अचार तयार हुन्छ ।

– यसरी तयार भएको माछाको अचारलाई स्न्याक्सको रुपमा वा खानासँग खान सकिन्छ ।

Continue Reading…

सेयर बजारमा झिनो गिरावट, कारोबार रकम सुधारियो

५ कात्तिक, काठमाडौं । साताको दोस्रो दिन सोमबार सेयर बजारमा झिनो अंकको गिरावट देखिएको छ । सोमबार भएको कारोबारमा नेप्से परिसूचक १ दशमलव ९८ अंकले ओरालो लागेको हो ।

यस अघि आइतबार भने सेयर बजारमा सुधारको संकेत देखिएको थियो । आइतबार करिब ५ अंकले उकालो लागेको नेपसे परिसूचक आइतबार करिब २ अंकको गिरावट आए पनि कारोबार रकम भने बढेको छ ।

आइतबारको तुलनामा सोमबार करिब ३ करोड रुपैयाँ बढीको सेयर कारोबार भएको हो । दिनभरमा भएका ३ हजार ४ सय ९९ कारोबारबाट ७ लाख ३० हजार ३ सय ९९ कित्ता सेयर कारोबार भएको छ ।

जस अनुसार आइतबार १६ करोड ९८ लाख ७८ हजार ९ सय ९० रुपैयाँको सेयर कारोबार भएको नेपाल स्टक एक्सचेञ्जले जनाएको छ ।

Continue Reading…

युएईले अष्ट्रेलियालाई दियो ११८ रनको लक्ष्य

५ कात्तिक, काठमाडौं । ऐतिहासिक टि-ट्वान्टी क्रिकेट खेलमा युएईले अष्ट्रेलियालाई ११८ रनको लक्ष्य दिएको छ ।

अबुधावीस्थित शिख जायद रंगशालामा घरेलु टिम युएईले अष्ट्रेलियालाई ११८ रनको सामान्य लक्ष्य दिएको हो । टस जितेर पहिले ब्याटिङ गरेको युएईले निर्धारित २० ओभरमा ६ विकेटको क्षतिमा ११७ रन बनाउन सक्यो ।

युएईका लागि सैमन अनवरले ४१ रन बनाए । त्यस्तै, सम्मानजनक स्कोर बनाउन युएईका लागि मोहम्मद नभिदले महत्वपूर्ण भूमिका खेले । उनी २७ रनमा अविजित रहे । उनले मात्र १३ बलमा २ चौका र २ छक्का प्रहार गरे । त्यस्तै, युएईका लागि रमिज शाहजादले २२ र चिराग सुरीले १३ रन बनाए ।

युएईले सुरुवाती समयमै कप्तान रोहन मुस्तफा र अश्फाक अहमदलाई शून्य रनमा गुमाएको थियो । १७ रन हुदा तेस्रो विकेट गुमाएको युएईका लागि सैमनले राहत दिएका थिए ।

यता, अष्ट्रेलियका लागि नाथम काउल्टर नाइल र विल्ली स्टांलकले समान २-२ विकेट लिए ।

युएईले अष्ट्रेलियासँग खेल्न लागेको यो पहिलो पटक हो । क्रिकेटको पावर हाउस मानिने अष्ट्रेलियासँग आफ्नै घरेलु भूमिमा एक दिवसीय मान्यता प्राप्त राष्ट्र युएईले खेल्ने अवसर पाएको हो ।

Continue Reading…

अदालतको कामलाई कुनै शक्तिले प्रभावित पार्न सक्दैन : प्रधानन्याधीश मिश्र

५ कात्तिक, बुटवल । प्रधानन्याधीश ओमप्रकाश मिश्रले कुनै पनि बाहृय शक्ति, आन्तरिक शक्ति, प्रलोभन र आश्वासनले अदालतको कामलाई प्रभावित गर्न नसक्ने बताएका छन् । सत्ता र सरकार बदलिए पनि न्याय क्षेत्र प्रभावित हुन नसक्ने उनको भनाइ छ ।

सोमबार भैरहवामा आयोजित कार्यक्रममा प्रधानन्याधीश मिश्रले अदालतले गरेका आदेशहरु सरकारले कार्यान्वयन नगरेको गुनासो गरे ।

अदालतले गरेको आदेश र फैसालाको २० प्रतिशत पनि सरकारले कार्यान्वयन नगरेको उनको भनाइ छ । १५ प्रतिशत मुद्धा मात्र अदालतसम्म आउने भन्दै प्रधानन्याधीश मिश्रले समाजमा भएका ८५ प्रतिशत मुद्धा अदालतसम्म ल्याउन मानवअधिकारकर्मी र समाजका अगुवाहरुले सहयोग गर्नुपर्ने बताए ।

गरिबी, अज्ञानता तथा विभिन्न कारणले नागरिकहरु न्याय नपाएरै बसेको भन्दै अन्यायमा परेका नागरिकलाई अदालतसम्म ल्याउन र न्याय दिलाउनु सबैको दायित्व भएको बताए ।

उनले जिल्ला र उच्च अदालतहरुले समयसीमा भित्र मुद्दाहरु फछर्यौट गर्ने गरे पनि न्यायाधीशहरुको अभावमा सर्वोच्च अदालतमा मात्र मुद्दाहरु चाप यथावत रहेको बताए ।

Continue Reading…

इंग्ल्याण्डसँगको टेस्टपछि हेराथको सन्यास

५ कात्तिक, काठमाडौं । टेस्ट क्रिकेटमा सफल देब्रे हाते श्रीलंकन बलर रंगना हेराथले इंग्ल्याण्डसँगको पहिलो टेस्टपछि सन्यास लिने भएका छन् । इंग्ल्याण्डसँगको पहिलो टेस्ट श्रीलंकाकै गलीमा नोभेम्बर ६ मा सुरु हुँदै छ ।

४० वर्षका हेराथले २०१७ जनवरीपछि पूरा टेस्ट सिरिज खेलेका छैनन् । हेराथले ९२ टेस्टको १ सय ६८ इनिङमा ४ सय ३० विकेट लिएका छन् ।

१९९९ मा गली मैदानमा खेलेर नै टेस्ट डेब्यू गरेका हेराथले त्यही ९९ विकेट लिइसकेका छन् । यसैले उनका लागि गली मैदानबाटै सन्यास लिनु विशेष हुने छ ।

Continue Reading…

कपिलवस्तुको कृष्णनगरमा फेरि कर्फ्यू लगाइयो

५ कात्तिक, कपिलवस्तु । कपिलवस्तु जिल्लाको कृष्णनगरमा सोमबार साँझ ५ बजेदेखि फेरि कर्फ्यू लगाइएको छ । जिल्ला प्रशासन कार्यालयले सूचना प्रकाशित गरी मंगलबार विहान ६ बजेसम्मका लागि कर्फ्यू लगाएको हो ।

पूर्वमा सेमरा गाउँ,  पश्चिममा झण्डीनगर, सिर्सिहवा चोक, उत्तरमा- कृष्णनगर नगरपालिका १ शिवानगरको बढया पोखरी क्षेत्र र दक्षिणमा नेपाल भारत दशगजा क्षेत्रसम्म कर्फ्यू लगाइएको छ ।

निषेधित क्षेत्रभित्र भेला हुन, आवतजावत गर्न र हुल हुज्जत जस्ता क्रियाकलाप नगरी घरमै बस्न प्रशासनले आग्रह गरेको छ ।

मूर्ति विसिर्जनको विषयलाई लिएर दुई समूहबीच भएको विवादपछि उत्पन्न झडप नियन्त्रणका लागि जिल्लाको कृष्णनगरमा आइतबार साँझ ५ बजेदेखि कर्फ्यू लगाइएको थियो ।

स्थिति सामान्य बन्दै गएपछि सोमबार साँझ ५ बजेसम्मका लागि कर्फ्यू हटाइएको थियो । तर रातको समयमा फेरि कर्फ्यू लगाइएको हो । कर्फ्यू हटेपछि सोमबार दिउँसो भारतीय सीमावर्ती कृष्णनगर बजारमा केही चहलपहल देखिएको थियो ।

कृष्णनगर बजार क्षेत्रमा शनिबार दुर्गा पूजाको मूर्ति विसर्जन गर्ने क्रममा स्थानीय दुई पक्षबीच विवाद भएको थियो । आइतबार कडा सुरक्षाका बीच दुर्गा पूजाको मूर्ति विसर्जन गरिएको थियो ।

Continue Reading…

तिहारमा १७ लाख माला चाहिने, मूल्य पनि बढ्ने

५ कात्तिक, काठमाडौं । यस वर्षको तिहारमा गत वर्षभन्दा दुई लाख बढी फूलको माला खपत हुने भएको छ ।

गत वर्ष तिहारमा १५ लाख माला खपत भएको थियो । यस वर्ष भने बजारमा १७ लाख मालाको माग रहेको बताइएको छ । मुख्यगरी तिहारमा प्रयोग हुने सयपत्री, मखमली र गोदावरी फूलमध्ये सयपत्री मात्रै भारतबाट ल्याउनुपर्ने अवस्था छ ।

अघिल्ला वर्षको तुलनामा यस वर्ष तिहार ढिला परेको छ जसका कारण स्थानीय फूल फुलेर सुकिसकेका छन् । पात्रो हेरेर व्यावसायिक रुपमा फूल लगाउनाले व्यवसायीको मात्रै फूल प्रयोग गर्न मिल्ने अवस्थामा रहेकाले स्वदेशी उत्पादनमा कमी देखिने हुँदा पहिलेभन्दा फूलको मूल्यमा केही वृद्धि हुनेछ ।

यस वर्ष उपभोक्ताले एउटा सयपत्री मालाको मूल्य ६० देखि ७० रुपैयाँसम्म बढी तिर्नुपर्ने देखिन्छ । गत वर्ष ५० देखि ६० रुपैयाँभन्दा बढी मूल्यमा माला किन्नुपर्ने अवस्था नरहेको फ्लोरीकल्चर एशोसिएशनले जनाएको छ ।

प्रत्येक वर्ष १० देखि १५ प्रतिशत स्वदेशी फूल उत्पादनमा वृद्धि हुने गरे पनि माग बढेकाले यस वर्षको तिहारका लागि दुई लाख बढी माला आयात गरिने एशोसिएशनका अध्यक्ष कुमार कसजु श्रेष्ठले जानकारी दिए ।

यस वर्ष भारतबाट ३० लाख रुपैयाँ बराबरको तीन लाख सयपत्री फूलको माला ल्याइँदै छ । तिहारमा मात्रै रु एक करोड फूलको कारोवार हुनेछ । ‘यस पटकको तिहारमा भारतबाट अत्यन्तै थौरै मूल्यको माला आयात गर्ने तयारी रहे पनि माग बढेकाले फूलको माला आयातमा वृद्धि गर्नुपरेको छ’, श्रेष्ठले भने ।

अहिले स्वदेशमा नै ९० प्रतिशत फूल उत्पादन हुन थालेकाले १० प्रतिशत मात्र भारतबाट ल्याउनुपर्ने बाध्यता छ । यसअघिका वर्षमा १८ प्रतिशत फूल भारतबाट आयात गर्नुपर्ने अवस्था थियो ।

६० प्रतिशत माला खपत

काठमाडौँ उपत्यकामा सबैभन्दा बढी ६० प्रतिशत माला खपत भएको छ । स्वदेश र विदेशमा गरी गत वर्ष रु एक अर्ब ८५ करोडको फूलको कारोबार भएको थियो ।

तिहार र अन्य मौसममा गरी रु ११ करोड बराबरको फूल वर्षिक रुपमा विदेशबाट आयात गरिँदै आएको छ । मुख्यगरी कात्तिकदेखि फागुनसम्म विभिन्न चाडबाड र विवाहको मौसम पर्ने हुँदा फूल बढी प्रयोग हुने गरेको छ ।

तिहारमा सयपत्री र प्रणय दिवसमा रातो गुलाब आयात गर्नुपरे पनि मखमली र गोदावरी फूलमा नेपाल आत्मनिर्भर बनिसकेको अवस्था छ । अष्ट्रेलिया र मलेसियामा धेरै नेपालीले बसोबास गर्ने गरेकाले तिहारमा ती देशमा मखमली फूल निर्यातसमेत हुन थालेको अध्यक्ष श्रेष्ठले बताए ।

विशेषगरी तिहारका लागि सयपत्री र अन्य समयमा सजावटका लागि केही फूल भारतबाट आयात हुने गरेको छ । व्यावसायिक रुपमा ४५० प्रजातिका फूल नेपालमा उत्पादन हुँदै आएको छ । यस व्यवसायबाट ४१ हजारभन्दा बढी व्यक्तिले प्रत्यक्ष वा अप्रत्यक्ष रूपमा लाभ लिएका छन् । नेपालमा लगभग १५३ हेक्टर क्षेत्रफलमा ७०० व्यवसायीले यसको खेती गर्दै आएका छन् ।

नेपालमा विसं २००७ देखि शुरु भएको पुष्प व्यवसाय शहरीकरणको विकास तथा विस्तारसँगै फस्टाउँदै गएको छ । फूलको मागमा आएको वृद्धिसँगै विशेषगरी काठमाडौँ, ललितपुर, भक्तपुर, कास्की, चितवन, मकवानपुर, काभ्रेपलाञ्चोक, गुल्मी, पाल्पा, धादिङ, मोरङलगायत ४१ जिल्लामा लगभग ६७५ पुष्पखेती तथा नर्सरी विस्तार भइसकेको छ ।

Continue Reading…

यसरी गरौं जाडोको स्वागतः के गर्ने, के नगर्ने ?

दशैंको रौनक सेलाउँदै जाँदा हामीलाई चिसो अनुभव हुन थालेको छ । हो त, मौसमी तापमान ओह्रालो लाग्दैछ । वायुमण्डलमा चिसो हावा चल्न थालेको छ ।

जब-जब जाडो बढ्दै जान्छ, हाम्रो आङमा लुगा थपिदै जान्छ । शरीरले न्यानो, बाग्लो लुगा खोज्न थाल्छ । जाडोसँग सन्तुलन मिलाउनका लागि न्यानो लुगा लगाउनैपर्छ । तर, यतिले मात्र समस्याको हल हुँदैन । किनभने जाडोले अरु पनि केही चुनौती एवं समस्या थपेर आउँछ ।

जाडोको समस्या

जाडोमा स्वास्थ्य सम्बन्धी समस्या बढ्छ, सौन्दर्य सम्बन्धी समस्या बढ्छ । मुटु रोगी, उच्च रक्तचापका रोगी, दमका रोगी आदिलाई जाडोले थप समस्यामा पार्न सक्छ । जाडोमा हाम्रो शरीरका मांसपेशीहरु खुम्चन्छन् । यसले रगतका नसाहरु साँघुरिन पुग्छ । नतिजा, उच्च रक्तचाप थप बढ्छ ।

त्यस्तै दमका रोगीलाई पनि जाडो यामले बढी सताउँछ । थाइराइडका समस्याले ग्रस्तहरुका लागि पनि यतिबेला थप कष्टकर बन्न पुग्छ ।

जाडो मौसममा सबैभन्दा बढी त रोगी, बुढापाका, बालबालिका, सुत्केरीलाई गाह्रो हुन्छ । बुढापाकाहरु चिसोले कक्रिन्छन् । जोर्नी दुख्ने समस्या थप बढ्छ । बालबालिकालाई रुघा लाग्ने, निमोनिया हुने संभावना बढ्छ ।

त्यसबाहेक हाटखुट्टा, ओंठ फुट्ने, छाला खस्रो हुने, कपलामा चाया पर्ने जस्ता समस्या चिसो हावासँगै आउने गर्छ । वायुमण्डलमा चल्ने हावा यसबेला चिसो मात्र होइन, सुख्खा पनि हुन्छ । त्यही कारण छाला, कपाल रुखो हुन्छ ।

के नगर्ने जाडोमा ?

मौसमी तापमान घट्दै गएपछि हामीले आफ्नो शरीरको तापमानलाई भने सन्तुलित राख्नुपर्छ । यसका लागि न्यानो कपडा नै उपयुक्त हुन्छ । तर, शरीरलाई न्यानो कपडाले ढाक्दैमा शरीर तातो हुन्छ भन्ने होइन ।

के गर्ने ?

प्राकृतिक न्यानोपनका लागि शारीरिक सक्रियता महत्वपूर्ण हुन्छ । यसका लागि हिँडडुल गरिरहने, व्यायाम गर्ने वा शारीरिक श्रममा जोड दिने गर्नुपर्छ । शारीरिक श्रम गर्दा सबै अंग प्रत्यांग सक्रिय हुन्छ । रक्तप्रवाह सुचारु हुन्छ । शरीर स्वतः न्यानो हुन्छ ।

के नगर्ने ?

जाडो भगाउने वाहनामा धेरैले मदिरापान गर्छन् । चुरोट सेवन गर्छन् । मदिरापान गर्दा, चुरोट पिउँदा न्यानो हुन्छ भन्ने कतिलाई भ्रम छ । कतिले चिया, कफी खाएर पनि जाडो भगाउने मेलोमेसो गर्छन् । तर, यसले शरीर न्यानो हुने होइन । बरु थप रोग निम्त्याउँछ ।

के गर्ने ?

तात्तातो खानेकुरा खासगरी झोलयुक्त खानेकुरा सेवन गर्नुपर्छ । मौसमी फलफूल खानुपर्छ । यसबेला मौसम सुख्ख हुने भएकाले शरीरमा पानीको अभाव हुन्छ, त्यसैले पर्याप्त पानी पिउनुपर्छ ।

के नगर्ने ?

जाडोमा हामी हिटर ताप्छौं । कोइला बालेर ताप्छौं । अँगेनामा आगो ताप्छौं । बेलाबखत यसरी शरीरलाई तताउन ठिक हुन्छ । तर, जाडो कटाउनका लागि यसको प्रयोगलाई जोड दिनु राम्रो हुँदैन ।

के गर्ने ?

