Saturday, August 17, 2019

संसदमा आज प्रधानमन्त्रीको सम्बोधन

१ भदौ, काठमाडौं । प्रधानमन्त्री केपी शर्मा ओलीले आइतबार संसदमा सम्बोधन गर्दैछन् । बिहान ११ बजे बस्ने संसद बैठकमा प्रधानमन्त्रीले सम्बोधन गर्ने प्रधानमन्त्रीका प्रेस संयोजक चेतन अधिकारीले जानकारी दिए ।

सभामुख कृष्णबहादुर महराका प्रेस सल्लाहकार डिल्ली मल्लले पनि प्रधानमन्त्रीले संसदमा सम्बोधन गर्ने भनेर संसद सचिवालयमा जानकारी आएको बताए ।

अधिकारीका अनुसार प्रधानमन्त्री ओलीले समसामयीक विषयमा बोल्नुका साथै सांसदहरुले उठाएका केही जिज्ञासाको पनि जवाफ दिने छन् ।

उनले आफ्नो स्वास्थ्य अवस्थाबारे पनि जानकारी गराउने बताइएको छ । प्रधानमन्त्री ओली हालै सिंगापुरमा उपचार गराएर फर्किएका थिए ।

Continue Reading…

म्याग्दीमा चट्याङ पर्दा ६१ भेडा मरे, १० लाख बराबरको क्षति

म्याग्दी । म्याग्दीको अन्नपूर्ण गाउँपालिका–५ खयरमा चट्याङ लागेर भेडा मर्दा १० लाख मूल्य बराबरको क्षति पुगेको छ ।

शुक्रबार राति ११ः३० बजे परेको चट्याङ लागेर खर्कमा बास बसेका ६१ वटा भेडा मरेका छन् । करीब रु १० लाख मूल्य बराबरको क्षति पुगेको कृषकसमेत रहनुभएका वडा सदस्य राजेश तिलिजा पुनले जानकारी दिए । सबैभन्दा धेरै तिलिजाका २६ वटा भेडा मरेका छन् । लालवीर तिलिजा, मिनबहादुर गुरुङ, टिकजित तिलिजा, यामबहादुर पाइजा, डिलप्रसाद शेरपुञ्जा र कमल तिलीजाका भेडा पनि मरेका छन् ।

एक वटा भेडाको मूल्य रु १५ हजारदेखि रु २५ हजार छ । सबै कृषकका भेडालाई गोठालाले एउटै खर्कमा राखेका थिए । घार प्रहरी चौकीबाट प्रहरी टोली घटनास्थल गएको छ । पाउद्वार गाउँदेखि खयर पुग्न करीब १२ घण्टा उकालो हिँड्नुपर्छ ।

पीडित कृषकले क्षतिपूर्ति र घुम्ती गोठमा पालिने भेडाबाख्राको पनि बीमा सुविधा हुनुपर्ने माग गरेका छन् ।

Continue Reading…

करेन्ट लागेर चितवनमा १ जनाको मृत्यु

१ भदौ, चितवन । भरतपुर महानगरपालिका–११, अमनचोकमा शनिबार साँझ करेन्ट लागेर १ जनाको ज्यान गएको छ ।

पर्सा पोखरीया नगरपालिका–३ स्थायी घर भएका ३१ वर्षीय अनरजित मुखियाको करेन्ट लागेर ज्यान गएको हाे ।

प्रहरीका अनुसार पानी तान्ने मोटरबाट चुहिएको करेन्ट लागेर मुखिया घाइते भएका थिए । घाइते उनलाई भरतपुर अस्पताल लगिएकोमा त्यही उपचारका क्रममा मृत्यु भएको हो ।

उनी भरतपुरमा मजदुरी गर्दै आइरहेका थिए । मुखियाको शव परीक्षणका लागि अहिले भरतपुर अस्पतालमा राखिएको छ ।

Continue Reading…

आहा ! वैद्यनाथ धाम

१ भदौ, डोटी ।

‘डोटी राम्रो डडेल्धुरा, अछाम राम्रो साँफ्या

मलाई पनि उडाइ लैजा हिमचुलीका डाँफ्या…।’

यो गीत नन्दकृष्ण जोशीले त्यतिकै गाएका होइन रहेछन् । साँच्चै रमणीय छ, अछामको साँफे । चारैतिर डाँडाले घेरेको समथर ठाउँ, परभली नदी र बुढीगंगा, त्यही बुढीगंगाको छेवैमा वैद्यनाथ धाम । साँफेको सुन्दरतामा यही वैद्यनाथ धामले थप सुन्दरता थपेको छ ।