हिटर होस् वा कोइला बालेर ताप्दा, धेरै लामो समय बस्नु हुँदैन । साथै धेरै नजिक पनि बस्नु उपयुक्त हुँदैन । राती सुत्नेबेला कतिले कोइला बालेर कोठा न्यानो बनाउने प्रयास गर्छन् । यो पनि राम्रो तरिका होइन । अझ झ्यालढोका थुनेर कोइला बाल्दा नराम्रो नतिजा पनि झेल्नुपर्ने हुनसक्छ । त्यसैले यस्ता कुरामा सर्तक हुनुपर्छ ।

Continue Reading…

अहिले पनि कांग्रेस बलियो छ : महामन्त्री कोइराला

५ कात्तिक, विराटनगर । नेपाली काङ्ग्रेसका महामन्त्री डा. शशाङ्क कोइरालाले नेपाली काङ्ग्रेसको अस्तित्व अहिले पनि बलियो रहेको बताएका छन् ।

विराटनगर विमानस्थलमा सोमबार सञ्चारकर्मीसँगको सङ्क्षिप्त कुराकानीमा उहाँले सो कुरा बताउँदै जति सक्दो पार्टीको महासमितिको बैठक बस्नुपर्ने पर्नेमा जोड दिए । उनले पार्टीभित्र देखिएको गुटबन्दीले गर्दा निर्वाचनमा पराजयको स्थिति भोग्नुपरेको चर्चा गर्दै यसको जस–अपजस नेतृत्वले मात्र होइन सबैले लिनुपर्नेमा जोड दिए ।

सोही अवसरमा नेपाली काङ्ग्रेसका नेता तथा पूर्व उपप्रधानमन्त्री विजयकुमार गच्छदारले सरकार सञ्चालन गर्ने जनादेश पाएको वर्तमान सरकार अलमलमा पर्न नहुने तर्क गरे ।

उनले वर्तमान सरकारको सफलतासँगै राजनीतिक उपलब्धि पनि संस्थागत हुने भएकाले युगान्तकारी परिवर्तन गर्न बनेको संविधान पूर्ण कार्यान्वयन हुनुपर्नेमा जोड दिए । नेता गच्छदारले आगामी निर्वाचनमा सफलता हात पार्न नेपाली काङ्ग्रेस अहिलेदेखि नै जनता र कार्यकर्ता माझ जानसक्ने कार्यक्रम तयार गर्नुपर्ने विचार पनि व्यक्त गरे ।

Continue Reading…

चितवनमा किन घट्यो बाघ ?  बाघको क्षमतामाथि नै अध्ययन हुँदै

५ कात्तिक, काठमाडौं । दुर्लभ वन्यजन्तु पाटेबाघको सङ्ख्या घटेपछि चितवन राष्ट्रिय निकुञ्जमा बाघको बहन गर्न सक्ने क्षमता (क्यारिङ क्यापासिटी) बारे अध्ययन थालिएको छ ।

राष्ट्रिय निकुञ्ज तथा वन्यजन्तु संरक्षण विभागका इकोलोजिष्ट लक्ष्मण पौडेलका अनुसार अन्तर्राष्ट्रिय विज्ञको सहभागितामा अध्ययन थालिएको नेपालमै पहिलो हो । विभिन्न देशमा गरिएको तरिका अपनाएर शुरु भएको अध्ययनका लागि अन्तरराष्ट्रिय विज्ञका रुपमा जुलोजिकल सोसाइटी अफ लण्डनका विज्ञ राज अमिन र भारतका वन्यजन्तुविज्ञ अभिषेक सहभागी छन् ।

अध्ययनमा विभागका उपमहानिर्देशक गोपालप्रसाद भट्टराई र इकोलोजिष्ट पौडेल, विश्व वन्यजन्तु कोषका डा. कञ्चन थापा, राष्ट्रिय प्रकृति संरक्षण कोषका डा. नरेश सुवेदी, अर्का विज्ञ डा. भगवानराज दाहाल तथा वन तथा भूसंरक्षण मन्त्रालय र वन विभागका उपसचिवसहितको टोली सहभागी  छन् ।

‘यो फिल्डको काम कम छ, बढी डाटामा खेलेर अध्ययन गर्ने हो, बाघका आहारा प्रजाति के के हो, बाघ कहाँ पाइन्छन् भन्ने सबै थाहा छ, त्यही तथ्याङ्कको आधारमा विज्ञले विश्लेषण गरिरहनुभएको छ’, पौडेलले भने,  ‘उहाँहरुको प्रतिवेदनपछि उपमहानिर्देशक भट्टराई नेतृत्वको प्राविधिक समितिले छलफल गरेर एउटा निचोड निकाल्छ ।’

अघिल्लो महिना सार्वजनिक भएको प्रतिवेदनानुसार चितवन निकुञ्जमा पाँच वर्षमा २७ बाघ घटेको पाइएको थियो । पहिलो चरणमा बाघको अध्ययन थालिएकाले गैँडाको पछि अध्ययन हुने पौडेलको भनाइ छ । यो आर्थिक वर्षमा अध्ययन सक्ने योजना छ ।

राष्ट्रिय निकुञ्जमा कुन वन्यजन्तुको कति बहन गर्न सक्ने क्षमता छ भनेर अहिलेसम्म अध्ययन भएको छैन । चितवन निकुञ्ज करिब ९५३ वर्ग किलोमिटरमा फैलिएको छ । यहाँको मध्यवर्ती क्षेत्र भने करीब ७२९ वर्ग किमीमा फैलिएको छ । सन् २०१३ (विसं २०७०तिर) अनुगमनमा चितवन निकुञ्जमा १२० बाघ थिए ।

यस पटक ९३ मात्रै बाघ पाइएको छ । सन् २०२२(विसं २०७९तिर) सम्ममा बाघको सङ्ख्या दोब्बर बनाइने सरकारी लक्ष्य रहेकाले पनि क्षमताको अध्ययन जरुरी रहेको निकुञ्ज विभागको भनाइ छ । निकुञ्ज बाघ, गैंडा, हात्ती, भालु, गौरीगाई, चितुवा, जरायो, चित्तललगायत ठूला जनावरको समेत महत्वपूर्ण वासस्थान हो ।

इकोलोजिष्ट पौडेलले बहन गर्न सक्ने क्षमताको अध्ययनपछि संरक्षणका रणनीति बनाएर अघि बढ्न सजिलो हुने उल्लेख गर्नुभयो । नेपालकै पहिलो संरक्षित क्षेत्र चितवन राष्ट्रिय निकुञ्ज बाघ र गैंडाको सबैभन्दा ठूलो वासस्थान हो । गणनापछि बर्दिया र शुक्लाफाँटामा केही गैंडा स्थानान्तरण गरिएको छ भने चीन सरकारलाई दुई जोडी गैंडा उपहार दिइएको छ ।

चितवन राष्ट्रिय निकुञ्जका सूचना अधिकारी नुरेन्द्र अर्याल बाघ र गैंडाको सङ्ख्या बहन गर्न सक्ने क्षमताको अध्ययन विशिष्ट प्रकृतिको अध्ययन भएको बताउँछन् । अध्ययनका क्रममा बाघ, गैंडाका आहारा प्रजाति, वासस्थान, पानी, सुरक्षा, चोरी शिकारका चुनौती, चरिचरण भौगोलिक अवस्थालगायत सबै कुराको विश्लेषण हुनेछ । चितवन निकुञ्जका प्रमुख संरक्षण अधिकृत बेदकुमार ढकाल अध्ययन गरेपछि वास्तविक अवस्था पत्ता लाग्ने बताउँछन् । उनका अनुसार नेपालमै पहिलो अध्ययन भएकाले यसलाई अर्थपूर्ण रुपमा हेरिएको छ ।

चितवनका संरक्षणकर्मीले भने वासस्थान नाश हुँदै गएकाले वन्यजन्तु बस्तीमा आउने, सामुदायिक वनमा वासस्थान बनाउने र अर्को क्षेत्रमा सर्ने गरेको जिकिर गर्दै आएका छन् । बाघ संरक्षण उपसमिति रत्ननगरका संयोजक जीतु तामाङ मुख्य गरी बासस्थान संरक्षणमा योजना बन्न नसकेको जिकिर गर्छन् ।

बाघ परिस्थितिकीय प्रणालीको उच्चस्थानमा रहने जनावर हो । लजालु प्रजातिमा पर्ने बाघ मिश्रित खालको जङ्गलमा बस्छ । चुरे क्षेत्रमा आराम गर्न पुग्छ । आहारा प्रजाति र पानीको स्रोत भएको आसपासमा बढी सक्रिय हुन्छ । बाघ दिउँसो आराम गर्ने र साँझ बिहान सक्रिय हुने जनावर हो । बाघको बासस्थानका लागि चुरे, नदी तटीय क्षेत्र र सालको जङ्गल चाहिन्छ । घाँसे मैदानमा चित्तल, जरायो, बँदेललगायत वन्यजन्तु हुने भएकाले शिकार खेल्न जान्छ ।

Continue Reading…

यस्ता साथी-संगतले तपाई  हुनुहुनेछ निरोगी 

यतिबेला सिनेमाघरमा खगेन्द्र लामिछाने स्टारर ‘जय भोले’ प्रदर्शनमा आएको छ, जसको मुलकथा भनेको मित्रता हो । अर्थात फिल्मले साथीको सम्बन्धबारे कथा भन्छ ।

साथी अर्थात मित्रताको सम्बन्धमा हाम्रो समाज निकै उदार छ । समाजले यस्तै मित्रतालाई बलियो बनाउन मितेरी प्रथाको विकास गरेका थिए । साथी वा मित्रताबारे विभिन्न कथाहरु रचना गरिए । कृष्णजी र सुदमाको आदर्श कथाले पनि मित्रताको महत्व दर्शाउँछ ।

साथीको अर्थ आफैमा वृहत, आयमिक छ । साथी, जो आवश्यक्ता परेको बखत हामीलाई साथ दिन्छ । सुखमा साथ दिन्छ, दुखमा हात दिन्छ । एकपटक सोच्नुहोस् त, तपाईंसँग यस्ता साथी कति छन् ? अथवा तपाईंको साथी सर्कलमा यस्ता साथीहरु को को छन् ?

साथी त धेरै होलन् । कार्यलयका साथी होलान् । विद्यालयका साथी होलान् । टोलका साथी होलान् । व्यवसायका साथी होलान् । तर, यी साथीहरुसँग हामी कुनै न कुनै स्वार्थले जोडिएका हौ । किनभने निस्वार्थ जोडिएका साथीहरु हामीसँग एकाध मात्र होलान् ।

भनिन्छ, तपाईंसँग जति धेरै साथीहरु छन्, उत्तिनै जीवन सहज हुन्छ । सुखमय हुन्छ ।

कतिसम्म भने, चिन्ता, तनाव वा डिप्रेसनजस्तो समस्याबाट टाढा रहनका लागि पनि साथीको खाँचो हुन्छ । अर्को महत्वपूर्ण कुरा, तपाईंसँग कति धेरै साथी छन् ? यसले तपाईंको जीवनमा खास अर्थ राख्दैन । बरु तपाईंसँग कस्ता साथी छन् ? यसले तपाईंको जीवनमा विशेष अर्थ राख्छ ।

साथीको अर्थ र महत्व

भनिन्छ, आवश्यक परेको बेला काम लाग्ने साथी नै असल साथी हो । नहोस् पनि किन ? आखिर त्यो साथी नै त हो, जोसित हामी सुखदुखका कुरा गर्छौ । हाम्रो मनको व्यथा सुनाउछौ । हँसीमजाक गर्छौ । रुन्छौ , हास्छौ । आफ्नो मनको पिडा बिसाउँछौ ।

त्यसैले त , समाजमा पनि साथीभाईको विशेष स्थान रहेको हुन्छ ।

साथीको संगत र हाम्रो स्वास्थ्य

साथीभाईका सम्बन्धमा हालै अमेरिकामा गरिएको एक शोध अनुसार पारिवारिक वातावरण, असल घरछिमेक तथा साथीभाईबीच रहने व्यक्तिहरुमा स्वस्थ रहने सम्भावना ५० प्रतिशतसम्म बढ्ने गरेको पाइएको थियो ।

नतिजा अनुसार कम साथी हुनु भनेको स्वास्थ्यका लागि त्यत्ति नै हानीकारक हो जति की रक्सीले मातिनु वा दिनमा १५ वटा सम्म चुरोट पिउनु  ।

बिघ्रम योङ युर्निभसिटीको टिमले १५० अलग अलग अध्ययनको आकडा निकालेर यो निष्कर्षमा पुगेको थियो । अध्ययन सोशल नेटवर्क र मानिसको बाच्ने आधारसित सम्बन्धित थियो ।

सामाजिक पृष्टभूमी भएकाहरुको लामो आयु

यो शोधमा सात वर्षको अवधीमा विभिन्न महादीपका विभिन्न पृष्ठभुमि तथा उमेरका  करिब तीन लाख मानिसमाथि अध्ययन गरिएको थियो । यसमा सामाजिक पृष्ठभूमि राम्रो हुने व्यक्ति स्वास्थ्य एवं आयु लामो भएको पाइएको थियो ।

त्यस्तै, एक्लै बस्ने मानिसको तुलनामा साथीभाई तथा घरपरिवारका साथ समय विताउने मानिसमा जिउँदो रहने सम्भावना डेढ गुणासम्म बढी रहेको पाइएको थियो ।

शोधकर्ता जुलियन टिमथीका अनुसार साथी, सहकर्मी तथा परिवारले हाम्रो स्वास्थ्य तथा जीवनमा विभिन्न तरीकाले सकारात्मक प्रभाव पार्छ ।

‘जब हामी अन्य मानिससित सम्बन्धित हुन्छौ , र उनीहरुप्रति जिम्मेवारीबोध गर्छौ , तब यही भावनाले हामीलाई आˆनो ख्याल राख्न अभिप्रेरित गर्छ र हामी जीवनमा कम जोखिम मोल्न तयार हुन्छौ’, जुलियन भन्छिन् ।

आधुनिक जीवनशैलीका कारण मानिसहरु के सम्म पनि सोच्छन् भने अहिलेको युगमा मानिसलाई आमने सामने बसेर कुराकानी गर्न पनि  खासै जरुरी छैन । जबकी सामाजिक समन्यजस्यता कम हुदाँ मोटोपनाका कारण आयु कम हुने जस्तै मानिसको बाँच्ने आधार पनि कम हुने शोधकर्ताहरुको भनाई छ ।

उनीहरु भन्छन्, आजकलको आधुनिक जीवनशैलीका कारण सामाजिकीकरण हराउँदै गएको छ र मानिस एक्लै हुँदै गइरहेको छ  । मानिसलाई  करियर, परिवार तथा कामको बीचमा तालमेल मिलाउन समस्या भईरहेको छ । जसले गर्दा उनीहरुको आयु समेत कम हुँदै गएको छ’ ।

Continue Reading…

भारतमा एकै परिवारका ४ नेपालीको दुर्घटनामा मृत्यु

५ कात्तिक, काठमाडौं । भारतमा भएको गाडी दुर्घटनामा एकै परिवारका ४ नेपालीको मृत्यु भएको छ, तीन जना घाइते भएका छन् ।

गोरखपुरबाट वारणासीतर्फ गइरहेका बेला राजादेपुर गाउँमा उनीहरु चढेको कारलाई अर्को गाडीले सोमबार ठक्कर दिएको प्रहरीले जनाएको छ ।

दुर्घटनामा मृत्यु हुनेमा ४१ वर्षका नविन श्रेष्ठ, उनकी पत्नी अञ्जली, बुबा गोरख श्रेष्ठ र भाइ उपेन्द्र रहेको प्रहरीलाई उधृत गर्दै भारतीय सञ्चारमाध्यमले जनाएको छ । दुर्घटनामा मृत्यु हुनेहरु सिन्धुली जिल्लाका रहेका भारतीय प्रहरीको भनाइ छ ।

दुर्घटनामा घाइते हुनेमा दुई जना सोही परिवारका महिला सदस्य र कार चालक रहेको प्रहरीले जनाएको छ । उनीहरुको स्थानीय अस्पतालमा उपचार भइरहेको छ ।

Continue Reading…

अष्ट्रेलिया र युएईबीचको टि-ट्वान्टी क्रिकेट खेल सुरु

५ कात्तिक, काठमाडौं । पहिलो पटक अष्ट्रेलिया र युएईबीचको टि-ट्वान्टी क्रिकेट खेल सुरु भएको छ ।

अबुधावीस्थित शिख जायद रंगशालामा घरेलु टिम युएईले अष्ट्रेलियाविरुद्ध टस जितेर ब्याटिङको निर्णय गरेको छ । युएईले अष्ट्रेलियासँग खेल्न लागेको यो पहिलो पटक हो ।

क्रिकेटको पावर हाउस मानिने अष्ट्रेलियासँग आफ्नै घरेलु भूमिमा एक दिवसीय मान्यता प्राप्त राष्ट्र युएईले खेल्ने अवसर पाएको हो ।

यो ऐतिहासिक खेलमा युएईको तर्फबाट कप्तानको भूमिका रोहन मुस्तफाले निभाउँदै छन् । त्यस्तै, अष्ट्रेलियाको कप्तानी आरोन फिन्चले गरेका छन् ।

ऐतिहासिक खेलमा अष्ट्रेलियालाई कडा टक्कर दिने योजनामा युएई छ । अष्ट्रेलिया भने कमजोर मानिएको युएईसँग सहज जित निकाल्ने दाउमा रहेको छ ।

Continue Reading…

मेडिकल कलेजको फोहरले वस्ती नै दुर्गन्धित ! व्यवस्थित गर्न माग

५ कात्तिक, बुटवल । देवदह मेडिकल कलेजबाट निस्कने फोहरमैलाको उचित व्यवस्थापन गर्न स्थानीयले माग गरेका छन् । कलेजबाट उत्पादन हुने फोहर पानी व्यवस्थापन नगर्दा वस्ती नै दुर्गन्धित भएको र प्रदुषण फैलिएको स्थानीयवासीको गुनासो छ ।

कलेजबाट निस्कने फोहर पानीलाई व्यवस्थापन गर्न कलेज प्रशासनलाई पटक/पटक आग्रह गर्दा समेत बेवास्ता गरेका कारण स्थानीयवासी आक्रोशित भएका छन् ।

मेडिकल कलेजभित्र रहेका शौचालयको पानीसमेत बर्षायाममा आउने पानीसंगै बाहिर निस्कदा गाउँ नै प्रदुषित भएको र स्थानीयवासीहरुको घर समेत डुबानमा पर्ने गरेको टोल सुधार संस्थाका अध्यक्ष खड्कबहादुर क्षेत्रीले बताए ।

कलेजबाट निस्कले फोहर पानीका कारण स्थानीयबासीको स्वास्थ्यमा समेत प्रतिकूल असर परेको स्थानीयले गुनासो गरेका छन् । कलेजलाई बारम्बार आग्रह गर्दा पनि फोहर पानी व्यवस्थापन गर्न बेवास्ता गरेको क्षेत्रीले गुनासो गरे । उनले कलेजले तत्काल फोहर व्यवस्थापन नगरे स्थानीयबासी आन्दोलनमा उत्रिन वाध्य हुने बताए ।

मेडिकल कलेजबाट निस्कने फोहोर पानीलाई दीगो रुपमा व्यवस्थित गर्ने दायित्व कलेजको भएको अध्यक्ष केशव भट्टराईले बताए । कलेजको फोहर व्यवस्थापनमा वडा कार्यालय र नगरपालिकाले समन्वय गर्न तयार रहेको उनको भनाइ छ ।

मेडिकल कलेजका प्रमुख रजनिस जिन्दलले कलेजबाट निस्कने फोहर पानीलाई व्यवस्थित गर्न तयार भए पनि बर्षायाममा आउने पानीका कारण समस्या भएको बताए ।

कलेजबाट निस्कने र बर्षायाममा आउने पानीलाई व्यवस्थित गर्न मेडिकल कलेजले लगानी गर्न तयार भए पनि पानी फाल्ने निकास नहुँदा समस्या समाधान गर्न नसकिएको जिन्दलले स्वीकार गरे ।

Continue Reading…

Record number of road deaths in Kathmandu this Dashain

Kathmandu, October 22

A record number of people were killed in road accidents in the Kathmandu Valley during this Dashain, figures from the Valley traffic police show.