वैद्यनाथ धामको प्रांगणमा सौर्य बत्ती लगाइएका छन् । प्रांगणको बीच भागमा मञ्च छ । भित्र चार ढोका भएको वैद्यनाथको मन्दिर छ । मन्दिर वरिपरि अष्ठ भैरव, मालिका, कालिका, पार्वतीका मन्दिर, माण्डपनाथ मन्दिर, चार देवलहरु छन् । मन्दिर परिसरमै यज्ञशाला छ । प्रतिक्षालय, बैठक कक्ष पनि मन्दिर परिसरमै बनाइएका छन् ।

वैद्यनाथको धार्मिक महत्त्व

रावणले तपस्या गरी शिवको बरदान पाएको ठाउँ भनेर चिनिन्छ वैद्यनाथ । मन्दिरका पुजारी देवराज उपाध्याय भन्छन्, ‘पुराणअनुसार १० टाउका भएका रावणले आफ्नो लक्ष पाउनका लागि आफ्नै टाउको काट्दै हवन गर्दै गए । यसरी उनले नौ टाउका काटेर होमकुण्डमा हालिसक्दा समेत शिवको दर्शन नपाएपछि स–शरीर हमन गर्ने सोचेर दशौं टाउको काट्न लाग्दा शिवजीले वैद्यको रुपमा दर्शन दिए । वैद्य भएर रावणका सबै टाउकाहरु फेरि जोडेका कारण यस क्षेत्रको नाम वैद्यनाथ राखिएको हो ।’

रावणले शिवजीलाई बाचा गराई शिवलिंग लैजान माग गरे । बाचा अनुसार शिवले आफ्नोे लिंग दिए । सो कुरा पार्वतीले थाहा पाएपछि उनले अदृष्य शक्तिको प्रयोग गरी शिवलिंगलाई उठाउनै नसक्ने गह्रुंगो बनाइदिइन् । त्यसकारण रावणले लैजान नसकेपछि यो शिवलिंग यसै वैद्यनाथ क्षेत्रमा रहेको पुराणहरुमा उल्लेख गरिएको उपाध्याय बताउँछन् । १२ वटा ज्योतिर्लिंगमध्ये एउटा नेपालमा छ, जुन वैद्यनाथ धाममा अवस्थित छ । ‘हुन त भारतले झारखण्डमा रहेको वैद्यनाथ धामलाई असली भनेर प्रचार गर्छ, तर पुराणहरुमा गरिएको व्याख्याअनुसार सबै कुरा अछामकै वैद्यनाथ धामसँग मेल खान्छ’ वैद्यनाथ विद्याश्रमका प्रधानाध्यापक समेत रहेका उपाध्यायले भने, ‘वैद्यनाथ धाम क्षेत्रमा वृद्धनदी (बुढीगंगा), पद्मजा नदी (पाइली गाड), गोदावरी नदी (परभली नदी) र सरस्वती नदी (परभलीगाड) यस क्षेत्रमा मात्रै छन्, जुन पुराणमा व्याख्या गरिएका छन् ।’ यस्तै खेचरादी पर्वत (खप्तड) को फेदमा रहेको भन्ने उल्लेख भएको तर भारतमा खेचरादी पर्वत नभएको उपाध्यायको दावी छ ।

मन्दिर संरक्षण र व्यवस्थापनका लागि २०४४ सालमा वैद्यनाथ क्षेत्र विकास संस्था स्थापना भएको छ । उक्त संस्थाले मन्दिरको संरक्षण र विकास गर्दै आइरहेको बताउँछन् संस्थाका अध्यक्ष नेत्र कुँवर । उनले भने ‘नदी कटान प्रमुख समस्या छ, यसका लागि तटबन्ध आवश्यक छ, हामीले पहल गरिरहेका छौं ।’

साँफे हाटबजारबाट करिब तीन किलोमिटरको दुरीमा रहेको यस मन्दिरमा माघे संक्रान्ति र महाशिवरात्रीका दिन मेला लाग्ने गर्छ । उक्त मेलामा नेपालका साथसाथै भारतको उत्तराखण्ड, उत्तर प्रदेश, बिहारलगायतका क्षेत्रबाट भक्तजनहरु आउने गरेको बताउँछन् संस्थाका अध्यक्ष कुँवर ।

उक्त मेलामा सशस्त्र प्रहरी बलले सलामी दिने प्रचलन छ । यस्तै राष्ट्र शान्तिका लागि भन्दै बटुकहरुले प्रत्येक बिहान दुई घण्टा रुद्राभिषेक गर्दछन् ।

मन्दिरभित्रै विद्याश्रम

वैदिक सनातन जोगाउनका लागि २०५५ सालमा मन्दिर परिसरभित्रै वेद विद्याश्रम स्थापना गरिएको छ । कक्षा ६, ७ र ८ को पढाइ हुने उक्त विद्याश्रममा हाल ४३ विद्यार्थी रहेको प्रधानाध्यापक उपाध्यायले बताए । विद्याश्रमका एक दरवन्दी र दुई राहत गरी तीन जना शिक्षक छन् । यस्तै नेपाल महर्षि फाउण्डेसन र सशस्त्र प्रहरी बलले एक–एक जना कर्मचारी विद्याश्रमलाई सहयोग गरेका छन् ।