A total of 13 people lost their lives to 272 traffic accidents in Kathmandu between October 9-21, eight people were critically injured and 186 other injured, said Metropolitan Traffic Police. The number of on-the-road deaths is more than that recored during the past five Dashains.

Last Dashain, four people had lost their lives in traffic accidents in Kathmandu. A year before that, the toll stood at 10. Police said that in most cases, the driver was drunk.
Continue Reading…

मेस्सी नहुँदा बार्सिलोनाले के गर्ला ?

५ कात्तिक, काठमाडौं । स्पेनिस ला लिगामा मात्रै होइन च्याम्पियन्स लिगमा पनि अगाडि जेसुकै होला प्रशिक्षक एर्नेस्टो भालभर्देले बुझेका छन्, लियोनल मेस्सी नहुँदा बार्सिलानालाई सहज छैन ।

मेस्सी जस्तो लयमा देखिएका खेलाडीको स्थान पूरा गर्न अरु कुनै खेलाडीबाट असम्भव जस्तै देखिन्छ । यो सिजन मेस्सीले १२ गोल गरिसकेका छन् भने ६ गोलका लागि अवसर बनाएका छन् । गोल नगर्दा पनि खेल मिलाउने प्रमुख भूमिकामा उनी देखिएका हुन्छन् ।

बार्सिलोना अहिले मेस्सीको कमि पूरा गर्नेमा भन्दा पनि गल्ती कम गरेर भएका खेलाडीबाट अगाडि बढ्नेमा केन्दि्रत हुन आवश्यक छ ।
मेस्सीले बुझेर गर्ने हरेक कामले बार्सिलोना विश्व फुटबलमा उत्कृष्ट टिमको रुपमा चिनिन्छ । गएको १० वर्षदेखि विश्व फुटबलमा राम्रा स्ट्राइकरका रुपमा देखिएका मेस्सीको स्थानमा कसलाई राख्ने भन्नेमा भालभर्देलाई पनि सहज छैन ।

सेभिल्लासँगको खेलमा घाइते भएर मेस्सी बाहिरिएपछि उनको स्थानमा उसमान डेम्बलेलेलाई खेलाइएको थियो । तर, खेलमा पाएका धेरै अवसरलाई उनले सदुपयोग गर्न सकेनन् । आउँदा खेलमा सुधारिएको प्रदर्शन गरे पनि मेस्सीको कमी डेम्बेलेमार्फत पूरा हुन कठिन छ ।

यदि भालभर्देले च्याम्पियन्स लिगमा इन्टर मिलानसँगको खेल र ला लिगामा रियल मड्रिडविरुद्धको खेलमा डेम्बलेलाई खेलाएमा लुइस स्वारेज र फिलिप कोटिन्होसँग अट्याकमा देखिने छन् ।

भालभर्देसँग रहेको अर्को उपाय माल्कोमको प्रयोग हो । बार्सिलोनाले माल्कोमलाई ल्याएदेखि नै राम्रो अवसर दिएको छैन । यस्तोमा उनको क्षमताको प्रयोग गर्ने र नयाँ अवसर दिने यो एक अवसर पनि हो ।

डेनिस स्वारेज पनि मेस्सी नहुँदाका लागि एक विकल्प हुन सक्छन् । भिलारियलमा रहँदा डेनिस स्वारेजले आफ्नो स्थानमा उत्कृष्ट खेल नै देखाएका हुन् । बार्सिलोनामा पनि पाएका केही अवसरमा उनी कमजोर छैनन् । यसैले डेनिस स्वारेजमाथि पनि विश्वास गर्ने ठाउँ देखिन्छ ।

भालभर्देले स्ट्राइकरमा तीन जनाको ठाउँमा दुई जनालाई खेलाएर पनि मेस्सीको कमी पूरा गर्न सक्छन् । यसअघि दुई स्ट्राइकर खेलाउँदा मेस्सी र स्वारेज अगाडि खेल्ने गर्दथे । अहिले कोटिन्हो र स्वारेजलाई अगाडि खेलाएर मिडफिल्डमा नयाँ प्रयोग गर्ने ठाउँ पनि भालभर्देसँग छ ।

दुई स्ट्राइकर राख्दा मिडफिल्डमा आर्टुरो भिडालले पनि अवसर पाउने छन् । सर्जियो बुस्केट्स, इभान र्‍याकिटिक, आर्थरस र भिडालमा भालभर्देलाई छनोटको अवसर रहने छ ।

च्याम्पियन्स लिगमा इन्टरसँगको प्रमुख खेलमा मात्रै होइन ला लिगामा पनि रियल मडि्रडविरुद्धको महत्वपूर्ण खेल रहेकाले भालभर्देलाई मेस्सीको कमिले अप्ठेरो पर्न सक्छ ।

क्रिष्टियानो रोनाल्डो युभेन्टस गएपछि एल क्लासिकोमा मेस्सी हाबी रहने अनुमान भइरहेका बेला सिजनकै पहिलो एल क्लासिकोमा मेस्सी पनि नहुने भएका हुन् । २००४ पछि मेस्सीबिनाको एल क्लासिको बार्सिलोनाले जितेकै छैन ।

अहिले मेस्सी र रोनाल्डो दुवै नभएको एल क्लासिको कस्तो रहला भन्ने अनुमान पनि सुरु भएका छन् । यो सन् २००७ पछिको मेस्सी र रोनाल्डोबिनाको एल क्लासिको पनि हो ।

२००७ मा मेस्सी घाइते हुँदा एल क्लासिकोमा खेल्न सकेका थिएनन् । रोनाल्डो म्यानचेस्टर युनाइटेडबाट २००९ मा रियल मड्रिड आएपछि एल क्लासिको मेस्सी या रोनाल्डोविहीन भएको थिएन ।

Continue Reading…

ईयरफोन बनिरहेको छ मृत्युको कारण, यसो गरे कसो होला ?

गाडीमा यात्रा गरिरहेकाहरु होस् वा मर्निङ वाक गरिरहेकाहरु, कुनै कामधन्दामा लागिरहेकाहरु होस् वा कलेज धाइरहेकाहरु । धेरैजसो कानमा ईयरफोन ठोसेर एकसूरमा केही सुनिरहेका हुन्छन् ।

कतिपय त ईयरफोन लगाएर सवारीसाधन पनि हाँकिरहेका हुन्छन् । यसको कारणले दिनप्रतिदिन दुर्घटना भइरहेका छन् ।

सवारी चलाउँदा ईयरफोनको प्रयोग गर्नेहरु आफुमात्र दुर्घटनाको जोखिममा छैन, उनीहरुको कारण अरुले यात्रु, बटुवा वा सवारी चालकले समेत ज्यान गुमाउनुपर्ने अवस्था छ ।

यस्ता दुर्घटनाहरुलाई हामी आफैले निमन्त्रणा दिइरहेका छौं । ईयरफोनको प्रयोग गर्दा हामी सचेत हुनुपर्छ । यस्तो अवस्थामा ईयरफोनको प्रगोग गर्दै नगर्ने त ? कि यसको अरु कुनै विकल्प होला ?

हामीले केही सावधानी अपनाएमा संभावित दुर्घटनाहरुलाई सजिलै टार्न सक्छौं । त्यसैले यी कुराहरुलाई सँधै ध्यान दिनुहोस् ।

१. सडकमा हिँड्दा हामी एक जिम्मेवार नागरिकको भूमिकामा हुन्छौ । संगीत सुन्ने वा फोनमा कुरा गर्ने हाम्रो व्यक्तिगत मामिला हो तर सवारी हाँक्दा यसको प्रयोग गरेर अरुको ज्यानसँग खेल्ने कुनै हक हामीलाई छैन । यो गैरकानुनी, गैरजिम्मेवार र असंयमित काम हो ।

२.सडकमा सवारी चलाउँदै गर्दा वा हिँड्दै गर्दा कुनै यस्ता ईयरफोन लगाएर सवारी चलाइरहेको वा बाटोकाट्दै गरेको व्यक्तिलाई देख्नुभयो भने तुरुन्त रोकेर उसलाई त्यसो नगर्न भन्नुहोस् र सामाजिक जिम्मेवारीको महसुस गराउनुहोस् ।

३. हाम्रो एउटा सानो भुल वा जीवनशैली कसैको लागि मृत्युको कारण बन्न सक्छ । त्यसैले सडकमा आफूसँगै अन्य नागरिकहरुको सुरक्षाको पनि ध्यान राख्नुपर्छ ।

४. ईयरफोन र हेडफोनमासानो ध्वनी पनि ठूलो र स्पष्ट सुनिन्छ किनभने कानको धेरै नजिक हुनाले यो ठूलो भोलुममा लगाँउदा हाम्रो हियरिङ लस हुन सक्छ । ईयरफोन लगाउनै परेमा कम आवाजमा त्यसलाई राख्न सकिन्छ । त्यस्तै घर भन्दा बाहिर सडकमा हिँड्दा इयरफोन प्रयोग नगरेकै वेश ।

५. इयरफोनको ध्वनीले वरिपरिको होहल्लाबाट ध्यान हटाउँछ । ईयरफोनबाट आएको भन्दा अर्को ध्वनी हामीले सुन्न सक्दैनौं । यस्तोमा वरिपरिको खतरा, विशेषगरि हर्नको आवाज, नजिकै आइरहेको गाडी वा अरु मानिसहरुको चेतावनी जस्ता आवाजहरु या त कानसम्म पुग्दैन वा त यति विस्तारै महसुस हुन्छ जसले हाम्रो ध्यान खिच्न सक्दैन । नतिजा, सडक दुर्घटना हुन्छन् ।

६. संगीत सुन्ने सौख छ र अक्सर गीतसंगीत सुन्नको लागि ईयरफोनको प्रयोग गरिन्छ भने २ घन्टाभन्दा धेरै समयसम्म तिव्र आवाजलाई नसुनौ । यसले  कानमा धेरै क्षति पुर्याउन सक्छ ।

७. आफ्नो ईयरफोन अरुलाई प्रयोग गर्न दिनु हुँदैन र अरुको ईयरफोन पनि आफूले प्रयोग नगरौं । यसले कानमा ब्याक्टेरियल इन्फेक्सन वा अन्य समस्याको जोखिमलाई कम गर्छ ।

८. इएनटी विशेषज्ञहरुका अनुसार कानले अनावश्यक आवाजलाई पर्दासँग ठोक्काएर फिर्ता पठाइदिन्छ । तर ईयरफोन प्रयोग गर्दा मल्टिपल फ्रिक्वेन्सीका आवाज कानको पर्दासँग ठोकिन्छ तर पनि फेरि फिर्ता कान भित्र नै घुमिरहन्छ जसले हाम्रो कानको नसा कमजोर हुन्छ ।

९.  लामो समयसम्म इयरफोनको प्रयोग गर्नुहुन्छ भने यसले कानको नशालाई असर गर्छ । यो नशाले इलेक्ट्रिक इम्पल्सको आधारमा काम गर्छ र र धेरै समयसम्म ईयरफोनको प्रयोग गर्नाले नशाले काम गर्छ छोड्छ ।

१०. ईयरफोनको अत्याधिक प्रयोगको कारण धेरै युवाहरुमा हियरिङ लस अर्थात कान नसुन्ने समस्या देखिन थालेको छ । अडियोमेट्रीको माध्यमले गरिएको परिक्षणमा ईयरफोनको धेरै प्रयोग गर्ने २५ देखि ३० प्रतिशतलाई यो समस्या भएको पाइएको छ । कानको मुख्य नशा ड्यामेज हुने कारणले यसको उपचार सम्भव छैन ।

Continue Reading…

दशैंमा नयाँ नोट छाप्दा ७९ करोड स्वाहा

५ कात्तिक, काठमाडौं । नेपाल राष्ट्र बैंकले यस वर्ष दशैं अघिसम्म मात्रै करिब ७९ करोड रुपैयाँ खर्च गरेर ६१ अर्ब रुपैयाँ बढीका नयाँ नोट छपाइ गरेको छ ।

राष्ट्र बैंकले ठूलो रकम खर्च गरेर आर्थिक वर्ष ०७५/७६ को पहिलो त्रैयमासमा ४६ करोड ५५ लाख प्रति नयाँ नोट छपाई गरेको हो । राष्ट्र बैंकले अघिल्लो वर्षको सोही अवधिको तुलनामा ५ करोड प्रति बढी नोट छापेको हो ।

चालु आर्थिक वर्षको साउनदेखि असोजसम्मको तीन महिनामा ४१ करोड ५४ लाख प्रति विभिन्न दरका नयाँ नोट छापिएको राष्ट्र बैंकले जनाएको छ । यसै अवधिमा ५ रुपैयाँ दरका ९ करोड ४२ लाख ५० हजार थान, १० रुपैयाँको ९ करोड ७२ लाख थान, २० रुपैयाँको ६ करोड ९६ लाख ५० हजार थान, ५० रुपैयाँ दरका १० करोड १५ लाख थान र १ सय रुपैयाँ दरका ३ करोड ८३ लाख थान नयाँ नोट छापिएको छ ।

यसैगरी ५ सय रुपैयाँ दरका २ करोड ८९ लाख ५० हजार थान र १ हजार रुपैयाँ दरका ३ करोड ५६ लाख थान नयाँ नोट छापिएका छन् ।

७९ करोड खर्चिएर नयाँ नोट

चालु आर्थिक वर्षको पहिलो त्रैयमासमा राष्ट्र बैंकले ६१ अर्ब ८१ करोड ८७ लाख ५० हजार रुपैयाँ बराबरको विभिन्न दरका नयाँ नोट छपाइ गरेको छ । जसमा ५० अर्ब ७ करोड ५० लाख रुपैयाँको भुक्तानी भएको छ भने दशैंका बेला मात्रै ११ अर्ब ७४ करोड ३७ लाख रुपैयाँको नयाँ नोट सटही गरेको छ ।

राष्ट्र बैंकले यति परिमाणमा नयाँ नोट छाप्दा खर्च पनि ठूलै भएको छ । यति नोट छाप्दा करिब ७९ करोड रुपैयाँ राज्यको ढुकुटीको रकम खर्च भएको छ । यस अवधिमा ७८ करोड ९० लाख २८ हजार ७ सय ८१ रुपैयाँ नयाँ नोट छाप्दा मात्रै खर्च भएको राष्ट्र बैंक मुद्रा व्यवस्थापन विभागले जनाएको छ ।

राष्ट्र बैंकले दशैंका लागि भन्दै ५, १०, २०, ५० र १ सय रुपैयाँ दरका नयाँ नोट सटही सुविधा प्रदान गर्यो । वितरण गरिएका यि दरका नोटका लागि मात्रै राज्यको ६२ करोड २८ लाख ६६ हजार ३ सय २२ रुपैयाँ खर्च बेहोरेको छ ।

अघिल्लो वर्षको सोही अवधिमा ६५ अर्ब ४२ लाख ५० हजार रुपैयाँ बराबरका विभिन्न दरका नयाँ नोट छपाइ गर्दा राष्ट्र बैंकले ७२ करोड ११ लाख ७५ हजार ७५ रुपैयाँ खर्च बेहोर्नुपरेको थियो ।

दशैंमा नयाँ नोट : राज्यलाई घाटा

एकातर्फ छपाईमै यतिधेरै खर्च भएको छ भने दशैंमा वितरण गरिएका धेरै नोटहरु विग्रने तथा नष्ट हुने कारणले पनि राज्यकोष ठूलो रकम नयाँ नोटमा खर्च हुने गरेको छ ।

दशैंकै बेला नयाँ नोट वितरण गर्ने चलनले गर्दा सर्वसाधारणहरुले दशैमा पुराना नोट प्रयोग गर्न छाडिसकेका छन् । दशैंमा जे-जसरी हुन्छ नयाँ नोट नै चाहाने सर्वसाधारणको चाहनाले गर्दा मुलुकलाई थप व्ययभार बढेको छ । दशैंमा नयाँ नोट प्रयोग गर्दा अबीर तथा टीका लाग्छ । अझ दक्षिणाको रुपमा दिँदा त अबीर टीका दलेर दिने प्रचलन छ । नोटमा अबीर तथा टीका थप्दा नोटको आयु कम हुने राष्ट्र बैंकका अधिकारीहरु बताउँछन् ।

कुनै नोट विग्रिए राष्ट्र बैंकले त्यस्तो नोट खिचेर नयाँ नोट दिने गरेको छ । त्यो खिचेको नोटको सट्टा राष्ट्र बैंकले अर्को नयाँ नोट छपाउने गरेको छ । यसरी फेरी नोट छपाउँदा राज्यलाई व्यवभार थप हुने गर्दछ । अर्कोतर्फ दशैंमा मादक पदार्थ सेवन गर्नेहरुले नोट च्यात्ने तथा जलाउने साथै तास खेल्दा समेत नोटको जतन नगरी प्रयोग गर्दा च्यातिने गरेका घटनाहरु आउने गरेका छन् ।

दशैंमा वितरण गरिएका धेरै नोटहरु विग्रने तथा नष्ट हुने कारणले पनि राज्यकोष ठूलो रकम नयाँ नोटमा खर्च हुने गरेको छ ।

यसरी दशैंमा वितरण गरिएका नयाँ नोटमा अबीर र टीकाको माध्यमबाट होस् या जुवातास खेल्दा हुने क्षतिका कारण मुलुकको ढुकुटीबाट नै खर्च गर्नुपर्ने अवस्था आउँछ ।

राज्यलाई यसरी वर्षेनी व्यवभार बढ्दै जाने हुँदा दशैंका बेला नयाँ नोट वितरण बन्द गर्ने हो कि भन्ने बहस राष्ट्र बैंकमै शुरु भइसकेको छ । राष्ट्र बैंक स्रोतका अनुसार दशैंकै बेला नयाँ नोट छाप्दा खर्च सँगै व्यवस्थापनको समेत चुनौती सामाना गर्नुपर्ने भएकाले नयाँ नोटका विषयमा नयाँ निर्णय गर्ने गरी छलफल शुरु भएको छ ।

दशैंका बेला नयाँ नोट वितरण गर्दा खर्च दिनप्रतिदिन बढ्दै गएको र व्यवस्थापनको चुनौतीसमेत सामाना गर्नुपर्ने राष्ट्र बैंकका कार्यकारी निर्देशक लक्ष्मीप्रपन्न निरौला बताउँछन् । दशैंमा नयाँ नोट पुरै बन्द नगरे पनि यसमा केही नयाँ निर्णय गर्नु पर्ने उनको भनाइ छ । दशैंका बेला सबै नोट बन्द नगरी कुनै दुई दरका नयाँ नोट वितरण गरे धेरै समस्या कम हुने कार्यकारी निर्देशक निरौला बताउछन् ।

कर्मचारीदेखि सर्वसाधारणलाई सास्ती

नयाँ नोट दशैंका बेला वितरण गर्दा खर्चसँगै व्यवस्थापनमा समेत ठूलो चुनौती देखिएको छ । यस वर्ष राष्ट्र बैंकले दशैंका लागि भन्दै ७ दिनसम्म नयाँ नोट वितरण गरेको थियो ।