‘४३ जना बटुकहरु र हामी तीन जना शिक्षकहरु बिद्याश्रममै बस्छौ र यतै खाना खान्छौं,’ शिक्षक केशवराज भट्टले भने, ‘बटुकहरुको खानाका लागि मुख्यश्रोत ‘पीरपाथी’ नै हो । पहिले ‘पीर’ (पुजारी) हरुको भरण पोषणका लागि प्रत्येक बालीमा प्रत्येक घरबाट एक पाथी अन्न छुट्याउनु पर्ने व्यवस्था थियो । पुजारीहरुका लागि नछुट्याएसम्म किसानले नयाँ बाली खानु हुँदैन भन्ने मान्यता थियो ।’

सोहीअनुसार अहिले पनि पायल, लुंग्रा र पर्वा गाउँहरुबाट पिरपाथी संकलन हुन्छ । यसरी संकलन भएको अन्न नै बटुकहरुको भोजनको मुख्य स्रोत हो ।

यस्तै महर्षि फाउण्डेसनले नित्य पूजाका लागि वार्षिक ६ लाख रुपैयाँ दिने गरेको र उक्त रकम पनि बटुकहरुको खाना, लुगामा खर्च गर्ने गरेको उपाध्यायले वताए । ‘हामीले सहयोग रसिद पनि छपाएका छौं’ उपाध्यायले भने, ‘मन्दिरको दर्शन गर्न आउने भक्तजनहरुले सहयोग गर्छन्, यसरी नै चलेको छ ।’

‘कहिलेकाहीँ नगरपालिकाले, वडाहरुले पनि सहयोग गर्ने गरेका छन्,’ उनी थप्छन्, ‘स्थायी स्रोतहरु भने केही छैन ।’

वैद्यनाथ संग्रहालय पनि

मन्दिर परिसरभित्रै वैद्यनाथ संग्रहालय स्थापना गरिएको छ । विक्रम सम्वत् १८४८ सालमा जर्नेल अमरसिंह थापा नेतृत्वको टोलीले अछाम बिजयी गरेका बेला प्रयोग गरेका हातहतियार उक्त संग्रहालयमा राखिएका छन् । सो संग्रहालय स्थापनासँग सम्बन्धित रोचक किम्वदन्ती छ ।

अछाम बिजयपछि डोटीका लागि हिँडेको अमरसिंह थापा नेतृत्वको टोली हालको पूर्वीचौकी गाउँपालिका–५, काँडा पुगेपछि एकाएक आँखा नदेख्ने भएछ । फर्केर अछामतिर हेर्दा आँखा देख्ने, तर डोटीतिर जान खोज्दा नदेख्ने भएपछि राति काँडामै बास बसेर द्वीप प्रज्वलन गरी भगवतीको आराधना गरेर सुतेछन् ।
राति टोलीका एक सदस्यलाई भगवतीले सपनामा टोलीसँग भएका सम्पूर्ण हातहतियार वैद्यनाथ मन्दिरमा चढाएर जानू भनिछन् । सोहीअनुसार ३१ नाल बन्दुक, खुकुरीलगायतका हतियारहरु वैद्यनाथलाई चढाएको साँफेबगर नगरपालिका–१ का वडाध्यक्ष अमरबहादुर शाहले सुनाए । उनले भने, ‘पुरातत्व विभागले पनि यो हतियार त्यति बेलैको भएको पुष्टि गरेको छ ।’

संग्रहालयमा पुजारीले लगाउने लुगा, पूजा गर्ने भाँडाहरु, गहना, शालिग्राम राखिएको वैद्यनाथ क्षेत्र विकास संस्थाका अध्यक्ष कुँवर बताउँछन् । यसका साथसाथै अछामका महत्वपूर्ण धार्मिक, ऐतिहासिक तथा पर्यटकीय स्थलका तस्वीरहरु पनि राखिएको छ ।

नौमुठे गाई पनि मन्दिरभित्रै

अछामको नौमुठे गाई प्रसिद्ध छ । अगाडिको खुट्टाको खुरबाट मुठ्ठीले नाप्दै जाँदा जुरोसम्म नौ मुठ्ठी उचाइ मात्रै हुने भएकाले यस जातको गाईलाई ‘नौ मुठे गाई’ नामाकरण गरिएको हो ।

‘नौ मुठे गाई लोप हुँदै गइरहेको छ, यसको संरक्षण गर्नु आवश्यक छ,’ संस्थाका अध्यक्ष कुँवरले भने, ‘हामीले मन्दिर दर्शन गर्न आउने भक्तजनहरुले नौ मुठे गाईको बारेमा पनि जानकारी पाउन् भन्ने उद्देश्यका साथ मन्दिरभित्रै नौ मुठे गाई पाल्न सुरु गरेका छौं ।’ उनले मन्दिरमा गाईको शुद्ध दूध चढाउनका लागि पनि गाई पाल्न आवश्यक भएको बताए ।

Continue Reading…

लोकसेवाले थप ६ हजार कर्मचारीको बिज्ञापन खोल्दै, प्रमुख आयुक्त प्रधानमन्त्री भेट्दै

काठमाडौं । स्थानीय तहबाट माग भएर आएका थप ६ हजार कर्मचारीको स्थायी बिज्ञापन खोल्ने तयारी अन्तिम चरणमा पुगेको छ । लोकसेवा आयोगले पुरानै नियमावली अनुसार विज्ञापन गर्ने की नयाँ नियमावली जारी भएपछि विज्ञापन गर्ने छलफल गरिरहेको छ ।

‘माननीय प्रमुख आयुक्त र आयुक्तज्यूहरुले छलफल चलाइरहनु भएको छ’ लोकसेवाका एक कर्मचारीले भने ‘मन्त्रीज्यूसँग छलफल सकियो, प्रधानमन्त्रज्यूसँग छलफल गर्न बाँकी छ । प्रधानमन्त्रीसँग छलफल गरेपछि नयाँ बिज्ञापनको टुंगो लाग्ने भएको छ ।

संघिय मामिला तथा सामान्य प्रशासनमन्त्री लालबाबु पण्डित वर्तमान नियमावलीबाटै भएपनि थप नयाँ बिज्ञापन गर्नुपर्ने पक्षमा छन् । तर आदिवासी जनजातीहरुले पुरानो नियमावली अनुसार फेरी बिज्ञापन गरे आन्दोलन गर्ने चेतावनी दिँदै आएका छन् ।

जेठ महिनामा खोलिएको पहिलो चरणको बिज्ञापन पुरानै नियमावली अनुसार थियो । पुरानो नियममावलीमा आरक्षण कोटा ३३ प्रतिशत मात्र निर्धारण गरिएको छ । तर नेपालको संविधानले ४५ प्रतिशत आरक्षणलाई सुरक्षीत गरेको छ । आरक्षण ३३ प्रतिशत कि ४५ प्रतिशत भन्नेमा अहिले विवाद चलिरहेको छ । ४५ प्रतिशत आरक्षणको लोकसेवा नियमावली बनिसकेको छैन । संसदले पारित नगरेसम्म लागु हुँदैन ।

उता स्थानीय तहले भने छिटो कर्मचारी पठाउन मन्त्रालयलाई ताकेता गरिरहेका छन् । स्थानीय तहको दवावमा परेका मन्त्री पण्डित पुरानै नियमावली प्रयोग गरेर भएपनि विज्ञापन गर्नुपर्ने पक्षमा छन् । प्रधानमन्त्री ओलीलाई भेटेपछि आयोगले निर्णय लिने स्रोतले बताएको छ ।

Continue Reading…

वाणिज्य बैंकहरुले कमाए ६५ अर्ब, राष्ट्रिय वाणिज्य बैंक पहिलो बन्दा सिभिल देखियो कमजोर

१ भदौ, काठमाडौं । मुलुकमा सञ्चालित २८ वटै वाणिज्य बैंकहरुले आर्थिक वर्ष २०७५/७६ को वित्तीय विवरण सार्वजनिक गरेका छन् । वित्तीय विवरणअनुसार वाणिज्य बैंकहरुले गत आर्थिक वर्षमा ६५ अर्ब ३९ करोड ५७ लाख रुपैयाँ मुनाफा आर्जन गरेका हुन् ।

यो अघिल्लो आर्थिक वर्षको तुलनामा करिब २५ प्रतिशत बढी मुनाफा हो । अघिल्लो आर्थिक वर्ष ०७४/७५ यी बैंकहरुले ५२ अर्ब ७ करोड रुपैयाँ मुनाफा आर्जन गरेका थिए ।

नेपाल राष्ट्र बैंकले गत आर्थिक वर्षको असार मसान्तसम्म कर्जा तथा निक्षेपको ब्याजदरबीचको अन्तर (स्प्रेड रेट) ४ दशमलव ५ मा झार्न निर्देशन दिएको थियो । अघिल्लो आर्थिक वर्ष ५ प्रतिशत रहेको स्प्रेड रेट असार मसान्तसम्म अधिकांश बैंकले ४.५ मा झारेको भए पनि मूनाफामा राम्रै सुधार भएको हो । औसतमा भने बैंकहरुको स्प्रेड रेट ६ प्रतिशतको हाराहारीमा छ ।