राष्ट्र बैंकले वितरण गर्ने भनेको ७ दिनै बैंकिङ कार्यालय थापाथलीमा सर्वसाधारणको घुईचो लागेको थियो । सर्वसाधारणहरु बिहान ३ बजेदेखि समेत नयाँ नोट सटहीका लागि थापाथलीमा लाइन लाग्न पुगेका थिए । यस वर्ष राष्ट्र बैंकले विभिन्न वाणिज्य बैंकहरुमा समेत सटही सुविधा हसने व्यवस्था मिलाएको थियो ।

राष्ट्रिय वाणिज्य बैंक, कृषि विकास बैंक, नेपाल बैंक लगायतका वाणिज्य बैंकहरुमा समेत नयाँ नोट सटही हुने भए पनि सर्वसाधारणलाई सहज भएको थिएन । प्रतिव्यक्ति २७ हजार रुपैयाँसम्म सटही सुविधा लिनका लागि सर्वसाधारणहरुले ३ देखि ७ घण्टासम्म लाइनमा बस्नुपर्ने बाध्यता देखिन्थ्यो ।

सर्वसाधारणलाई मात्रै होइन, कर्मचारीहरुलाई समेत सास्ती उस्तै हुन्छ । बिहान १० बजेदेखि नयाँ नोट वितरण शुरु हुने भए पनि बिहानै सर्वसाधारणको घुँइचो बढेकाका कारण कर्मचारीहरु अझ विहानै गएर व्यवस्थापन गर्नुपर्ने हुन्छ । बिहान १० बजेदेखि कार्यालय समय भए पनि बिहान सबेरै नोट व्यवस्थापनका लागि जानुपर्ने र साझ पनि ढिलामात्रै घर र्फकन पाउने कर्मचारीहरुको अवस्था रहेको थियो ।

निरुत्साहित गर्नैपर्छ : पूर्वगभर्नर क्षेत्री

राष्ट्र बैंकका पूर्व गभर्नर दीपेन्द्रबहादुर क्षत्री दशैंमा हुने नयाँ नोट वितरणको कार्यलाई निरुत्साहित गर्नु पर्ने बताउछन् । नगदरहित कारोबारलाई प्रोत्साहन गर्दै जाने हो भने पनि दशैंमा हुने नयाँ नोटको प्रयोग घट्दै जानै पूर्व गभर्नर क्षत्रीको विस्वास छ ।

दशैंमा हुने नयाँ नोट वितरणका बारेमा जिज्ञासा राख्दा पूर्व गभर्नर क्षत्रीले ब्यूटीपार्लरको उदाहरण दिदै भने, ‘शहरमा जति ब्यूटीपार्लरको संख्या बढ्दै गयो उति मान्छेलाई नक्कल पार्नै पर्ने अवस्था हुँदै गयो । ब्यूटी पार्लर भएपछि मान्छेलाई नक्कल नपारी नहुने भयो । हो त्यस्तै दशै आएपछि नयाँ नोट चाहिन्छ भन्ने बानी बस्यो ।’

नयाँ नोट र पुराना नोटको मूल्य एउटै हुने हुँदा नयाँ नोट नै चाहिन्छ भन्ने मानसिकता त्याग्नुपर्ने उनको भनाइ छ । दशैंका बेला रक्सी खाएर नोट पोल्ने समेत गरेको भन्दै नोट जतन गर्नुपर्छ भन्ने विषयको ज्ञान सर्वसाधारणमा हुनुपर्ने उनले बताए ।

दशैंकै समयमा नयाँ नोट वितरण नगर्ने हो भने राज्यले खर्च तथा व्यवस्थापनको चुनौती सामना गर्नु पर्ने थिएन । राष्ट्र बैंकका एक उच्च अधिकारी भन्छन्- ‘पहिले पहिले नयाँ नोट दिने चलन थिएन, दशैंका बेला यस्तो समस्या आउँदैनथ्यो, नयाँ नोट कुनै निश्चित समय तोकेर बाँड्नु नै गलत हो ।’

Continue Reading…

सडकमै बस पल्टिदा एक जनाको मृत्यु, आठ घाइते

सप्तरी, ५ कात्तिक । सप्तरीको दुई छुट्टाछुट्टै ठाउँमा सोमबार भएको सवारी दुर्घटनामा दुई जनाको मृत्यु भएको छ ।

दुर्घटनामा आठ जना घाइते भएका छन् । पूर्वपश्चिम राजमार्ग अन्तर्गत शम्भुनाथ नगरपालिका ७ मा एक बस आफैं अनियन्त्रित भएर दुर्घटना हुँदा एक जनाको मृत्यु हुनाका साथै आठ जना घाइते भएका छन् ।

प्रहरीका अनुसार पूर्वबाट पश्चिमतर्फ जाँदै गरेको ना ४ ख ४४७० नम्बरको बस आफै अनियन्त्रित भई रोडको उत्तरतर्फ खसेर दुर्घटना भएको हो ।

दुर्घटनामा बसका सहचालक काभ्रे घर भएका ४५ बर्षका दीपक राईको मृत्यु भएको छ । घाइते भएका उनलाई उपचारका लागि लहान लगिए पनि मृत्यु भएको प्रहरीले जनाएको छ ।

दुर्घटनामा घाइते भएकाहरुको स्थानीय मेडिकलमा उपचार भइरहेको छ ।

यस्तै जिल्लाको अग्निसाईर कृष्णासवरण गाउँप्ाालिका १ जण्डौलस्थित पूर्व-पश्चिम राजमार्गमा माइक्रोबसको ठक्करबाट पैदल यात्रुको मृत्यु भएको छ ।

पूर्वबाट पश्चिमतर्फ जाँदै गरेको बा ५ ख १४५१ नम्बरको हायसले पैदल यात्री सोही ठाउँका ६० बर्षीय अन्दुलाल चौधरीलाई ठक्कर दिँदा उनको घटनास्थलमै मृत्यु भएको जिल्ला प्रहरी कार्यालयले जनाएको छ । ठक्कर दिने सवारी साधनलाई नियन्त्रणमा लिएको प्रहरीको भनाइ छ ।

Continue Reading…

सरकारलाई गम्भीर बन्न सुझाव कांग्रेस नेता निधिको सुझाव

५ कात्तिक, विराटनगर । नेपाली काङ्ग्रेसका उपसभापति विमलेन्द्र निधिले वर्तमान सरकार दुई तिहाइ बहुमतको भएकाले यसलाई निरर्थक हुन नदिन सरकार गम्भीर बन्नुपर्ने बताएका छन् ।

विराटनगर विमानस्थलमा सोमबार सञ्चारकर्मीसँग कुरा गर्दै उनले सरकारलाई जनताका पक्षमा तल्लीन भएर काम गर्न सुझाव दिए ।

नेता निधिले काङ्ग्रेसको विधाननुसार नै महासमितिको बैठक बस्ने तयारी भइरहेको र बैठकले विधान संशोधन गरेर भावी राजनीति रणनीति तय गर्ने बताए । ‘नेपाली काङ्ग्रेस पार्टीमा कुनै पनि गुट उपगुट छैन’ उनले भने ।

Continue Reading…

बसलाई उछिन्न खोज्दा टिपर दुर्घटना, एकको मृत्यु, ११ जना घाइते

५ कात्तिक, मेलम्ची । सिन्धुपाल्चोकको जुगल गाउँपालिका याङ्लाकोटबाट बाह्रबिसे गइरहेको टिपर भैँसेमा सोमबार दुर्घटना हुँदा एक जनाको घटनास्थलमै मृत्यु भएको छ ।

बा ४ ख ९०१७ नंको टिपर सडकमै पल्टिँदा ११ जनाभन्दा बढी घाइते भएका छन् । उक्त टिपरले घुम्तीमा अर्को गाडीलाई उछिनेर घुमाउन खोज्दा सडकमा पल्टिएको भैँसे निवासी रामबहादुर तामाङले बताए ।

दुर्घटनाका कारण एक जनाको घटनास्थलमै मृत्यु भएको र बाँकीलाई उपचारका लागि खाडीचौर लगिएको सिन्धुपाल्चोक जिल्ला प्रहरी कार्यालयले जनाएको छ । प्रहरी कुमार श्रेष्ठले मृतकको सनाखत हुन नसकेको र चालक फरार भएको जानकारी दिए ।

Continue Reading…

घट्यो डलरको भाउ

५ कात्तिक, काठमाडौं । अमेरिकी डलरको भाउ केही घटेको छ ।  सोमबारका लागि नेपाल राष्ट्र बैंकले अमेरिकी डलरको विक्रिदर ११७ रुपैयाँ २ पैसा र खरिददर ११७ रुपैयाँ ६२ पैसा तोकेको छ । आईतबार पनि डलरको विनिमय दर यही थियो ।

पछिल्लो एक सातामा अमेरिकी डलरको विनिमयदर ११७ देखि ११८ कै बीचमा छ । २५ असोजमा डलरको भाउ हालसम्मकै उच्च विन्दुमा पुगेको थियो । उक्त दिन राष्ट्र बैंकले डलरको विक्रिदर ११९ रुपैयाँ ३ पैसा र खरिददर ११८ रुपैयाँ ४३ पैसा तोकेको थियो ।

भारतीय रुपैयाँ र नेपाली रुपैयाँबीचको विनिमय दरका कारण अमेरिकी डलर वलियो बन्दा यसको असर नेपाललाई समेत प्रत्यक्ष रुपमा पर्ने गरेको छ ।  नेपाली रुपैयाँ कमजोर बन्दा मुलुकको अर्थतन्त्रमा नकरात्मक असर पर्ने अर्थविद्हरु बताउँछन् । यद्यपि, रेमिट्यान्स आप्रवाहमा भने यसले सकारात्मक असर गर्ने गरेको छ ।

Continue Reading…

बास्तोलाको सम्झनामा कांग्रेसले सबै जिल्लामा श्रदाञ्जली सभा गर्ने

५ कात्तिक, काठमाडौं । नेपाली कांग्रेसले पूर्व केन्द्रीय सदस्य चक्रप्रसाद बास्तोलाको निधनको तेह्रौं दिनमा देशभरी श्रद्धाञ्जली सभा गर्ने भएको छ ।

आगामी बिहीबार ७७ वटै जिल्लामा श्रदाञ्जली सभा गर्न लागेको कांग्रेस प्रवक्ता विश्वप्रकाश शर्माले अनलाइनखबरलाई जानकारी दिए ।

तेह्रौं दिनसम्म शोकका कार्यक्रम गर्नुपर्ने भन्दै कांग्रेसले ७ कात्तिकका लागि निर्धारित चियापान कार्यक्रमको मिति सारेको छ । प्रवक्ता शर्माका अनुसार दशैं, तिहार, छठ, नेपाल सम्वत्लगायत पर्वको अवसरमा कोजाग्रत पूणिर्माका दिन आयोजित चियापान कार्यक्रम कात्तिक १६ गते मध्यान्ह एक बजेदेखि पाँच बजेसम्म काँग्रेस केन्द्रीय कार्यालयमा गर्न लागेको हो ।

७४ वषर्ीय बास्तोलाको गत २७ असोजमा निधन भएको थियो । पूर्वमन्त्रीसमेत रहेका उनी २०६९ सालदेखि अर्धचेत थिए ।

Continue Reading…

दशै विदामा सर्वोच्चमा ८ वटा बन्दी प्रत्यक्षीकरण रिट

५ कात्तिक, काठमाडौं । घटस्थापनाका दिनदेखि सोमबारसम्म सर्वोच्च अदालतमा परेका ८ वटा बन्दी प्रत्यक्षीकरण रिट परेको छ । जसमध्ये ४ वटा रिट निवेदनमा फैसला भई रिट खारेज भएका छन् ।

त्यसैगरी ३ वटा रिट निवेदनका सम्बन्धमा बन्दी प्रत्यक्षीकरणको आदेश जारी भएर बन्दीहरु छुटेको सर्वोच्चका सहप्रवक्ता नागेन्द्र कालाखेतीले जानकारी दिए ।

एउटा बन्दी प्रत्यक्षीकरणको रिटकोे सम्बन्धमा सोमबार इजलास तोकिएको छ । टंकबहादुर खड्काको हकमा सविना खड्काले दायर गरेको बन्दी प्रत्यक्षीकरणको रिट निवेदनको सम्बन्धमा सोमबारका लागि इजलास तोकिएको उनले जानकारी दिए ।

न्याय प्रशासन ऐन २०७३ को दफा २६ मा न्यायलयमा ३ दिन भन्दा बढी सार्वजनिक विदा भएमा बन्दी प्रत्यक्षिकरणको मुद्दा हेर्नका लागि पूर्ण इजलासबाट न्यायाधीश तोक्ने व्यवस्था छ ।

सोही व्यवस्थाअनुसार १५ दिने सार्वजनिक विदाकै क्रममा परेका बन्दी प्रत्यक्षीकरणका रिट निवेदन हेर्नका लागि सर्वोच्च अदालतको पुर्ण बैठकबाट न्यायाधाीशहरु प्रकाशमान सिंह राउत, विश्वम्भरप्रसाद श्रेष्ठ, केदारप्रसाद चालिसे, दीपकराज जोशी र सपना प्रधान मल्ल तोकिएका थिए ।

Continue Reading…

रविनासँग प्रियंकाको दशैंको टिका

नायिका प्रियंका कार्कीका लागि यसपटकको दशैं विशेष रहन पुग्यो । कारण, उनले यसपटकको दशैंमा दुई घरको टिका अनुभव गरिन् । नायक आयुष्मान देशराज जोशीसँग इन्गेजमेन्ट गरेपछि प्रियंकाका लागि यो पहिलो दशैं थियो ।

यसैले, उनले यसपटक आयुष्मानको घरमा र आफ्नो घरमा टिकाको अनुभव गरिन् । हुनत, प्रियंकाका लागि दशैं अझै पनि सकिएको छैन । उनले, अझै पनि टिकाको दिन गन्ती गर्दै सेलिव्रेशन गरिरहेकी छिन् ।

उनै, प्रियंकाले आयुष्मानकी आमा रविना देशराजसँग टिका लगाएर आर्शिवाद थापिन् । टिका लगाउँदै आर्शिवाद थाप्दै गर्दाको एक तस्बिरले भने अहिले खुबै चर्चा पाएको छ ।

प्रियंका र रविनाले एक अर्काको ओठमा चुम्बन गर्दै माया साटासाट गरेका छन् । यसअघि प्रियंका र रविनाको स्विमिङ पूलमा विकिनी तस्बिरले पनि खुबै चर्चा पाएको थियो ।

Continue Reading…

सकियो दशैं : फेरि रित्तिन थाले गाउँ, भरिए शहर

५ कात्तिक, पोखरा । विजया दशमीको टीका लगाएसँगै यतिखेर विभिन्न सेवा, पेशा र व्यवसाय सम्हाल्ने व्यक्ति फर्कन थालेपछि शून्य रहेको बजरमा चहलपहल बढेको छ ।

दशैँको टीका जमरा विजयादशमीदेखि कोजाग्रत पूर्णिमासम्म लगाउने प्रचलन भए पनि पश्चिम नेपालका कास्की, स्याङ्जा, तनहुँ लगायत जिल्लामा अधिकांशले विजयादशमीका दिन मात्र टीका लगाउने गर्दछन् ।

विजया दशमीकै दिन टीका लगाउने प्रचलनका कारण यी जिल्लामा उक्त दिन मध्यरातसम्म नै मानिसको आवजजावत हुन्छ । घरका ज्येष्ठ सदस्य र मान्यजनबाट टीका लगाई आशिर्वाद लिन यसअघि रत्तिएका गाउँबस्तीमा दशैँका बेला भने चहलपहल बढेको थियो ।

दशैँको टीका लगाएसँगै रोजगारीका सिलसिलामा आफ्नो कार्यस्थल फर्कनेहरूको यतिखेर बजारमा लर्को लागेको छ भने दुई–चार दिनका लागि भरिएका गाउँ बस्ती पुनःरित्तिन थालेका छन् । यात्रुको चापका कारण सवारीसाधनलाई यात्रु ओसार्न भ्याइ–नभ्याइ भएको छ ।

फर्कने यात्रुका कारण पोखराबाट काठमाडौँ र अन्य शहरमा जानेको चाप निकै बढेको पृथ्वीराजमार्ग बस सञ्चालक समितिका अध्यक्ष ऐनकुमार साईले जानकारी दिए । पोखराबाट काठमाडौँ र अन्य शहरमा जाने यात्रुवाहक बस खचाखच भरिएका छन् भने टिकट लिनका लागि काउन्टरमा सर्वसाधारणको लर्को देखिन्छ ।

समितिअन्तर्गतका एक हजार ३७८ वटा सवारी साधनमध्ये दशैँ शुरु भएयता एक/दुई दिनबाहेक दैनिक लगभग ९० प्रतिशतले यात्रु ओसारपसार गर्ने गरेको अध्यक्ष साईले बताए । विजया दशमीको भोलिपल्टै कात्तिक ३ गते मात्रै ४०० भन्दा बढी बस पोखराबाट काठमाडौँ गएको पृथ्वीराजमार्ग बस सञ्चालक समितिका महासचिव योगेन्द्रबहादुर केसीले जानकारी दिए ।

त्यस्तै कात्तिक ४ गते समितिका ८०० भन्दाबढी सवारी साधनले यात्रुलाई सेवा दिएका थिए भने सोमबार बिहानैदेखि काठमाडौँ जाने यात्रुको अत्यधिक चाप देखिएको छ । ‘सरकारी तथा अन्य निजी कार्यालय खुले पनि कोजाग्रत पूर्णिमासम्म शैक्षिक संस्थामा पठनपाठन नभएका कारण आधाजसो फर्कने क्रममा नै छन्’, उनले भने, ‘कोजाग्रत र आसपासका एक/दुई दिन यात्रुको सङ्ख्या निकै बढ्ने छ, दशैँमा आउनेको जस्तो यात्रुको चाप फर्किंदा भने केही कम हुने गरेको हाम्रो अनुभव छ ।’

विगतमा भन्दा यस वर्षको दशैँमा आपराधिक गतिविधि कम भएको जिल्ला प्रहरी कार्यालयका प्रहरी प्रवक्ता रवीन्द्रमान गुरुङले बताए । टीका लगाएर फर्कनेको शहरी क्षेत्रमा निकै चाप देखिएको बताउँदै उनले लामो दूरीका बसमा विगतमा जस्तो बढी भाडा लिने गरेको गुनासो नआएको उल्लेख गरे । केही ट्याक्सीले भाडा मनपरी लिएको भन्ने गुनासो आएसँगै उनीहरूलाई नियन्त्रणमा लिएर कारवाही गरिएको उनले जानकारी दिए ।

Continue Reading…

के २० लाख लिएर पलले ‘हृदय भरी’ साइन गरेका हुन् ?