उद्योगी–व्यवसायीहरुले भने बैंकहरुले बढी मुनाफा कमाएको भन्दै स्प्रेड रेट ३.५ प्रतिशतमा झार्न माग गर्दै आएका छन् । चालु आर्थिक वर्षको मौद्रिक नीतिमार्फत राष्ट्र बैंकले आगामी असार मसान्तसम्म ४.४ मा झार्न निर्देशन दिएको छ ।

बेलाबेलामा तरलता अभावको सामाना गरिरहेका बैंकहरुले यत्तिको मुनाफा आर्जन गर्नु राम्रो भएको राष्ट्र बैंककै अधिकारीहरु बताउँछन् ।

मुनाफा धेरै कमाउनेमा सरकारी बैंक

पूर्ण सरकारी स्वामित्वको राष्ट्रिय वाणिज्य बैंक मुनाफाका आधारमा नम्बर वान देखिएको छ । यो बैंकले गत आर्थिक वर्षमा पाँच अर्ब ३२ करोड ८३ लाख रुपैयाँ खुद मुनाफा आर्जन गर्दै पहिलो बन्न सफल भएको हो ।

बैंकको नाफा अघिल्लो आर्थिक वर्षको तुलनामा ४५.६१ प्रतिशतले बढेको छ । आर्थिक वर्ष ०७४/७५ मा बैंकले तीन अर्ब ६५ करोड ९२ लाख खुद मुनाफा कमाएको थियो । राष्ट्रिय वाणिज्य बैंक सरकार मात्रैको लगानीमा स्थापना भएको बैंक हो ।

मुनाफाका आधारमा कृषि विकास बैंक दोस्रो स्थानमा देखिएको छ । यो बैंकले एक वर्षमा चार अर्ब ३५ करोड ३२ लाख रुपैयाँ खुद मुनाफा आर्जन गरेको छ । बैंकले आर्थिक वर्ष ०७५/७६ को चौथो त्रैमासको वित्तीय विवरण सार्वजनिक गर्दै चार अर्ब ३५ करोड ३२ लाख रुपैयाँ खुद मुनाफा आर्जन गरेको बताएको छ ।

बैंकले अघिल्लो आर्थिक वर्षको तुलनामा गत वर्ष १९.१७ प्रतिशतले मुनाफा बढाएको हो । अघिल्लो आर्थिक वर्ष बैंकले ३ अर्ब ६५ करोड रुपैयाँ खुद मुनाफा आर्जन गरेको थियो । यसैगरी बैंकले ३ अर्ब ३१ करोड रुपैयाँ वितरणयोग्य नाफा आर्जन गरेको छ । वितरणयोग्य नाफा अल्लिो आर्थिक वर्षको तुलनामा ७.८२ प्रतिशतले बढेको हो । यो बैंकको चुक्ता पुँजी १४ अर्ब ४४ करोड रुपैयाँ माथि रहेको छ । नेपाल सरकारको सबैभन्दा धेरै लगानी रहेको कृषि विकास बैंकले कृषि क्षेत्रमा केन्द्रित भएर बढी लगानी गर्ने गरेको छ ।

निजी क्षेत्रको पहिलो बन्यो नविल

निजी क्षेत्रको लगानी रहेका बैंकहरु मध्ये सबैभन्दा धेरै मुनाफा नविल बैंक लिमिटेडले कमाएको छ । नविलले एक वर्षमा ४ अर्ब रुपैयाँभन्दा बढी मुनाफा आर्जन गरेको छ । बैंकले गत आर्थिक वर्ष ०७५–७६ को चौथौ त्रैमासको वित्तीय विवरण सार्वजनिक गर्दै ४ अर्ब २९ करोड ४१ लाख रुपैयाँ खुद मुनाफा आर्जन गरेको जानकारी दिएको हो ।

अघिल्लो आर्थिक वर्षमा बैंकले ३ अर्ब ९८ करोड रुपैयाँ कमाएको थियो । अघिल्लो आर्थिक वर्षको तुलनामा बैंकले गत आर्थिक वर्षमा बैंकको नाफा ७.८४ प्रतिशतले बढाएको हो । बैंकको वितरण योग्य मुनाफा भने ३ अर्ब १८ करोड ४६ लाख रुपैयाँ रहेको छ । बैंकले अघिल्लो आर्थिक वर्ष ३४ प्रतिशत लाभांश दिएको थियो । यस वर्ष त्योभन्दा पनि बढी लाभांश दिने क्षमता नविल बैंकको देखिएको छ । बैंकको खुद ब्याज आम्दानी १७.१५ प्रतिशतले बढेर ७ अर्ब ३३ करोड ६० लाख पुगेको छ । अघिल्लो आर्थिक वर्षको सोही अवधिमा खुद ब्याज आम्दानी ६ अर्ब २६ करोड २० लाख रहेको थियो ।

गत आर्थिक वर्ष बैंकले १ खर्ब ६४ अर्ब ३७ करोड ६० लाख निक्षेप संकलन गरेको छ । जुन अघिले आर्थिक वर्षको सोही अवधिको भन्दा २१.९३ प्रतिशतले बढी हो । अघिल्लो आर्थिक वर्षमा बैंकले १ खर्ब ३४ अर्ब ८१ करोड छ लाख रुपैयाँ निक्षेप संकलन गरेको थियो ।

सोही अवधिमा बैंकको कर्जा लगानी १८.५४ प्रतिशतले बढेर १ खर्ब २८ अर्ब २० करोड ४३ लाख पुगेको छ । अघिल्लो आर्थिक वर्षको सोही अवधिमा बैंकले १ खर्ब ९ अर्ब पाँच करोड ९३ लाख कर्जा लगानी गरेको थियो । बैंकको खराब कर्जा ०.७४ प्रतिशत रहेको छ भने बेस रेट ८.०९ प्रतिशत रहेको छ ।

३ बैंकको नाफा बढेन

गत आर्थिक वर्षमा ३ वटा बैंकले मूनाफामा सुधार गर्न सकेनन् । आर्थिक वर्ष ०७४/७५ को तुलनामा ०७५/७६ मा ३ वाणिज्य बैंकहरुले मुनाफामा सुधार गर्न नसकेका हुन् ।

३ मध्ये नेपालकै सबैभन्दा जेठो बैंक नेपाल बैंकको नाफामा समेत गिरावट आएको छ । यो बैंकको मुनाफा करिब १९ प्रतिशतको छ ।

गत आर्थिक वर्षमा यो बैंकको नाफा दुई अर्ब ६१ करोड रुपैयाँ कमाएको छ ।

नेपाल इन्भेष्टमेन्ट बैंकले हालत पनि उस्तै छ । गत आर्थिक वर्षको चौथो त्रैमाससम्मको अपरिस्कृत वित्तीय विवरण अनुसार बैंकले तीन अर्ब ४१ करोड ५६ लाख रुपैयाँ खुद मुनाफा आर्जन गरेको छ । अघिल्लो आर्थिक वर्ष ०७४/७५ को सोही अवधिमा बैंकले तीन अर्ब ६५ करोड ९३ लाख खुद मुनाफा कमाएको थियो । अर्को सेञ्चुरी कमर्र्सियल बैंकको नाफामा पनि गिरावट आएको छ । सेञ्चुरी कमर्सियल बैंकले जम्मा ८६ करोड आठ लाख रुपैयाँ मात्रै कमाएको छ ।

सुधारोन्मुख प्रगति

एनआईसी एसिया बैंक लिमिटेडले चालु आ.व. ०७५/७६ मा १२९ प्रतिशत अर्थात् रु. १ अर्ब ७२ करोडको वृद्धिसहित रु. ३ अर्ब ५ करोड आर्जन गर्न सफल भएको छ । गत वर्षको सोही अवधिको खुद मुनाफा रु. १ अर्ब ३३ करोड रहेको थियो ।

उता एभरेष्ट बैंकले गत आर्थिक वर्षमा १८ प्रतिशतले नाफा बढाएको छ । बैंकले यो अवधिमा ३ अर्ब ४ करोड रुपैयाँ खुद नाफा आर्जन गरेको छ । अघिल्लो वर्षमा बैंकले २ अर्ब ५८ करोड रुपैयाँ नाफा कमाएको थियो ।

यसैगरी हिमालयन बैंकले अघिल्लो आर्थिक वर्षको तुलनामा गत आर्थिक वर्ष ५१ प्रतिशतले बढाएर २ अर्ब ८४ करोड ७० लाख रुपैयाँ पुर्याएको छ । अघिल्लो आर्थिक वर्ष बैंकले १ अर्ब ८७ करोड ५६ लाख रुपैयाँ नाफा कमाएको थियो ।

उता ग्लोबल आईएमई बैंकले एक वर्षमा २ अर्ब ७९ करोड ५२ लाख ९४ हजार रुपैयाँ मुनाफा आर्जन गरेको छ । आर्थिक वर्ष ०७५/७६ को चौथो त्रैमासको वित्तीय विवरण सार्वजनिक गर्दै ग्लोबल आईएमईले २ अर्ब ७९ करोड ५२ लाख ९४ हजार रुपैयाँ मुनाफा आर्जन गरेको जानकारी दिएको हो ।

आर्थिक वर्ष ०७४/७५ मा यो बैंकले २ अर्ब १० करोड १३ लाख ६३ हजार रुपैयाँ मुनाफा आर्जन गरेको थियो । अघिल्लो वर्षको तुलनामा ग्लोबल आईएमई बैंकले ३३ प्रतिशतले मुनाफा बढाएको हो ।