चलचित्र ‘शत्रु गते’पछि नयाँ चलचित्र साइन नगरेका नायक पल शाहले निर्देशक सुरज सुब्बा ‘नाल्बो’ले निर्देशन गर्न लागेको चलचित्र साइन गरेका छन् । ‘हृदय भरी’ नाम दिइएको चलचित्रका लागि पलसँग संझौता भएको निर्देशक नाल्बोले जानकारी दिएका छन् ।

यो चलचित्रको छायांकन चैत्रबाट हुनेछ । चलचित्रका लागि पलसँग रोमान्स गर्न नयाँ नायिकाको खोजी भैरहेको छ । निर्देशक नाल्बोले भने-‘हो, हामीले नयाँ नायिकाको खोजी गरिरहेका छौ । २० बर्ष माथिका र ५ फिट ३ इन्च भन्दा माथिको उचाई भएका यूवतीले हामीसँग सम्पर्क गर्न सक्नेछन् ।’ शाह प्रोडक्शनको ब्यानरमा निर्माण हुन लागेको यो चलचित्रलाई चन्दन शाह, सौरभ विश्वासको लगानी रहनेछ ।

यो चलचित्रका लागि नायक पल शाहले २० लाख रुपैयाँ पारिश्रमिक लिएको वुझिएको छ । केही समय चलचित्रमा काम नगरेपनि पलले म्यूजिक भिडियोमा भने प्रशस्त काम गरेका छन् । यसैले पनि पलले आफूलाई लुकाउन खोजेपनि सकेनन् ।

यसैले नाल्बो र उनको टिमले दिएको यति महंगो पारिश्रमिकलाई कभर गर्ने क्षमता पलले राख्न सक्छन् या सक्दैनन्, प्रतिक्षा गर्नैपर्छ । रोमान्टिक कथामा बन्न लागेको यो चलचित्रलाई साढे २ करोडमा बनाउने नाल्बोले बताएका छन् ।

Continue Reading…

कृष्णनगरमा लगाइएको कर्फ्यू ५ बजेसम्म हटाइयो

५ कात्तिक, कपिलवस्तु । कृष्णनगरमा लगाइएको कर्फ्यू सोमबार साँझ ५ बजेसम्मका लागि हटाइएको छ ।

मूर्ति विसिर्जनको विषयलाई लिएर दुई समूहबीच भएको विवादपछि उत्पन्न झडप नियन्त्रणका लागि जिल्लाको कृष्णनगरमा आइतबार साँझ ५ बजेदेखि कर्फ्यू लगाइएको थियो ।

स्थिति सामान्य बन्दै गएपछि सोमबार साँझ ५ बजेसम्मका लागि कर्फ्यू हटाइएको प्रमुख जिल्ला अधिकारी अर्जुन पोखरेलले जानकारी दिए ।
कर्फ्यू हटेपछि भारतीय सीमावर्ती कृष्णनगरको जनजीवन सामान्य बन्दै गएको छ ।

कृष्णनगर बजार क्षेत्रमा शनिबार दुर्गा पूजाको मूर्ति विसर्जन गर्ने क्रममा स्थानीय दुई पक्षबीच विवाद भएको थियो । आइतबार कडा सुरक्षाका बीच दुर्गा पूजाको मूर्ति विसर्जन गरिएको थियो ।

Continue Reading…

काठमाडौंमा यो दशैंमा ५ वर्षयताकै बढी दुर्घटना, १३ जनाको मृत्यु

५ कात्तिक, काठमाडौं । घटस्थापनादेखि सोमबारसम्म उपत्यकाका तीन जिल्लामा भएका छुट्टा छुट्टै सवारी दुर्घटनामा १३ जनाले ज्यान गुमाएका छन् ।

काठमाडौ, ललितपुर र भक्तपुरका विभिन्न स्थानमा असोज २४ गते घटस्थापनादेखि कात्तिक ५ गते सोमबार बिहानसम्म भएका सवारी दुर्घटनामा १३ जनाको मृत्यु भएको महानगरीय ट्राफिक प्रहरी महाशाखाले जनाएको छ । ८ जना गम्भीर र १ सय ८६ जना सामान्य घाइते भएका छन् ।

यो बर्षको दशैमा सवारी दुर्घटनाबाट मृत्यु हुनेको संख्या ५ बर्षयताकै सबैभन्दा धेरै भएको ट्राफिक प्रहरीले जनाएको छ । दुर्घटनाको संख्या पनि ५ बर्षयताकै धेरै २ सय ७२ वटा भएका छन् । गत बर्ष दशैको समयमा भएका १ सय ७७ वटा सवारी दुर्घटनामा ४ जनाको मृत्यु भएको थियो ।

त्यसैगरी २०७३ /७४ मा १ सय ४६ वटा दुर्घटनामा १० जनाको मृत्यु भएको थियो । विशेष गरेर मादक पदार्थ सेवन गरेर सवारी चलाएका कारण दुर्घटनाको संख्या बढेको ट्राफिक प्रहरीले जनाएको छ ।

साथै यस बर्षका दुर्घटनाहरु मुख्य शहरी क्षेत्रमा भन्दा उपत्यकाका काँठ क्षेत्रमा बढी भएको महाशाखाका प्रहरी निरीक्षक दामोदर सिलवालले जानकारी दिए ।

यसैगरी ट्राफिक प्रहरी कार्यालयले मादक पदार्थ सेवन गरेर सवारी चलाएका १ हजार ७९ सहित ३ हजार ७ सय ३३ सवारी साधनलाई कारवाही गरेको छ । बढी भाडा लिएका ९ सय ५० बढी ट्याक्सी र बढी भाडा लिने लामो दुरीका सवारी चालक तथा विचौलिया २९ जनालाई प्रहरीले कारवाही गरेको इन्सपेक्टर सिलवासलले जानकारी दिए ।

महानगरीय ट्राफिक प्रहरी महाशाखाले दशै तिहार तथा छट पर्वलाई दुर्घटनारहित बनाउन उपत्यकाको १ सय १४ स्थानमा ६ सय ८७ जना जनशक्ति परिचालन गरेको छ ।

Continue Reading…

ट्याक्टरले स्कुटरलाई ठक्कर दिँदा युवकको मृत्यु

५ कात्तिक, जनकपुरधाम । जनकपुर ढल्केवर सडकखण्डअन्तर्गत मुजेलियामा सोमबार बिहान एक ट्याक्टरले स्कुटरलाई ठक्कर दिँदा एकजनाको घटनास्थलमै मृत्यु भएको छ ।

मुजेलिया इलाका प्रहरी कार्यालयका प्रमुख सुरेन्द्र यादवका अनुसार उत्तरबाट जनकपुरधाम आउँदै गरेको ज २ त ११३ नम्बरको ट्याक्टरले हिरो होन्डा शो रुम अगाडिबाट मुजेलियातर्फ जाँदै गरेको ज ९ प ६१३३ नम्बरको स्कुटर चालक जनकपुरधाम उपहानगरपालिका– १० देवी चोककका ३० वर्षीय सन्दीप नायकलाई ठक्कर दिँदा उनको घटनास्थलमै मृत्यु भएको थियो ।

स्कुटरको पछाडि बसेका राकेश गम्भीर घाइते भएका र उनको जनकपुर अञ्चल अस्पतालमा उपचार भइरहेको छ । ट्याक्टर चालक फरार रहेकाले खोजी भइरहेको प्रहरीले जनाएको छ ।

Continue Reading…

विश्वकप क्रिकेटमा छनोट हुन नयाँ रोडम्याप, नेपालको यस्तो छ सम्भावना

५ कात्तिक, काठमाडौं । अन्तर्राष्ट्रिय क्रिकेट काउन्सिल (आईसीसी) ले सन् २०२३ को एक दिवसीय विश्वकपको नयाँ रोडम्याप जारी गरेको छ ।
सिंगापुरमा बसेको आईसीसीको बोर्ड बैठकले विश्वकपका लागि नयाँ फम्र्याट तयार पारेको हो ।

विश्वकपका लागि तयार पारिएको विभिन्न छनोटअन्तर्गत ३ वटा लिगहरु हुनेछन् । जसमा आईसीसी सुपर लिग, आईसिसी लिग-२ र च्यालेन्ज कप रहेका छन् ।

आईसीसी सुपर लिगमा १२ टेष्ट राष्ट्र र नेदरल्याण्ड गरी १३ टिम सहभागी हुनेछन् । आईसिसी सुपर लिगको शीर्ष ८ टोलीले विश्वकपमा स्थान बनाउने छन् । सुपर लिगका बाँकी पाँच टिमले सन् २०२२ को विश्वकप छनोट खेल्ने अवसर पाउने छन् । यो सुपर लिग २०२० देखि २०२२ सम्म हुनेछ ।

त्यस्तै, विश्वकप छनोटको लागि अर्को लिग हो, आईसीसी लिग-२ । आईसीसी लिग-२ मा ७ राष्ट्रले खेल्ने छन् । यस लिगमा नेपालसहित, युएई, स्कटल्याण्ड र आईसीसी विश्व क्रिकेट लिग डिभिजन-२ बाट छनोट भएर आएका ४ टोलीले खेल्नेछन् । यो २०१९ देखि २०२१ सम्म हुनेछ ।

आईसीसी लिग-२ को शीर्ष ३ टोलीले विश्वकप छनोटमा स्थान बनाउने छन् । बाँकी ४ टोली भने विश्वकप छनोट प्ले अफमा झर्ने छन् ।

प्ले अफमा ६ टोली रहने छन् । प्ले अफमा पुगेका दुई राष्ट्र भने च्यालेन्ज कपबाट आउने छन् । च्यालेन्ज कपमा विश्व क्रिकेट लिगमा रहेका मध्ये २१ देखि ३२ वरियताका १२ टोलीले खेल्नेछन् । १२ टोलीलाई २ समूहमा विभाजन गरिनेछन् । दुई टोलीको विजेताले विश्वकप छनोट प्ले अफमा स्थान बनाउने छन् । विश्वकप छनोटको प्लेअफ २०२२ मा हुनेछ ।

विश्वकप छनोटको प्लेअफको शीर्ष २ टिमले पनि विश्वकप छनोटमा स्थान बनाउने छन् ।

विश्वकप छनोटमा सुपर लिगका पाँच, आईसीसी लिग-२ का ३ र विश्वकप छनोट प्ले अफका २ राष्ट्र गरी १० टिम रहने छन् । विश्वकप छनोट सन् २०२२ मा हुने छ ।

विश्वकपमा पुग्न नेपालले दुई चरण पार गर्नुपर्ने

सन् २०२३ मा भारतमा हुने विश्वकप खेल्नका लागि नेपालले दुई चरण पार गर्नुपर्ने भएको छ । आईसीसीले तयार पारेको विश्वकपको नयाँ रोड म्यापअनुसार नेपाल अहिले आईसीसी लिग-२ मा रहेको छ ।

यो समूहमा नेपालसँगै बलियो राष्ट्र स्टकल्यान्ड र युएई रहेका छन् । त्यस्तै, यहाँ यो लिगमा आईसीसी विश्व क्रिकेट लिग डिभिजन टु बाट छनोट भएर आएका ४ राष्ट्र रहने छन् । नेपालको लागि यो लिग निकै चुनौतीपूर्ण रहने छ ।

किनभने स्कटल्यान्ड र युएई बलियो राष्ट्रको रुपमा रहेको छ, भने डिभिजन टु बाट आउने टिम पनि नेपालको लागि बलियो प्रतिद्वन्द्वी सावित हुन सक्छन् ।

यो लिगमा नेपाल टप तीनभित्र पर्न सके सिधै विश्वकप छनोट खेल्न पाउनेछ । तर शीर्ष ३ भित्र पर्न नसकेमा नेपालले विश्वकप छनोटमा प्रवेश गर्न विश्वकप छनोट प्लेअफ खेल्ने मौका पाउने छ ।

नेपालले विश्वकप छनोटमा स्थान बनाउन सके माथिल्लो स्तरका ५ राष्ट्रसहित अन्य ४ राष्ट्रसँग कडा प्रतिस्पर्धा गर्नेछ ।

Continue Reading…

Sunday, October 21, 2018

पर्सामा ४ महिनामा दर्जन बढी बलात्कारका उजुरी

५ कात्तिक, वीरगञ्ज । पर्सामा ४ महिनाको अवधिमा दर्जन बढी बलात्कारका उजुरी परेका छन् ।

जिल्ला प्रहरी कार्यालय, पर्साले सार्वजनिक गरेको तथ्यांक अनुसार जेठदेखि असोजसम्म ४ महिनामा १२ वटा बलात्कारका उजुरी आएका छन् ।

जेठ्मा जर्बजस्ती करणीको २, साउनमा ५, भदौमा ३, असोजमा २ उजुरी परेका छन् । यही अवधिमा ज्यान मार्ने उद्योगका २ वटा उजुरी परेका छन् ।

जिल्ला प्रहरी कार्यालय, पर्साका प्रमुख प्रहरी उपरीक्षक रेवती ढकालले बलात्कारका घटनामा गम्भीर ढंगले अनुसन्धान गर्ने गरिएको बताए । ‘जर्बजस्ती करणी गर्न खोज्दा मैले नमानेपछि मार्न खोजे भनेर पनि उजुरी आएका छन्’, उनले भने, ‘हामीले मुद्दा दर्ता गरेर अनुसन्धान गरिरहेका छौं । दोषी नछुटुन, निर्दोष नफसुन भन्ने उद्देश्य हाम्रो हो ।’

Continue Reading…

विदेश जाँदाको कोसेली असला माछा, किलोको ७ हजार

५ कात्तिक, बागलुङ । विदेश पठाउने गतिलो कोशेली यहाँको दरमखोलाको असला माछा बनेको छ ।

सुकुटी पारिएको माछा महँगो भाउमा किनेर प्रवासमा रहेका आफन्तसम्म पठाउने गरिन्छ । देश बाहिर पनि दरमखोलाको असला माछा रोजाइमा छ । स्वाद र बनावट दुवै कारणले यहाँको असला माछा उत्कृष्ट मानिन्छ ।

गलकोट नगरपालिका–७ मल्मकी उषा पौडेलले अमेरिकामा बस्ने दिदीका लागि यसपालि सोही माछा कोशेलीका रुपमा छानिन् ।

सुकाएको माछा किन्दा भाउ भने महँगो पर्न गएको उनको भनाइ छ । व्यवसायीले पनि विदेशमा कोशेली पठाउनेलाई लक्षित गरी माछाको सुकुटी बनाउने गर्छन् । ‘बढीजसो कोशेलीकै रुपमा बिक्री हुन्छ’ स्थानीय व्यवसायी बाबुराम केसीले भने, ‘पोखरा, काठमाडौँ जस्ता ठाउँमा पनि जान्छ ।’

आलो माछालाई हप्तौँसम्म आगोमा सेकाएर सुकुटीको रुपमा बेच्ने गरिएको उनको भनाइ छ । आलो माछाको मूल्य भने प्रतिकिलो ८०० देखि एक हजार रुपैयाँसम्म छ । आलोको भाउ बढेसँगै वर्षेनी ‘सुकुटी माछा’ को भाउ पनि बढ्दै गएको छ । अर्का व्यवसायी कृष्णकुमारी केसीका अनुसार दुई वर्षअघिसम्म पाँच हजार पर्ने माछा अहिले सात हजार रुपैयाँसम्म पुगेको छ । चार वर्षअघि जम्मा तीन हजार रुपैयाँ थियो ।

गाउँमा भन्दा विदेशमा लानेले माछालाई महँगो मूल्य तिर्न पनि तयार हुन्छन् । छुट्टीमा नेपाल आएकाले विदेश फर्कदा माछा कोशेली लिएर जाने चलन नै बसेको छ । व्यवसायीका अनुसार धेरै लानेमा जापानमा बस्ने छन् । माग र रोजाइअनुसार माछा उपलब्ध गराउन व्यवसायीलाई भ्याइनभ्याइ छ ।

गलकोट नगरपालिका–७, ८ र ९ मा दैनिक ३० भन्दा बढी व्यक्तिले माछा मार्ने गर्छन् । माछा मार्ने व्यक्ति केहीले आफैँ सोझै उपभोक्तालाई बेच्ने गर्छन् भने कसैले कम मुनाफा राखेर अर्को व्यवसायीलाई बेच्ने गरेका छन् ।

माछा मार्ने जलारी, स्थानीय सरोकार भएका पक्षको निर्णयबाट खोलामा बम हान्न, विष हाल्न र विद्युतीय शक्ति लगाएर माछा मार्न प्रतिबन्ध लगाइएको छ । स्थानीय प्रशासनले पनि अनाधिकृत रुपमा माछा मार्ने कार्यलाई रोक्न निगरानी बढाएको छ ।

दरमखोला आसपासका क्षेत्रमा बसोबास गर्ने कतिपय परिवारको जीविका माछा मारेर नै धानिएको छ । असला माछाका परिकार उपलब्ध गराउने स्थानीय होटल–रेष्टुराँले पनि यथेष्ट आम्दानी गर्दै आएका छन् । केही वर्षअघि गायक वसन्त थापा र गायिका नीता पुनमगरले ‘माछा मीठो असला दरमखोलाको’ बोलको गीत बजारमा ल्याएका थिए ।

Continue Reading…

नेपाली मूलकी खेलाडी केमिका भण्डारीको टोली पोलो प्रतियोगितामा बिजयी

५ कात्तिक, अमेरिका । अमेरिकाको मेरिल्याण्ड राज्यमा बसोबास गर्ने नेपाली मूलकी केमिका भण्डारीको टोलीले गत अक्टोबर २० तारिखमा भएको मैत्रीपूर्ण पोलो प्रतियोगितामा बिजय हासिल गरेको छ ।

मेरिल्याण्ड राज्यको पश्चिमी भागमा अवस्थित पुल्सभिल शहरमा सम्पन्न पोलो चक्करमा भण्डारीको खेल टोली ९-८ गोलले बिजयी भएको थियो । उक्त दिन चार वटा खेल समूह बीच भएको प्रतियोगितामा भण्डारी कंग्रेसनल पोलो क्लबबाट खेलेकी थिइन् । कंग्रेसनल पोलो क्लबले समरहिल पोलो कल्बलाई मैत्रिपूर्ण खेलमा हराएको थियो ।

भण्डारीको टोलीका ३ जना र विपक्षका ३ जना गरेर ६ जना खेलाडीहरु रहेका थिए । उक्त खेलमा पुरुष तथा महिला दुवैले खेल्न सक्ने छन् भने उक्त खेलमा एक निर्णायक रहेका थिए । उक्त खेलमा १० मिनेटको मध्यान्तर रहेको थियो ।

भण्डारीको टोलीले पहिलो चरणमा खेल्न पाएको थियो भने अर्को टोलिले दोश्रो चरणमा खेल खेलेको थियो । अर्को खेल समूहमा माउनटेनभ्यू पोलो क्लबले  सेनेका पोलो क्लबबिरुद्ध खेल खेलेको थियो । मेरिल्याण्डको पुल्सभिलस्थित सेनेका पोलो क्लबमा सम्पन्न उक्त पोलो चक्कर खेलाइएको थियो ।

Continue Reading…

दीपाश्रीको ब्लकबस्टर ह्याट्रिक

नेपालमा केही नायक र नायिकाको बिषयमा लेखिने एउटा समाचार छ, हिटमा ह्याट्रिक वा फ्लपमा ह्याट्रिक । अर्थात लगातार ३ वटा चलचित्र हिट भएर चर्चित बनेका वा लगातार ३ वटा चलचित्र असफल भएर चर्चित बनेका । जे जसरी भएर पनि चर्चित बनेका कलाकार धेरै छन् ।
तर, ब्लकबस्टर ह्याट्रिक गर्न भने त्यती सजिलो छैन । औषत, हिट, सुपरहिटपछि बल्ल ब्लबस्टर आउँछ । यसका लागि चलचित्रले लगानी मात्र उठाएर हुँदैन । नाफा गतिलै गर्नपर्छ ।