विदेशी लगानीको स्टान्डर्ड चाटर्ड बैंकले एक वर्षको अवधिमा दुई अर्ब ४९ करोड ५३ लाख रुपैयाँ मुनाफा आर्जन गरेको छ । अघिल्लो आर्थिक वर्षको तुलनामा स्टाण्डर्ड चार्टड बैंकले करिब १४ प्रतिशतले मुनाफा आर्जन गरेको हो । आर्थिक वर्ष ०७४/७५ मा बैंकले २ अर्ब १८ करोड रुपैयाँमात्रै आम्दानी गरेको थियो ।

नेपाल राष्ट्र बैंकले तोके अनुसारको ८ अर्ब रुपैयाँ चुक्ता पुँजी पुर्याउन बाँकी रहेको नेपाल क्रेडिट एण्ड कमर्श बैंक (एनसीसी) ले गत आर्थिक वर्षमा सन्तोषजनक प्रगति गरेको छ । बैंकले गत आर्थिक वर्ष ०७५/७६ मा १ अर्ब ५२ करोड रुपैयाँ मुनाफा आर्जन गरेको छ ।

बैंकको अघिल्लो आर्थिक वर्षमा मुनाफा १ अर्ब ३४ करोड १५ लाख रुपैयाँ रहेकोमा करिब १३ प्रतिशतले मुनाफा बढाउँदै बैंकले १ अर्ब ५२ करोड रुपैयाँ पुर्याएको हो ।

तोकिएको चुक्ता पुँजी पुर्याउन बाँकी रहेको एनसीसी एक मात्रै वाणिज्य बैंक हो । एनसीसीको चुक्ता पुँजी अहिले ७ अर्ब १ करोड ८५ लाख रुपैयाँ रहेको छ । बोनस सेयर दिएर बैंकले पुँजी पुर्याउँदैछ ।

अन्य बैंकले कति कमाए ?

प्राइम कमर्सियल बैंक– दुई अर्ब ३६ करोड रुपैयाँ

एनएमबि बैंक– दुई अर्ब ३१ करोड रुपैयाँ

सिद्धार्थ बैंक– दुई अर्ब ३० करोड रुपैयाँ

नेपाल एसबीआई बैंक– दुई अर्ब ३० करोड रुपैयाँ

सानिमा बैंक– दुई अर्ब २४ करोड रुपैयाँ

प्रभु बैंक– दुई अर्ब पाँच करोड रुपैयाँ

बैंक अप– काठमाण्डू– एक अर्ब ९३ करोड रुपैयाँ

मेगा बैंक– एक अर्ब ७१ करोड ९२ लाख रुपैयाँ

माछापुच्छ्रे बैंक– एक अर्ब ७० करोड रुपैयाँ

सनराइज बैंक– एक अर्ब ७० करोड रुपैयाँ

नेपाल बंगलादेश बैंक– एक अर्ब ६१ करोड रुपैयाँ

लक्ष्मी बैंक– एक अर्ब ५७ करोड रुपैयाँ

एनसीसी बैंक– एक अर्ब ५२ करोड रुपैयाँ

सिटिजन्स बैंक इन्टरनेसनल– एक अर्ब ४८ करोड रुपैयाँ

जनता बैंक– एक अर्ब ३४ करोड रुपैयाँ

कुमारी बैंक– एक अर्ब ३३ करोड रुपैयाँ

सिभिल बैंक– ८० करोड रुपैयाँ

Continue Reading…

शान्ति सम्झौतापछि झनै निराशा छाएको छ : पत्रकार खड्का

१ भदौ, पोखरा । तत्कालीन समयमा संघर्षरत विद्रोही माओवादी पक्ष र सरकार पक्षबीच १० वर्षे लामो सशस्त्र द्वन्द्व भयो । २०५२ सालदेखि सुरु भएको सशस्त्र युद्ध २०६३ सालमा आएरमात्रै विश्राम पायो । संघर्षरत विद्रोही पक्ष र सरकारबीच शान्ति सम्झौतापश्चात तत्कालीन विद्रोही पक्ष नेकपा माओवादी अहिले नेकपा एमालेसँग बाम गठबन्धन गरी  मुलधारको राजनीतिमा सक्रिय छ । तत्कालीन समयमा आम मानिसहरु परिवर्तनको सपना बोकेर छापामार भए । युद्ध लडे । कति बेपत्ता पारिए । कतिले ज्यान गुमाए । कतिले अंगभंग जीवन बिताइरहेका छन् ।

सशस्त्र आन्दोलनको अगुवाइ गरेका नेता अहिले राज्य सञ्चालनको प्रमुख ओहोदामा छन् । ‘के उनीहरुले शान्ति सम्भौतापछि जनआन्दोलनको मर्मबमोजिम काम गरेका छन् त ?’ सुरेश रानाभाट पत्रकार तथा लेखक संगिता खड्कालाई प्रश्न गर्छन्, ‘अहिले आएर जनआन्दोलन ठीक थियो भन्ने लाग्छ ?’