अहिले, ब्लबस्टर ह्याट्रिकको सूचीमा पर्ने एक मात्र निर्देशक हुन् दीपाश्री निरौला । दीपाश्री निरौलाले चलचित्र ‘छक्का पन्जादेखि छक्का पन्जा ३’सम्म आइपुग्दा ब्लबस्टर ह्याट्रिक गरेकी छिन् ।

‘छक्का पन्जा’को व्यापारिक आँकडा १६ करोड नजिकमा छ । यो अहिलेसम्मकै सर्वाधिक धेरै कमाई गर्ने नेपाली चलचित्र हो । दोश्रोमा पनि उनकै नाम छ, ‘छक्का पन्जा २’ । यो चलचित्रले १४ करोड आसपासको व्यापार गरेको छ । दोश्रो सर्वाधिक कमाई गर्ने चलचित्रको सूचीमा पनि दीपाश्रीकै नाम छ ।

अब, ‘छक्का पन्जा ३’को व्यापार । यसले अघिल्ला चलचित्रको रेकर्ड तोड्छ या नयाँ रेकर्ड राख्छ त्यो भोलीको कुरा हो । तर, रिलिज भएको केही दिनमै चलचित्रप्रति दर्शकको उत्साह र चासो र यसको व्यापार हेर्दा यसलाई ब्लकबस्टर भन्न सजिलै सकिन्छ । चलचित्रले दैनिक १ करोडको गतीमा व्यापार गरेको यसका निर्माता समेत रहेका दिपकराज गिरीले जानकारी दिएका छन् । दिपकराजको कुरालाई मान्ने हो भने चलचित्रले ११ करोड भन्दा माथिको व्यापार गरिसकेको छ । यसैले यो चलचित्र पनि ब्लकबस्टर साबित भैसकेको छ ।

यसरी हेर्दा नेपाली चलचित्र क्षेत्रमा दीपाश्री पहिलो निर्देशक बनेकी छिन्, जसले ब्लकबस्टर चलचित्रको ह्याट्रिक गरेकी छिन् । चलचित्रले यही गती समात्यो भने तिहार अघि नै चलचित्र ‘छक्का पन्जा’ले राखेको रेकर्ड तोड्ने पक्का छ ।

Continue Reading…

अनौठो संस्कारः जहाँ वर्षको ५ दिन महिलाले कपडा लगाउँदैनन्

दुनियाँमा कतिपय संस्कार तथा परम्परा र प्रथाहरु यस्ता हुन्छन् जो सुन्दैमा असजिला तथा अनौठा लाग्दछन् ।

भारतको हिमाञ्चल प्रदेशमा बसोबास गर्ने एउटा समुदायमा रहेको एक प्रथा यस्तै खालको छ ।

स्थानीय कुल्लू जिल्लामा पर्ने एउटा गाउँमा शदियौँदेखि यो परम्परा चलिआएको छ । मणिकर्ण उपत्यकामा पर्ने पिणी गाउँमा रहेको यस परम्परामा पति/पत्नीहरु वर्षको ५ दिनसम्म एक अर्कासँग हसिमजाक गर्न पाउँदैनन् । यतिमात्र कहाँ हो र ? त्यो ५ दिन महिलाहरुले जिउमा सामान्य कपडा पनि लगाउन पाउँदैनन् ।

हरेक वर्षको १७ देखि २१ अगष्ट सम्म हरेक वर्ष यो पर्व मनाइन्छ । ती ५ दिन महिलाहरु सामान्य कपडा होइन उनीबाट बनेको च्यादरले जिउ ढाक्छन् । गाउँमा मदिरा पूर्ण रुपमा बर्जित हुन्छ ।

एजेन्सी

Continue Reading…

जसले ३३ वर्षदेखि दाह्री काटेका छैनन्

तपार्इंलले दाह्रीजुँगा कति दिनमा खौरिनुहुन्छ ? भारतका गिरीधर व्यास नामका व्यक्तिले विगत ३३ वर्षदेखि दाह्र्री काटेका छैनन् ।

५८ वर्षका गिरिधरले सन् १९८५ देखि दाह्रीजुँगा पालिरहेका छन् र अहिले उनका दाह्रीजुँगाको लम्बाई २२ फिट पुगेको छ ।

उनी आफूलाई दुनियाँकै लामा दाह्रीजुँगा भएका मानिस भएको दाबी गर्छन् र गिनिज बुकमा नाम लेखाउने धोको छ ।

यति लामो दाह्री भएपछि त्यसको स्याहार गर्नु पनि कम गाह्रो छैन । दिनहुँ ३–४ घण्टा उनलाई दाह्रीको स्याहार गर्नमै लाग्दछ ।

राजस्थानको बिकानेर क्षेत्रमा बस्ने गिरिधरले आफ्नो जीवनमा अहिलेसम्म साबुन र स्याम्पुको प्रयोग नगरेको बताउँछन् । त्यसैले उनको दाह्री टुक्रिने समस्या छैन । मुल्तानी माटोले उनी जिउ तथा दाह्री सफा गर्दछन् । त्यस्तै दिनहुँ तेलले मालिस गर्दछन् दाह्रीमा । कागती र मरिचको धुलोको मिश्रण बनाएर दाह्रीमा लगाएर धुन्छन् जसका कारण आफ्ना दाह्री मुलायम बन्ने उनको दाबी छ ।

गिरिधर राजस्थानको वन विभागका कर्मचारी पनि हुन् । उनी दाह्रीकै कारण सेलिब्रेटी बनिसकेका छन् ।

एजेन्सी

Continue Reading…

बलिउडका पाँच तात्तातो खबर, परिणीतिको वर्थ डेदेखि तनुश्री दत्तको मानहानि मुद्दासम्म

बलिउडमा यतिबेला ‘मि टु’ अभियानको तुफान चलेको छ । यो तुफानले कसलाई कहाँ पुर्‍याउँछ ? हेर्न बाँकी नै छ । यससँगै बलिउडमा बिग बजेट फिल्मको चर्चा छ । यही दिपावलीबाट सार्वजनिक हुने ‘ठग्स अफ हिन्दुस्तान’देखि शाहरुख खानको ‘जीरो’सम्म चर्चाको मियोमा छ । आजको तात्तातो खबर चाहि के छ त ?

परिणीति चोपडाको जन्मदिन

अभिनेत्री परिणीति चोपडा आजबाट ३ बर्षकी भइन् । उनले आज आफ्नो ३० औं जन्मदिन मनाइरहेकी छिन् ।

परिणीतिले बलिउडमा आफ्नो करियरको सुरुवात ‘लेडीज भर्सेस रिकी बहल’ फिल्मबाट गरेकी थिइन् । उनी उत्कृष्ट अभिनय त गर्छिन् नै, गाउछिन् पनि ।

तनुश्रीले राखी विरुद्ध मानहानिको मुद्दा दर्ता गरिन्

तनुश्री दत्त यतिबेला ‘मि टु’ अभियानको कारण चर्चामा छिन् । उनले आफुमाथि यौन दूव्र्यवहार भएको आरोप लगाएकी थिइन् । तर, तनुश्रीको यस आरोपको खण्डन गर्दै राखी सावन्तले एक विवादित टिप्पणी गरेकी थिइन् । त्यही विवादित टिप्पणीपछि तनुश्री दत्तले राखी सावन्तमाथि भारु १० करोडको मानहानिको मुद्दा दर्ता गराएकी छिन् ।

प्रत्यूषाका पूर्व ब्वाइफ्रेन्डले लेखकमाथि लगाए यौन शोषणको आरोप

टेलिभिजन अभिनेत्री प्रत्युषा बेनर्जीका पूर्व ब्वाइफ्रेन्ड राहुल राज सिंहले लेखक मुश्ताक शेखमाथि यौन उत्पीडनको आरोप लगाएका छन् । राहुल राजले भनेका छन्, ‘यो कदम उनले तनुश्री दत्तको साहसको कारण उठाए ।’

‘बिग बोस’बाट बाहिरिएका सौरभको खुलासा

‘बिग बोस सिनज १२’ देखि सौरभ पटेल बाहिरिएका छन् । यसका साथै शोमा दुई वाइल्ड कार्ड पनि इन्ट्री हुँदैछ । घरबाट बाहिरिएपछि सौरभले भने, ‘मलाई दुख लागेको छ । मलाई लाग्दैन कि, म बाहिरिनुपर्ने थियो । उर्वशीलाई घरबाट निकाल्नुपर्ने थियो ।’ सौरभलाई सोधियो कि, आफ्नो पहिचान किन लुकाउनुभयो ?

सौरभले जवाफमा भने, ‘मलाई यसबारे केही थाहा भएन, बाहिर के भनिन्छ भन्ने । थाहा पाएपछि जवाफ दिनेछु ।’

‘इन्डियन आइडल’बाट अनु मलिक आउट

संगीतकार अनु मलिकमाथि श्वेता पन्डितले यौन शोषणको आरोप लगाएको थियो । घटनाले उग्र रुप लिदै गएपछि अनु मलिक ‘इन्डियन आइडल’बाट बाहिरिए ।

Continue Reading…

अब एन्ड्रोइडमा गुगल एपका लागि पैसा तिर्नुपर्ने

गुगलको नयाँ निर्णय अनुसार अब एन्डोइड फोन निर्माताहरुले आफ्ना हरेक डिभाइसमा गुगल एपको प्रयोगका लागि शुल्क तिर्नुपर्ने भएको छ ।

युरोपमा गुगल प्ले स्टोर तथा अन्य मोबाइल एप्सका लागि प्रति डिभाइस ४० डलर तिर्नुपर्नेछ ।

द भर्जमा छापिएको खबर अनुसार हरेक मोबाइल डिभाइसमा गुगल सर्भिस इन्स्टल गर्नका लागि मोबाइल उत्पादकले ४० डलर सम्म शुल्क तिर्नुपर्नेछ ।

देशगत तथा मोबाइल डिभाइसको प्रकारगत रुपमा यस्तो शुल्क फरक पर्नसक्ने र यो नयाँ नियम आगामी सन् २०१९ को फेब्रुअरी १ पछि एक्टिभेट गरिएका डिभाइसमा मात्र लागू हुने बताइएको छ ।

त्यस्तै गुगलले एन्डोइड डिभाइस उत्पादक कम्पनीहरुसँग केही वा पूरा लाइसेन्सिङ शुल्क बेहोर्नेगरी छुट्टै सम्झौताको प्रस्ताव पनि गरेको छ । यसमा ती कम्पनीहरु सामेल छन् जसले आफ्ना डिभाइसमा क्रोम तथा गुगल सर्च इन्स्टल गर्न चाहन्छन् ।

द भर्जले छापेको यस समाचारप्रति गुगलले कुनै आधिकारिक टिप्पणी भने गरको छैन ।

केही दिनअघि मात्र गुगलले मोबाइल डिभाइस निर्माताहरुसँग कम्प्याटिबिलीटी सम्झौतालाई अपडेट गर्न गैरहेको बताएको थियो । यस अन्तर्गत युरोपमा कम्पनीहरुलाई गुगल प्ले तथा अन्य गुगल एन्ड्रोइड एपका लागि शुल्क भुक्तान गर्नु पर्ने हुनसक्छ । एन्ड्रोइड विरुछ युरोपेली युनियनको एन्ट्री ट्रस्ट वाचडगको फैसला लागू गरिएसँगै गुगलले यो कदम उठाउन लागेको बताइएको छ ।

युरोपेली आयोगले गुगलद्वारा मोबाइल निर्माताहरुलाई गुगल सर्च तथा क्रोम इन्स्टल गर्न दबाव दिएको र सो नियमविरुद्ध रहेको फैसला गरेको थियो । त्यसबापत गुगलमाथि गत जुलाईमा ५ अर्ब १० करोड डलर जरिवानाको फैसला गरेको थियो । गुगलले उक्त फैसलाविरुद्ध पुनरावेदन गरिसकेको छ ।

एजेन्सी

Continue Reading…

बलात्कार आरोपमा सिरहाबाट ४ पक्राउ

५ कात्तिक, काठमाडौं । बलात्कार आरोपमा सिरहाको बरियापट्टीबाट ४ जना पक्राउ परेका छन् । इलाका प्रहरी कार्यालय वरियापट्टी सिरहाले १६ वर्षीया किशोरी बलात्कार आरोपमा आइतबार राति उनीहरुलाई पक्रेको हो ।

इलाका प्रहरी कार्यालय, वरियापट्टीले १६ वर्षीया किशोरी वरियापट्टीमा बलात्कृत भएको उजुरीपछि ४ जना समातिएको जानकारी दिएको छ ।

होटलमा काम गर्दै आइरहेकी किशोरीमाथि आइतबार राति १० बजे बलात्कार भएको बताइएको छ ।

पक्राउ पर्नेमा काशीनाथ सिंह, मुकेश सहनी, उगन सहनी र विजयकुमार यादव छन् । चारै जना भारत बिहारका हुन् ।

उनीहरुलाई जिल्ला प्रहरी कार्यालय, सिरहामा लगेर थप अनुसन्धान भइरहेको वरियापट्टी इलाका प्रहरी कार्यालयले जनाएको छ ।

Continue Reading…

सुदूरपश्चिममा ३ महिनामा गाडी दुर्घटनाबाट २५ जनाको मृत्यु

५ कात्तिक, डडेल्धुरा । सुदूरपश्चिम प्रदेशमा आर्थिक वर्ष २०७५/७६ को तीन महिनामा २१ वटा सवारी दुर्घटनाबाट २५ जनाले ज्यान गुमाएका छन् । साउन महिनामा ४ वटा सवारी दुर्घटनामा परी ३ जनाले ज्यान गुमाएका छन् ।

भदौ महिनामा १४ वटा सवारी दुर्घटनामा ७ जनाको मृत्यु भयो भने असोज महिनामा ११ वटा सवारी दुर्घटनाबाट १५ जनाले ज्यान गुमाएका सुदूरपश्चिम प्रदेश ट्राफिक कार्यालयका प्रहरी निरीक्षक टेक बहादुर जोराले जानकारी दिए ।

सडकको अवस्था दयनीय हुनु, ट्राफिक नियमप्रति सचेतता नअपनाउनुलगायतका कारणले दुर्घटना बढेको उनको भनाइ छ । आर्थिक वर्ष ७२/७३ मा १ सय ५५ सवारी दुर्घटनाबाट १ सय २१ जनाले ज्यान गुमाएका थिए ।

त्यस्तै आर्थिक वर्ष ७३/७४ मा १ सय ८४ सवारी दुर्घटनाबाट १ सय ३२ जनाले ज्यान गुमाएका थिए । त्यसैगरी आर्थिक बर्ष ७४/७५ मा १ सय ६४ सवारी दुर्घटनाबाट १ सय ६६ जनाले ज्यान गुमाएको सुदुरपपश्चि प्रदेश ट्रफिक कार्यालयको तथ्यांकले देखाएको छ ।

Continue Reading…

काठमाडौं महानगरपालिकाले भन्यो- ‘बाहिर फोहोर नफालौं, घरमै आउँछ गाडी’

५ कात्तिक, काठमाडौं । काठमाडौं महानगरपालिकाले दशैंमा रोकेको फोहोर उठाउने काम फेरि सुरु गरेको छ । दशैंको फूलपातीदेखि फोहोर उठाउन काम रोकेकोमा आईतबारदेखि पुनः थालिएको महानगरपालिकाका वातावरण व्यवस्थापन विभागका प्रमुख हरिबहादुर कुँवरले जानकारी दिए ।

उनका अनुसार आईतबार मात्रै साढे ४ सय मेट्रिक टन फोहोर ल्याण्डफिल साइट पुर्‍याइएको छ । महानगरभित्रबाट फोहोर उठाउने काम भने दशैंको टीकाका दिन पनि नरोकिएको उनको दाबी छ ।  ‘दशैंका बेला फोहोर व्यवस्थापनमा खटिने कर्मचारी विदामा जाने भएकाले अन्तिम व्यवस्थापनको काम रोकिएको हो’, उनले भने ।

फोहोर उठाउन काम रोकिँदा थप दुर्गन्ध हुन नदिन महानगरले घरभित्रका फोहोर सडकमा ल्याएर नफाल्न आग्रह गरेको थियो । महानगरपालिकाको आग्रह अनुसार तुलानात्मक रुपमा सडकमा कम फोहोर आएको उनको भनाइ छ ।
‘सार्वजनिकस्थल हुँदै गाडी पठाएर घर घरमा भएको सबै फोहोर संकलन गर्छौं’, उनले भने ।

निजी कम्पनीका सबै कर्मचारी दशैं मनाएर फर्किनसकेकाले पूर्णरुपमा फोहोर उठाउन केही समय लाग्ने उनले जानकारी दिए ।

सिसडोलको समस्या उस्तै

तर, काठमाडौं महानगरपालिकाले फोहोर बिसर्जन गर्दै आएको नुवाकोटको सिसडोल समेत भरिएपछि थप फोहोर व्यवस्थापन हुन सकेको छैन । सडक छेउ र गल्लीमा थुपि्रएको फोहोर गत साउनबाट नै नियमित रुपमा उठ्न सकेको छैन ।

कामपाले १२ वर्षअघि नै दुई वर्षका लागि फोहर व्यवस्थापन गर्न सिसडोल लिएको थियो । सम्झौताभन्दा लामो समयसम्म निरन्तर फोहर थुपार्दै आएकाले आफूहरूको दैनिक कामकाजमा समस्या भएको भन्दै नुवाकोट, सिसडोलका बासिन्दाले सो स्थानमा अब फोहर नराख्न आग्रह गर्दै आएका छन् ।

Continue Reading…

‘हिरो नम्बर वान’: नामको मात्रै कि, कामको पनि ?

नेपाली सिनेमाका नम्बर वान हिरो को हुन् ? तपाईं फ्याट्ट यसको जवाफ दिन सक्नुहुन्छ । नम्बर वान हिरोइन ? यसको जवाफ पनि तपाईंको ओंठमै झुन्डिएको छ । किनभने यसरी ‘नम्बर वान’को ट्यागले सुशोभित हिरो-हिरोइन हाम्रो उद्योगमा पनि छन् । तर, उनीहरुलाई ‘नम्बर वान्’ बनाउने आधार के हो ?

स्टारडम ? अभिनय ? फिल्मको संख्या ? करियरको अवधी ?

सामान्य हिसाबले नम्बर वान्को अर्थ हुन्छ, सबैभन्दा धेरै चलेका, सबैभन्दा धेरै पैसा लिने ।

तर, नम्बर वान्को ट्याग भिरेका नायक नायिकाले नेपाली चलचित्रको पर्दामा आफूलाई कसरी र कस्तो भूमिकाले साबित गरे ? यहाँ बहस गर्न उपयुक्त होला ।

१. राजेश हमाल

३ सय भन्दा बढी चलचित्रमा काम गरेका नायक राजेश हमालले आफ्नो करिअरमा लामो समयसम्म नम्बर १ को उपाधि पाए । अहिले पनि उनलाई विभिन्न उपनाम दिइन्छ ।

लामो समयसम्म नम्बर १ को उपाधि पाएका राजेश हमालले आफूलाई रिस्क जोनमा कहिले राखेनन् । जहिले सुरक्षित तरिकाले उनले काम गरे । ३ सय बढी चलचित्रमा काम गरेका राजेश हमाल आफैले पनि ४ वटा चलचित्रको नाम राम्रोसँग भन्न सक्दैनन् । यसको अर्थ, उनले नम्बर १ को पद त पाए तर फरक खालको भूमिका गर्ने हिम्मत गरेनन् ।

 

२. निखिल उप्रेती र विराज भट्ट

नेपाली चलचित्रमा कुनै समय निखिल उप्रेती र विराज भट्टको पनि दबदबा थियो । यी दुबै नायकमा नम्बर १ को भन्ने खालको लडाई पनि हुन्थ्यो । तर, दुबैको अभिनय आजसम्म पनि सुधारिएको छैन । डान्सको त कुरै नगरौ । एक्सन गरेको भरमा उनीहरुले केही बर्ष राज गरे । तर, निखिल र विराजको चलचित्र संझिने हो भने पनि त्यस्तो लायकको कुनै छैन ।

३. रेखा थापा

नेपालमा नायक जस्तो शक्तिशाली नायिकाको रुपमा रेखा थापालाई हेरिन्छ । रेखा थापाले पनि एक दशक भन्दा बढी नम्बर १ को  उपाधि पाइन् । रेखा थापाले अभिनय गरेका चलचित्र सिंगल हलमा सधै चले, मल्टिप्लेक्समा त प्रवेश पनि राम्रोसँग गर्न पाएनन् ।

रेखा थापाले काम गरेका चलचित्रमा कि त प्रेम भए, कि त एक्सन । उनले अझै पनि त्यस्तो विशेष भूमिकामा काम गरौ भन्ने आट गर्न सकेकी छैनन् । तर, पनि उनी लामो बर्ष नम्बर १ को पगरी बोक्न सफल भइन् ।

४. प्रियंका कार्की

नायिका प्रियंका कार्की  रेखा थापाको नम्बर १ को उपाधि खोस्दै विगत केही बर्षदेखि नेपाली चलचित्रको नायिकाहरुमा शिर्ष स्थानमा छिन् । प्रियंका कार्कीको नम्बर १ को पगरी अब विस्तारै खोसिन पनि थालेको छ ।

तर, प्रियंका कार्कीले पनि यो छोटो अवधीमा चलचित्र, म्यूजिक भिडियो, विज्ञापन, विदेशका कार्यक्रम सबै भ्याइन् । तर, आजसम्म उनका पनि संझनलायक कुनै पनि चलचित्र छैनन् ।

प्रियंका कार्कीले सधै आफूलाई सेफ जोनमा राखेर काम गरेको देखिन्छ । उनले रिस्क लिएर आफूलाई सोलो नायिकाको रुपमा उभ्याउने प्रयास नै गरिनन् । नम्बर १ को उपाधि त उनले पनि पाइन्, तर अर्थहिन ।

५. साम्राज्ञी राज्यलक्ष्मी शाह

नायिका साम्राज्ञी राज्यलक्ष्मी शाहको क्रेज पनि अहिले चुलिएको छ । यूवापुस्तामा उनी अहिलेको नम्बर १ नायिका भन्ने बहस पनि चल्छ । पि्रयंका कार्कीले गुमाउँदै गएको स्टारडम अब साम्राज्ञीको हातमा आएको छ भन्नेहरु पनि छन् । तर, साम्राज्ञीले काम गरेका ५ वटा चलचित्रको कथावस्तु हेर्ने हो भने उनले पनि आफूलाई तत्काल फरक भूमिकामा प्रस्तुत गर्नुपर्ने देखिएको छ ।

उनले सुरु गरेको डि्रम्सदेखि इन्टु मिन्टु लण्डनमासम्म आइपुग्दा उनको अवस्था पनि सुधारिएको छैन । एउटै खालको अभिनयले साम्राज्ञीले केही समय नम्बर १ को उपाधि त पाउलिन्, तर लामो रेशको घोडा बन्न मुश्किल छ ।

नेपालमा आर्यन सिग्देल र जीवन लुइटेलविच पनि नम्बर १ नायकको लडाई चल्यो । तर, दुबैले संझनलायक र फरक भूमिका गर्ने कोशिश गरेनन् । अहिले नायक अनमोल केसी, प्रदिप खड्काविच यो उपाधिका लागि लडाई छ । तर, उनीहरु पनि चकलेटी अनुहारकै भरमा टिकिरहेको चर्चा हुन्छ ।

Continue Reading…

जुवा खालबाट १५ जना पक्राउ, साढे चार लाख बरामद

५ कात्तिक, नवलपरासी । पूर्वी नवलपरासीको इलाका प्रहरी कार्यालय गैंडाकोटले जुवाखालबाट साढे चार लाख नगदसहित १५ जनालाई पक्राउ गरेको छ ।

गैंडाकोट नगरपालिका १ ब्रिटिस क्याम्प नजिकै रहेको खरको टहराभित्र लुकेर कौडा खेलिरहेकाहरुलाई सोमबार बिहान पक्राउ गरिएको इलाका प्रहरी कार्यालय, गैंडाकोटका प्रहरी निरीक्षक लोकबहादुर जीसीले जानकारी दिए ।

पक्राउ पर्नेमा गैंडाकोट-१ का रमेश श्रेष्ठ, चितवनको भरतपुर महानगरपालिका ५ का विमल श्रेष्ठ, भरतपुर २ का खुमप्रसाद श्रेष्ठ, भरतपुर ३ का अनिल शाह, भरतपुर ४ का श्याम लामा, भरतपुर २ का प्रदीप लामा, भरतपुर ११ का निर्मल श्रेष्ठ, भरतपुर १९ का कृष्णहरि शर्मा, चितवनको रत्ननगर नगरपालिका १४ का विशाल बस्नेत, सोही ठाउँका कुमार गुरुङ, बाबुराम अर्याल र लमजुङ बेंसीशहर २ का विपिन गुरुङ रहेका छन् ।

पक्राउ परेकालाई इलाका प्रहरी कार्यालय गैंडाकोटमा राखिएको छ ।

Continue Reading…

दशैंभरि के-के भयो ? दुर्घटनामा ३१ को मृत्यु

५ कात्तिक, काठमाडौं । दशैंको फूलपातीदेखि यता विभिन्न जिल्लामा भएका सवारी दुर्घटनाहरुमा ३१ जनाको मृत्यु भएको छ । गत असोज ३० गते फूलपातीदेखि कात्तिक ४ गते आइतबारसम्म दुई दर्जन भन्दा बढी सवारी दुर्घटना भएका छन् र ती दुर्घटनाहरुमा तीन दर्जन बढीको ज्यान गएको छ ।

आइतबार र शनिबारमात्रै नवलपरासीमा ६, रामेछापमा ३, स्याङ्जा, महोत्तरी र रुपन्देहीमा १–१ गरी १२ जनाको मृत्यु भएको प्रहरीको तथ्यांक छ ।

सबैभन्दा धेरै दुर्घटना फूलपाति र टीकाको दिन भोलिपल्ट भएका छन् । फूलपातिको दिनदेखि सार्वजनिक विदा हुने हुँदा उक्त दिन घर फर्किनेहरुको र टीका सकेर आफ्नो कर्मथलो फर्किनेहरुको चाप बढी हुने गर्दछ ।

फूलपातीको दिन ३० गते ७ वटा तथा टीकाको भोलिपल्ट अर्थात् कात्तिक ३ गते ४ वटा दुर्घटना भएका छन् । असोज ३० र ३१ गतेको दुर्घटनामा १८ जनाको ज्यान गएको छ भने कात्तिक ३ गतेको दुर्घटनामा ५ जनाको ज्यान गएको छ ।

पूर्वपश्चिम राजमार्गअन्तर्गत पूर्वीनवलपरासीको मध्यबिन्दु नगरपालिका–११ अरुणखोलामा लु १ ख ८४५४ नम्बरको बस आइतबार दुर्घटना हुँदा ६ जनाको मृत्यु भएको छ । मृत्यु हुनेहरुमा मोरङ सुन्दरहरैँचाका ११ वर्षीय सोहन कार्की, भोजपुर हतुवागढी–६ का २७ वर्षीय रामजित राई, जिल्ला जनस्वास्थ्य कार्यालय नवलपरासी पश्चिममा कार्यरत सुनसरीका ३२ वर्षीय अब्दुल अन्सारी, भारत बिहारका विद्यानन्द यादव, भारत गोरखपुरका ५५ वर्षीय दीपक पासवान र हस्तीचौरका ३५ वर्षीय तिलक विष्ट रहेका एसपी रमेश थापाले जानकारी दिए ।

स्याङ्जामा आइतबार लु १ ज ३३८० नम्बरको जिप दुर्घटना हुँदा एकजनाको मृत्यु भएको छ । गल्याङ नगरपालिका–७, धराङ्दीमा जिप दुर्घटना हुँदा गल्याङ–७ का ३२ वर्षीय रामप्रसाद भण्डारीको मृत्यु भएको हो । दुर्घटनामा १९ जना घाइते भएका छन् ।

पृथ्वी राजमार्गअन्तर्गत तनहुँको आबुखैरेनी–२ नारीघाटमा आइतबार ना ४ ख ७८४१ नम्बरको बस पल्टिँदा २३ यात्रु र मोरङको पथरी शनिश्चरे–२ मा को १ ख ४५१७ नम्बरको बस दुर्घटना हुँदा ३६ यात्रु घाइते भए ।

टीकाकै दिन ७ जनाको मृत्यु

कात्तिक २ गते दशैंको टीकाको दिन आधा दर्जन बढीको ज्यान गयो ।

रामेछाप नगरपालिका–२ को खरानेटार भीरमा शनिबार साँझ जिप दुर्घटना हुँदा तीन जनाको मृत्यु भयो । ना १ ज ४८१२ नम्बरको जिप दुर्घटना हुँदा रामेछाप नगरपालिका–१ की ६० वर्षीया ललिमाया कार्की, उनका छोरा ४० वर्षीय दुर्गाबहादुर कार्की र चालक ४० वर्षीय हेमबहादुर खत्रीको मृत्यु भएको छ । यसअघि रामेछापको खाँडादेवीमा पनि बस दुर्घटना हुँदा एक जनाको मृत्यु भएको थियो ।

नारायणगढ–मुग्लिन सडकखण्ड अन्तर्गत चितवनको इच्छाकामना गाउँपालिका–६ जलवीरेमा बस दुर्घटना हुँदा ३ जनाको घटनास्थलमै मृत्यु भयो । काँकडभिट्टाबाट पोखरा जाँदै गरेको ना ५ ख ४३८३ नम्बरको बस जलवीरे पुलबाट झण्डै ५० मिटर तल खसेको थियो ।

सोही दिन पूर्वपश्चिम राजमार्ग अन्तर्गत महोत्तरीको बर्दिबास नगरपालिका–१ मा ना १ ज २९०२ नम्बरको टाटा सुमो गाडीले ठक्कर दिँदा धनुषा मिथिला नगरपालिका–८ का ५० वर्षीय भैरवबहादुर बम्जनको मृत्यु भएको छ ।

त्यस्तै, रुपन्देहीको ओमसतिया गाउँपालिका–५ पट्खौलीमा लु १९ प २९९६ नम्बरको स्कुटर लु १८ प ८४९७ नम्बरको मोटरसाइकलमा ठोक्किँदा स्कुटरमा सवार रुपन्देही सियारीका २५ वर्षीय शिवपुजन चौधरीको मृत्यु भएको प्रहरीले जनाएको छ ।

यसैगरी कात्तिक १ गते काठमाडौंको ठूलो भ‍र्‍याङमा बा २९ प ३७०७ नम्बरको मोटरसाइकलको ठक्करबाट एक जना पैदलयात्रीको मृत्यु भयो । मृत्यु हुनेमा सिन्धुपाल्चोक जुगल–७ घर भइ सानो भर्‍याङ बस्दै आएका ५५ वर्षीय वीरबहादुर तामाङ छन् ।

कात्तिक १ गते नै गोरखाको पालुङटार–१, सातदोबाटोका ५८ वर्षीय जुठे नेपाली मृत भेटिएका छन् । उनी बिहान साढे ८ बजे सातदोबाटो बजार नजिकै मृत भेटिएका थिए । बाटोबाट करिब पाँच मिटर तल बारीमा उनको शव फेला परेको थियो ।

फूलपातिको दिन असोज ३० गते उदयपुरको त्रियुगा नगरपालिकास्थित सडकमा मोटरसाइकल दुर्घटना हुँदा दिनेश पौडेलको मृत्यु भएको छ ।

यसैगरी झापाको बुद्धशान्ति चोकमा मोटरसाइकलको ठक्करबाट ७५ वर्षीय खड्गबहादुर कार्कीको घटनास्थलमै मृत्यु भ एको छ ।सोही दिन रुकुमको मुसिकोटमा बस दुर्घटना हुँदा नौं वर्षीय बालक परेश बीसीको मृत्यु भएको छ ।

असोज ३१ गते पृथ्वी राजमार्ग अन्तर्गत चितवनको कुरिनटारमा बा १ घ ५६५ नम्बरको दूध बोक्ने ट्यांकरले कुरिनटारमा रोकिराखेको ग २ च १७५१ नम्बरको भ्यानलाई ठक्कर दिँदा दुई जनाको मृत्यु भएको थियो । मृत्यु हुनेमा ट्यांकर चालक सुन्दर खड्का र धादिङ, वैरेनीका ४ वर्षीय रोशन गैरे छन् ।

दशैंको भोलिपल्टै श्रीमतीको हत्या

दशैंको टीकाको भोलिपल्ट शनिबार घरमै श्रीमतीको हत्या गरी फरार रहेका कनकाई नगरपालिका–८ का आइतराज परियार पक्राउ परेका छन् ।

आइतराजले मदिरा सेवन गरी ४० वर्षीया श्रीमती माया परियारको हत्या गरेर फरार भएका थिए । उनलाई लुकीछिपी इलामको दानाबारीमा बसेको अवस्थामा आइतबार पक्राउ गरेको जिल्ला प्रहरी कार्यालय झापाका प्रहरी नायब उपरीक्षक जीतेन्द्रकुमार बस्नेतले जानकारी दिए ।

आइतराजले हत्या आफैले गरेको प्रहरीसमक्ष स्वीकार गरेको र उनलाई ज्यान मुद्दामा म्याद थप गरी अनुसन्धान कार्य भइरहेको प्रहरीले जनाएको छ ।

आइतबार नै गुल्मीमा घरायसी झगडा हुँदा एक व्यक्तिले श्रीमतीको हत्या गरेका छन् । मुसिकोट नगरपालिका–७, इन्द्रेगौंडाका ३५ वर्षीय पंकज कुमालले सामान्य विवादमा ३० वर्षीया श्रीमती लाली कुमालको हत्या गरेका हुन् ।

दुई छोराको हत्यापछि आत्महत्या

बाराको जितपुरसिमरा उपमहानगरपालिका–४ को औराहका ३५ वर्षे सुरेन्द्र रामले आइतबार आफ्ना दुई छोराको हत्या गरी आफूले पनि आत्महत्या गरे ।

रामले आफ्ना पाँच वर्षीय छोरा सुबिन राम र तीन वर्षीय विपिन रामको हत्या गरी आफूले पनि झुण्डिएर आत्महत्या गरेको प्रहरीको प्रारम्भिक अनुमान रहेको सिमरा इलाका प्रहरी कार्यालयका प्रहरी निरीक्षक सुभाष हमालले बताए ।

दशैंकै दिन गोली लागेर मृत्यु

हुम्लामा बाँदर धपाउन पड्काएको भरुवा बन्दुकको गोली लागेर गत शुक्रबार दशैंको टीकाकै दिन एक जनाको मृत्यु भयो । सर्केगाड गाउँपालिका–२ रिप बस्ने २८ वर्षीय सुरेन्द्र कार्कीको मृत्यु भएको हो ।

सोही ठाउँ बस्ने ४० वर्षीय रंगमल महताराले आफ्नो स्याउ फार्ममा आएका बाँदर धपाउन पड्काएको भरुवा बन्दुकको गोली सुरेन्द्रलाई लागेको थियो । उनको उपचारकोे लागि स्वास्थ्य चौकी रिपतर्फ लैजाने क्रममा बाटोमै मृत्यु भएको प्रहरी प्रमुख उपरीक्षक रबिन श्रेष्ठले जानकारी दिए ।

टीकाकै दिन हत्या

जिल्ला प्रहरी कार्यालय धनुषाका अनुसार दशैंको टीकाको दिन अपरान्ह ३ बजे ग्यास सिलिण्डर विष्फोट हुँदा ४७ वर्षीय प्रमोद साहको मृत्यु भएको छ भने दुई जना घाइते भएका छन् ।

दशैंको टीकाकै दिन मोरङको पथरीशनिश्चरे–८ स्थित शुक्रबारेमा एक युवकको हत्या भएको छ । राति १० बजे २७ वर्षीय विजय खड्काको खुकुरी प्रहार गरी हत्या भएको हो ।

खुकुरी प्रहारबाट टाउको र शरीरका विभिन्न भागमा चोट लागेका खड्काको घटनास्थलमै मृत्यु भएको पथरी इलाका प्रहरी कार्यालयका प्रहरी निरीक्षक कमल बजगाईले जानकारी दिए ।

यसैबीच सप्तरीको राजगढ गाउँपालिका–३ कट्टीमा करेन्ट लागेर टीकाको भोलिपल्ट साँझ एक बालकको मृत्यु भयो । मृत्यु हुनेमा स्थानीय १४ वर्षीय उमेशकुमार साह रहेको जिल्ला प्रहरी कार्यालय, सप्तरीले जनाएको छ ।

आफ्नै फूलबारीमा पानी तान्ने मोटर चलाउने क्रममा उनलाई करेन्ट लागेको थियो ।

धनुषाको जनकपुरधाम उपमहानगरपालिका–४ पुरानो बसपार्कस्थित ग्यास वेल्डिङमा ग्यास सिलिण्डर विष्फोट हुँदा एक जनाको मृत्यु भएको छ ।

फरार अभियुक्त दशैंमा घर आएको बेला पक्राउ

जग्गासम्बन्धी बिवादमा छिमेकीको हत्या गरेर फरार भएका एक अभियुक्त २९ वर्षपछि पक्राउ परे । पक्राउ पर्नेमा हलेसी तुवाचुङ नगरपालिका–१ बाहुनीडाँडाका ६० वर्षीय चन्द्रबहादुर कार्की छन् । जग्गा बिवादका क्रममा २०४६ सालमा स्थानीय ढकबहादुर कार्कीको हत्या गरेर फरार कार्कीलाई सुनसरीको रामधुनी नगरपालिका–७ पञ्चायनबाट पक्राउ गरिएको हो ।