पत्रकार खड्का जनयुद्धमा भूमिगत रहेरै पत्रकारिता गरेकी एउटी हस्ताक्षर हुन् । उनी तत्कालीन समयमा कृष्णसेन इच्छुकसँग पनि जेल जीवन बिताएकी थिइन् । राज्य पक्ष र माओवादी पक्षको आन्दोलनलाई नजिकबाट नियालेकी उनको उत्तर थियो, ‘जनयुद्धपछि केही सैद्धान्तिक परिवर्तन त भयो । तर, व्यवहारिक परिवर्तन भएन ।’

र्‍यान्डम रिर्डस सोसाइटीले शनिबार पोखरामा लेखक तथा पत्रकार खड्कासँग अर्का पत्रकार तथा लेखक सुरेश रानाभाटले ‘र्‍यान्डम संवाद’ गरेका हुन् । सोसाइटीले प्रत्येक शृंखलामा विभिन्न कृति तथा विषयवस्तुमाथि अन्तर्क्रिया गर्दै आइरहेको छ । सोही कार्यक्रमअन्तर्गत शनिबार भएको ९९ औं शृंखलामा खड्काको नवीनतम् कृति युद्धका ती दिनलाई मञ्चमा उभ्याएको हो ।

जनआन्दोलनको अगुवाइ गरेका नै राज्य सञ्चालनको पहुँचमा रहँदासमेत हुनुपर्ने जति परिवर्तन नभएकाले जनतामा निराशा छाएको खड्काको बुझाइ छ । तर, त्यसमा नेतृत्वदायी भूमिका खेल्ने नेताको मात्रै दोष नरहेको उनले बताइन् । उनले जनयुद्धको समयभन्दा शान्ति सम्झौतापछि जनतामा झनै निराशा छाएको बताइन् ।

‘जिउज्यान लगाएर कयौं नेपाली परिवर्तनको सपना देखेर छापामार भए । अहिले आफूले चाहेको जस्तो नहुँदा उनीहरुमा घोर निराशा छाएको पक्का हो,’ उनले भनिन्, ‘यसमा उनीहरुले पनि माथिल्लो नेतृत्वलाई दबाव र सचेत गराइरहन जरुरी छ ।’ उनले परिवर्तन सधैं माथिल्लो नेतृत्वबाट मात्रै सम्भव नहुने हुँदा तल्लो तहबाट पनि घच्घच्याइरहन आवश्यक रहेको पटक-पटक दोहोर्‍याइन् ।

पत्रकार खड्काले जनयुद्धबारे अहिले नै समीक्षा गरिहाल्नुपर्ने आवश्यकता नरहेको बताइन् । उनले भनिन्, ‘अझै बिग्रेको केही छैन । अहिले नै थाक्नुपर्ने अवस्था आइसकेको छैन । सबैले आफ्नो भूमिका खोज्दै दायित्व पूरा गर्ने हो भने त्यतिबेला देखेको सपना अवस्य पूरा हुन्छ ।’ उनले नेतृत्व विलाशितामा रमाइरहेकाले कार्यकर्ता नै जागरुक हुनपर्ने बताइन् ।

कार्यक्रममा पत्रकार खड्काले तत्कालीन समय वास्तविक चित्रण गर्न आफूले ‘युद्धका ती दिन’ पुस्तक प्रकाशन गरेको जानकारी दिइन् । ‘संस्मरण मैले २०६४ सालदेखि नै प्रकाशन गर्ने सोचेकी थिएँ, तर म सामान्य थिएँ । मेरो अनुभव पनि के काम लाग्ला र भन्ने सोचेर प्रकाशन नगरेकी हुँ,’ उनले भनिन्, ‘तर त्यतिबेलाका केही निर्दोष र बाहिर नआएका पक्षलाई उजागर गर्न पनि प्रकाशन गर्नैपर्ने भयो ।’

उनले तत्कालीन छापामारहरु अहिले किनारमा पारिएकाले उनीहरुको अवस्था सार्वजनिक गर्न कृति प्रकाशन गरेको सुनाइन् ।

कृति सांगि्रला बुक्सले प्रकाशन गरेको हो । संगिता खड्का दुई दशकदेखि पत्रकारितामा सक्रिय छिन् । जनादेश साप्ताहिकको सहसम्पादक, नेपाल पत्रकार महासंघको केन्द्रीय सचिव, रेडियो नेपालबाट प्रसारण हुने कार्यक्रम घटना र विचारको संयोजक बनेर काम गरेको अनुभव उनीसँग छ ।

Continue Reading…
Loading...

Popular Bla Bla's

Loading...

Latest Bla Bla's on Fun2Sh

Powered by Blogger.
Copyright © Funtoosh Blog