घटनापछि भारतमा बस्दै आएका चन्द्रबहादुर दशैं मनाउन घर आएका बेला जिल्लाबाट खटिएको प्रहरी टोलीले उनलाई पक्राउ गरेको जिल्ला प्रहरी कार्यालय खोटाङका प्रहरी नायब उपरीक्षक राजकुमार केसीले बताए ।

यसैगरी महानगरीय अपराध अनुसन्धान महाशाखाले काठमाडौं–३, रानीबारीमा १८ वर्षीय बालक जीवन लोहनीको हत्या गरी फरार अभियुक्तलाई दशैंको टीकाको भोलिपल्ट पक्राउ गरेको छ ।

पक्राउ पर्नेमा बाग्लुङ देविस्थान–२ का ३७ वर्षीय हिक्मत हमाल छन् । यसअघि हमालसहित हरि गिरी, प्रकाश हमाललगायतको समूहले मादक पदार्थ सेवन गरेर बालक लोहनीको हत्या गरेको थियो ।

हत्यामा संलग्न हरि र प्रकाश यसअघि नै पक्राउ परिसकेका छन् । घटनामा संलग्न दुई जना अझै फरार छन् ।

Continue Reading…

यात्रा संस्मरणः आधा मुस्कान पनि खस्यो भुइँमा

नानू ! उठ्नुस्, खाजा खाने बेला भयो, मञ्जु दिज्यूको आवाज कानमा परेपछि बिउँझिएँ । यात्रामा मलाई खुब निद्रा पर्छ । मुङ्गलिनमा खाजा खायौँ । कलासाहित्य डट कम प्रतिष्ठानद्वारा आयोजित कलासाहित्य यात्रामा छौँ । यात्रा सिकाइ, भोगाइ र यादहरुको सिलसिला हो क्यारे ! निरन्तर यात्रामै दौडियौँ । यात्राको उत्साहले अब भने म निदाइनँ । निदाउनु पनि कसरी, मलाई त प्रकृतिको काखमा बसेर प्रकृतिलाई म्वाईँ खानु छ ।

चितवनबाट हामीसँग कवि भूपिन दाइ मिसिनुभयो ।सरल भाषा, फरक शैलीसहित, छुट्टै विचार निर्माण गरेको उहाँको कविता संग्रह ‘सुप्लाको हवाइ जहाज’ जति पढूँ, अझ पढूँ लाग्छ । भूपिन दाइको ‘एउटा नोटको जीवनी’ कविता पढेपछि आजसम्म मैले मन्दिरमा भगवान्लाई नोट चढाएको छैन ।

आफ्नो भित्तामा ‘बेटी पढाओ, बेटी बचाओ’ लेखेको गाडी हाम्रो गाडीलाई ओभरटेक गर्दै अगाडि लाग्यो । मान्छे ठूलाठूला कुरा गर्दैमा समझदार हुँदैन, मान्छे त्यतिबेला समझदार हुन्छ जतिबेला ऊ सानासाना कुरा बुझ्न थाल्छ । खुब हेरेँ गाडीलाई र मनमनै सलाम गरेँ ।

हामी बुटवल आइपुग्यौँ । त्यो रात डार्सिस इन्टरनेसनल होटलमा बितायौँ । खाना गजब थियो, खानाभन्दा पनि गजब कलासाहित्य–यात्रामा सहभागी यात्रीहरुमा झल्किएको खुसी । यात्राको खास सौन्दर्य बाँकी नै छ । मन उत्साहित छ; मन उडिरहेछ ।

यात्राको दोस्रो दिन बाटोभरि हाम्रो स्वागतमा फूल उभिएको थियो । थाहा थिएन, कुन फूल हो ? स्थानीयलाई सोध्यौँ, फूलको नाम बेस्रम रहेछ । त्यसो त बाटाभरि गाई, गोरु र बाच्छाबाच्छी थिए । दिउँसो छउन्जेल सोचेँ, चराउन ल्याएका होलान् । रातिसम्म पनि जति यात्रा बढ्यो उति गाईहरुदेखेँ, अचम्म लाग्यो । ती गाईहरु त दूध दिन छाडेपछि, बूढो भएपछि बाटामा छाडिएका रहेछन् । यदि पुनः दूध दिन थाले भने, छाडेको गाई मेरो भन्दै फेरि घर पनि लान्छन् अरे । दुख लाग्यो, मान्छेको हृदय यतिविघ्न कुरुप सम्भव छ ? रहेछ । सरकारले नै पनि ठाउँ–ठाउँमा गौशाला खोलेर हजारौँ तीसडके गाईलाई बास दिने हो भने, दूध, दही,घिउमात्र होइन, गोबरगहुँतको प्राकृतिकसदुपयोगबाट कति आम्दानी गर्न सकिएला ! महत्वपूर्ण कुरा त जबबास पाउँछन्; तबती गाईहरु कति खुसी होलान् ?सुन्दर अनि कुरुप हृदय अवलोकन गर्दागर्दै हामी कोहलपुर आइपुग्यौँ । हामी बाँके जिल्लाको उत्तर पश्चिम कुनामा छौँ । सुनेको थिएँ, कोहलपुर नेपालकै प्रगति उन्मुख नगर हो । वास्तवमै हो रहेछ । पहिलो पटक ०६७ सालमा आउँदा राम्ररी नियाल्न सकेको थिइनँ ।

कोहलपुरमा माहोल विशेष बन्यो । कलासाहित्य डट कम प्रतिष्ठानले जाजरकोटी समाजलाईपुस्तक हस्तान्तरण गर्‍याे । जाजरकोटी समाजले प्रतिष्ठानका उपाध्यक्ष कवि राजेश्वर कार्कीलाई सम्मान गरिरहँदा, आफ्नो कर्मको सम्मान हुँदा मान्छे भावुक हुन्छ प्रष्ट झल्किन्थ्यो । मुहार पुस्तिकामा झल्केको खुसी प्राकृतिक रूपमा छल्किरहेको थियो ।अझ कार्की सरले साहित्य लेखनसँगै धेरै समाजसेवा गर्नुभएको छ । कोहलपुरमै प्रतिष्ठानले मध्यपश्चिम क्षेत्रकै केन्द्रको रुपमा रहेको ज्ञानोदय सामुदायिक पुस्तकालयललाई पनि पुस्तक हस्तान्तरण गर्‍याे । प्रतिष्ठानले यसरी समाजलाई शब्द, रङ्ग र ध्वनिको सुन्दरताले समाजलाई कलामय केन्द्रित गर्ने मात्र होइन; समृद्ध र सभ्य समाजको निर्माणमा अाफ्नाे ठोस योगदान पनि गर्दै आएको रहेछ । यसरी नै यो देशमा सबैले आ–आफ्नो ठाउँबाट कर्मको उदाहण प्रस्तुत गरिरहे कति सुन्दर हुन्थ्यो होला !

धनगढीलाई केन्द्र बनाएर सुरु भएको कलासाहित्य यात्रा अब धनगढीतर्फ लाग्यो । धनगढीमा कलासाहित्य–यात्राअन्र्तगत, प्रकृति सिर्जना–उत्सव हुँदै छ । हामी रुबस होटलमा बस्यौँ, हाम्रो भोलिको कार्यक्रमस्थल पनि यही हो । यही होटलमा पूर्व राजा ज्ञानेन्द्र बस्थे रे । तर होटलको म्यानेजमेन्ट त्यति चित्त बुझ्दो लागेन । प्रतिष्ठानकै अध्यक्ष मोमिला दिज्यूले कम्प्लेन गरेपछि भोलिपल्टबाट हामीलाई राम्रो व्यवस्था गरियो ।

कार्यक्रम शुरु हुन केही घण्टा बाँकी छ । बिहान धनगढी सहरको मुहार हेर्‍याैं । बिहानी घामको किरणसँगै मुसुक्क मुस्कुरायो धनगढी । प्रकृतिको नजिक बाँसले बनाइएको हलमा कार्यक्रम सुरु हुनै लाग्यो । प्रदेश नं.७ का मुख्यमन्त्री त्रिलोचन भट्ट प्रकृति सिर्जना उत्सवको प्रमुख अतिथि हुनुहुन्थ्यो । उहाँले एउटा यथार्थ उद्घाटन गर्नुभयो, ‘साहित्यकारले देशको भविष्यलाई आकार दिन्छ ।’ मलाई लाग्छ, सबैले यति बुझ्ने हो भने, नेपाली कलासाहित्यको श्रीबृद्धि मात्र नभएर समग्र देशले विकासको गति लिन पाउँथ्यो ।

कार्यक्रममा बहुत सुन्दर कविता सुनिए । सुन्दर दाइले खिच्नुभएको सिङ्गो देशको डिजिटल तस्बिर प्रदर्शनसँगै सुरु भएको कार्यक्रममा पनि सुन्दर दाइ तस्बिरकलामै मग्न हुनुहुन्थ्यो । सायद, शब्दहीन सुन्दर पलहरू तस्बिरमा कैद गर्नुभयो ।

जिल्लाबाहिरको यति भब्य कार्यक्रम विरलै देख्न पाइन्छ । अशेष मल्ल, मञ्जु काँचुली, मोमिला, लक्ष्मण गान्नागे, डा.हरिप्रसाद मानसाग्नि, युवराज नयाँघरे, राजेश्वर कार्की, भूपिन खड्का, केशव सिग्देल, डा.जंगब चौहान, डा. कृष्णराज डी.सी., अभय श्रेष्ठ, मणि लोहनी, कपिल अञ्जान, जीवन खत्री र म लगायत स्थानीय कविहरुको कविता वाचन भैरहँदा हलको उत्साह र तालीको गड्गडाहट शब्दमा लेख्न सायदै सकिएला ।कार्यक्रममा विगत १२ वर्षदेखि प्रतिष्ठानले प्रोत्साहन एवं योगदानको कदर गर्दै स्थानीय स्रष्टालाई ‘योगेश्वर कलासाहित्य पुरस्कार’ प्रदान गर्दै आएको रहेछ । कवि राजेश्वर कार्कीको समाजसेवी बुवाको नाममा स्थापना गरिएको ‘योगेश्वर कलासाहित्य पुरस्कार’ यस पटक (२०७५)सुदूरपश्चिमका अग्रणी साहित्यकार पद्मराज जोशीलाई रु २५ हजारसहित सर्मपण गर्दा स्थानीयहरुले समेत आफैं सम्मानित भएको अनुभूत गर्नु कम्ता सानो कुरा पनि त होइन । यस्ता महत्वपूर्ण कार्य एउटा गैह्र सरकारी संस्थाबाट भइरहँदा,सरकारी संस्थाले कहिले सिक्छ पाठ ! देशकै धडकन, जसले भाषा, धर्म, संस्कृतिलाई जीवन्त तुल्याउँछ, यस्ता देशका मुटुलाई कहिले राख्छन् प्राथमिकतामा ? नेपाली कलासाहित्य डट कम प्रतिष्ठानको नेतृत्वमा भएको यस्तो महत्वपूर्ण कार्यबाट काठमाडौँलगायतका ठाउँमा च्याउजस्तै उम्रिएका साहित्यिक संस्थाले पनि सीमित घेरा र गुटबन्दी कसरी तोड्ने सिक्न जरुरी छ ।

काठमाडौं मै बसिरह्यौँ, भनिरह्याैं हामी केन्द्रका साहित्यकार, कहाँ हो साहित्यको केन्द्र ? कहाँ हो साहित्यकारको केन्द्र ? कहाँ बस्नुपर्ने हो कलासाहित्यप्रेमी ? कैलालीले सिकाइ रह्यो, प्रकृति र समाजभन्दा पर कुनै यात्रा छैन । कुनै बिन्दु छैन ।

अर्को दिन महेन्द्र नगर, शुक्लाफाँटा राष्ट्रिय निकुञ्ज र शारदा ब्यारेजपुग्नु थियो । लाग्यौँ । महेन्द्रनगर महाकाली पुल पुगियो । केही वर्ष अगाडिसम्म मेरो देशको झण्डा आधा महाकाली ओगट्दै मुस्किलले आधा मुस्कुराउँथ्यो । तर, त्यतिखेर आधा मुस्कान पनि खस्यो भुईँमा । आफ्नै महाकालीलाई एक अँगालो प्रेम गर्न नपाउँदा कम्ता मन कुँडिएको हैन । ‘चित्र लेना मना है’ मैले मेरो आमाको तस्बिर खिच्न नपाउने ? खिचेँ । ‘झापड मार्दुंगी’ म झस्किएँ । यसो हेरें, फर्सी जस्तो फ्यात्त अनुहार, राक्षसका जस्ता आँखा, बाइकमा एउटी आर्मी थिई । आर्मी होइन, मान्छे होइन र जनावर पनि होइन । के भनाँै, यस्तो लाग्यो ऊ दुनियाँकै अजिव प्राणी जसलाई सभ्यता थाहा छैन । शिष्टता थाहा छैन । मानवीयता थाहा छैन । मैले पनि आँखा तरेँ लु जा ! मनमनै गाली गरेँ । प्रिय महाकालीको स्केच आँखाभरि कोरेर मुटुमा राखेँ । शुक्लाफाँटा राष्ट्रिय निकुञ्ज आइपुग्दा, हामीलाई तस्बिर डिलिट गर्न लगाउने आर्मी सम्झें । ऊ मा बरु स्वभाव थियो । यतिबेला उसका ठूला स्वर ठूला लागेनन् । टाढाबाट आएको पीडाको गन्धले सताए पनि आप्mनो भूमिमा पराई भूमिमा जस्तो त दुखेन ।

गह्रौं हृदय सम्हाल्दै शुक्लाफाँटा लाग्यौँ । जब प्रवेश गर्‍याैं, त्यहाँको कर्मचारीको न्यानो आतिथ्यता र प्रकृतिको विचित्र चित्रले मन हलुका बनायो । मन चङ्गा भयो । उड्यो बेगले हावासँगै । जङ्गलमा मृग, चित्तल, जरायो बँदेल, बाह्र सिँगे, नील गाई, हात्ती, विभिन्न जात र रङका चराहरुसँग साक्षात्कार हुँदाको खुसी सायदै शब्दमा उतार्न सकुँला । जतिसुकै महान् आर्टिस्ट पनि फेल खान्छ, प्रकृतिको क्यानभासकाविचित्र चित्रसामु । सोच्छु को हो त्यो चित्रकार; जसले यस्तो चित्र कोर्‍याे ? कसरी गर्‍याे होला कल्पना ?कुनै चित्र कुनैसँग मिल्दैन, कुनै रङ्ग कुनैसँग मिल्दैन, कुनै अनुहार, कुनै अनुहारसँग मिल्दैन । यति विचित्रको प्रकृति चित्र निर्माण कसरी सम्भव भयो होला ? म सोच्छु, सोच्छु, सोचिरहन्छु । कुनै उत्तर भेट्दिन, बस प्रकृतिमै हराउँछु ।

हामी फर्कियौँ । जङ्गल प्रवेश गर्दा गाडीको पछाडि उभिएर खुला हावा खाँदै गएकी म, आउँदा साँझ परेकाले अलि खतराको सम्भावना हुन्छ भन्दै, मलाई गाडीभित्र बोलाउनुभयो । म जिद्दी गर्दै थिएँ । मलाई प्रकृतिसँग नजिक भएर खुला आकाश र धर्ती हेर्न पुगेकै थिएन । अग्रजले भनेपछि नमान्न गाह्रै हुन्छ, म भित्र गाडीको सिटमा बसेँ । सिट ३ जनाको थियो । हामी चार जना बस्यौँ । मलाई अप्ठ्यारो भयो भन्दै मोमिला दिज्यूले मलाई आफ्नो काखमा जसरी बाँदरले आफ्नो बच्चा चेप्छ, त्यसरी अति मायाका साथ राख्नुभयो । पहिलो पटक दिज्यूको काखमा लुट्पुटिन पाएँ । आमाको काखझैँ अनुभूत भइरह्यो । यात्राको यति सुन्दर आनन्द भेटेँ । मोमिला दिज्यू खुब सुन्दर निबन्ध, कविता लेख्नुहुन्छ । उहाँको काखको यात्रामा मेरो मानसपटलमा केके घुम्यो लेखेर सकिंँदैन । मलाई यति थाहा छ, उहाँ जे लेख्नुहुन्छ, व्यवहारमा उतार्नुहुन्छ । मलाई दिज्यूको यो कविता र कर्मको तादात्म्य गजबको लाग्छ ।

आगो शब्द बोल्दैमा

बोल्ने ओठहरू डढ्ने छैनन्

पानी शब्द बोल्दैमा

बोल्ने ओठहरू भिज्ने छैनन् ।

—मोमिला

फर्केर धनगढी बासबस्न जानु थियो । बाटो भुल्यौँ । साँझमा झन् जङ्गलभित्र पो लागेछौँ । बाघ देख्ने रहर पुरा हुन्छ कि भन्दै थिए दाइ । म भने साँझको जङ्गललाई नजिकबाट चिहाइरहेथेँ । कहिलेकाहीँ बाटो बिराउँदा पनि रमाइलो हुँदोरहेछ । अन्ततः वनकार्यलयका कर्मचारी हामीलाई लिन आए र मूलबाटोसम्म पुर्‍याएर मात्र विदाइ गरे । यो हार्दिकता सायदै विर्सन सकिएला । अर्को दिन फर्केर त्रिवेणीधाम आयौँ ।

त्रिवेणीधाम जाने बाल्यकालदेखिको रहर पूरा भयो । घरबेटी आमा लक्ष्मी पहारी, उहाँको पहिलाको घर नवलपरासी, अहिले पनि छ । त्रिवेणीधामको ऐतिहासिक महत्व र सुन्दरताबारे उहाँले खुब गुणगान गर्नुहुन्थ्यो । विश्वास लागिरहेको छैन, आज म त्यही ठाउँ आइपुगेको छु । त्रिवेणीधामको सुन्दरता जानेलाई पक्कै थाहा छ । टपक्क टिपेर खल्तीमा राखौँ र काठमाडौँको सहरबाट हेर्ने शक्ति प्राप्त होस् । सोचाइ पनि केके आउँछ, कल्पना पनि केके गरिन्छ । धामबाट फर्केर, प्राकृतिक चिकित्सालय आयौँ । रमणीय वातावरण पुष्पगुञ्छा सहितको पाहुना सत्कारले कसको मन नलोभ्याउला ?त्यहाँका निर्देशक, डक्टर, कर्मचारी अझ बढी हामीसँगै जानुभएको डा. हरिप्रसाद मानसाग्निले त्यहाँको उपचार पद्धति र प्राकृतिक विधिको महत्व र भोलिको योजना प्रष्ट्याउनुभयो । मेरो बुवाको नाम पनि हरिप्रसाद र यात्रामा सम्मिलित कवि, योग गुरु एवं सन्त पनि हरिप्रसाद, म खुसी भएँ । मैले दोस्रो बा भेटेँ । हामी दुवैले बाउ र छोरीको नाता नजिकबाट महसुस गर्‍याैं ।

अन्ततः यात्राका यादहरु सँगाल्दै फर्किनु थियो आखिर, म गाडीमा निदाएँ । गाडी दौडियो ।

Continue Reading…
Loading...

Popular Bla Bla's

Loading...

Latest Bla Bla's on Fun2Sh

Powered by Blogger.
Copyright © Funtoosh Blog